Pa E
Pa sa e ken i e di kon den sirbi otronan ta yuda nos komprondé ku e manifestashon mas haltu di amor ta deboshon na Dios.
Riba e anochi históriko aki, mi ta ekspresá mi amor i apresio na kada un di boso, mi hermananan stimá. Kualke sea boso edat, lugá, òf sirkunstansia, awe nochi nos ta reuní den union, den forsa, den propósito, i den testimonio ku nos ta stimá i guiá pa nos Tata Selestial; nos Salbador, JesuCristu; i nos profeta bibiente, Presidente Russell M. Nelson.
Komo pareha hóben, mi kasá i ami a wòrdu yamá pa nos obispu pa bishitá i ministrá un famia ku pa hopi aña no a bai Iglesia. Ku disposishon nos a aseptá e yamamentu i a bai na nan kas algun dia despues. Inmediatamente tabata kla pa nos ku nan no tabata ke bishita di Iglesia.
Asina ku na nos siguiente bishita, nos a bai serka nan ku un tayó di kuki, konfiando ku e chukulati lo a suavisá nan kurason. Esei no a pasa. E pareha a papia ku nos dor di e porta mei mei, lagando kla ku nos no tabata bon biní. Pero ora nos a kore bai kas, nos tabatin kasi sigur ku algun éksito por a wòrdu lográ si solamente nos a ofresé nan Rice Krispies.
Nos falta di vishon spiritual a hasi siguiente intentonan frustrante. Rechaso nunka no ta konfortabel. Despues di tempu nos a kuminsá puntra nos mes, “Di kon nos ta hasiendo esaki? Kiko ta nos meta?”
Èlder Carl B. Cook a bisa esaki: “Sirbi den Iglesia . . . por ta un desafio si nos wòrdu pidí pa hasi algu ku ta spanta nos, si nos kansa di sirbi, òf si nos ta yamá pa hasi algu ku na prinsipio nos no ta haña atraktivo.”1 Nos a eksperensiá e palabranan di Èlder Cook ora nos a disidí ku nos mester a buska guia di Un Persona ku mas perspektiva ku di nos mes.
Asina ku, despues di hopi orashon i estudio, nos a risibí e kontesta na e di kon di nos servisio. Nos tabatin un kambio den nos komprendementu, un kambio di kurason, en realidat un eksperensia reveladó.2 Segun nos a buska guia for di e skrituranan, Señor a siña nos kon pa hasi e proseso di sirbi otronan mas fásil i mas signifikativo. Ata e verso ku nos a lesa i ku a kambia nos kurason i nos aserkamentu. E ta bisa ku nos mester stima Señor nos Dios ku henter nos kurason, poder, mente i forsa; i den e nòmber di JesuCristu nos lo sirbié. 3Ounke e verso aki tabata asina familiar, e ta parse di a papia na nos den un manera nobo i importante.
Nos a realisá ku nos tabata luchando sinseramente pa sirbi e famia aki i pa sirbi e obispu, pero nos mester a puntra nos mes si nos tabata sirbi realmente for di amor pa Señor. Rei Benjamin a klarifiká e distinshon aki ora el a deklará, “At’akí mi ta bisa boso ku pasobra mi a pasa mi dianan den sirbishi di boso, mi no ta deseá broma, pasobra mi tabata solamente den e sirbishi di Dios.4
Pues ken Rei Benjamin tabata sirbi realmente? Tata Selestial i e Salbador. Sa e ken i e di kon den sirbi otronan ta yuda nos komprondé ku e manifestashon mas grandi di amor ta deboshon na Dios.
Segun nos enfoke a kambia gradualmente, asina nos orashonnan tambe. Nos a kuminsá anhelá pa nos bishitanan ku e famia aki pa motibu di nos amor pa Señor.5 Nos tabata hasié pa E. E a hasi pa e lucha no tabata un lucha mas. Despues di hopi luna di para riba stupi, e famia a kuminsá laga nos drenta paden. Eventualmente, nos tabatin orashon regular i diskushon di evangelio huntu. Un amistat duradero a desaroyá. Nos tabata adorá i stima E dor di stima Su yunan.
Boso por pensa bèk na un tempu ku boso ku amor a sali na alkanse ku esfuerso sinsero pa yuda un persona den nesesidat i a sinti ku boso esfuersonan no a wòrdu notá òf kisas no a wòrdu apresiá òf hasta no deseá? Na e momentu ei, boso a kuestioná e balor di boso sirbishi? Si ta asina, laga e palabranan di Rei Benjamin remplasá boso duda i hasta boso doló: “Boso ta solamente den e sirbishi di boso Dios.”6
Enbes di edifiká resentimentu, nos por edifiká, pa medio di sirbishi, un relashon mas perfekto ku nos Tata Selestial. Nos amor pa i deboshon na Dje ta kita e nesesidat pa rekonosementu òf apresio i ta laga Su amor flui na i den nos.
Tin biaha na komienso nos por sirbi for di un sentido di deber òf obligashon, pero hasta e sirbishi aki por hiba nos pa yega na algu mas haltu den nos, hibando nos pa sirbi den “un manera mas ekselente”7---manera den Presidente Nelson su invitashon pa un aserkamentu mas “nobo, santu pa kuida di i ministrá na otronan.”8
Ora nos ta enfoká riba tur lokual Dios a hasi pa nos, nos sirbishi ta flui for di un kurason di gratitut. Segun nos bira ménos preokupá tokante nos sirbishi magnifikando nos, nos ta realisá ku enbes di esei e enfoke di nos sirbishi lo ta na pone Dios promé.9
Presidente M. Russell Ballard a siña, “Ta solamente ora nos stima Dios i Cristu ku henter nos kurason, alma, i mente ku nos ta kapas pa kompartí e amor aki ku nos próhimo dor di aktonan di bondat i sirbishi.10
E promé di e Dies Mandamentunan ta reiterá e sabiduria dibino aki: “Mi ta Señor bo Dios. … Lo bo no tin niun dios ku no ta ami.”11 E lugá di e mandamentu aki ta yuda nos komprondé ku si nos pon’é komo nos prioridat prinsipal, tur otro kos lo bai al fin na lugá—hasta nos sirbishi na otronan. Ora E tuma e posishon mas importante den nos bida dor di eskoho deliberá, e ora ei E ta kapas pa bendishoná nos bon akshonnan na e akshonnan na otronan.
Señor a bisa nos pa mira na Dje den kada pensamentu.12 I kada siman nos ta hasi kombenio pa hasi presis esei … pa rekord’é semper.13 Un enfoke asina piadoso por ta apliká den tur kos ku nos ta hasi? Hasi hasta un tarea mundano por bira un oportunidat pa demostrá nos amor i deboshon na Dje? Mi ta kere ku por i lo ta.
Nos por hasi pa kada kos riba nos lista di tarea bira un manera pa glorifiká E. Nos por mira kada tarea komo un privilegio i oportunidat pa sirbié, hasta ora nos ta mei mei di deadlines, debernan, òf bruki shushi?
Manera Ammon a bisa ku e tabata sa ku e no ta nada; tokante mi forsa mi ta debil; p’esei lo mi no broma di mi mes, pero lo mi glorifiká mi Dios, pasobra ku su forsa mi por hasi tur kos.14
Ora sirbi nos Dios bira nos prioridat prinsipal den bida, nos ta pèrdè nos mes, i finalmente nos ta haña nos mes.15
E Salbador a siña e prinsipio aki asina simpel i dirèkt: “Asina anto laga boso lus lombra dilanti e pueblo aki, pa nan por mira boso bon obranan i glorifiká boso Tata ku ta na shelu.16
Lo mi ke kompartí algun palabra di sabiduria ku a wòrdu hañá riba muraya di un orfanato na Calcutta, India: “Si bo ta amabel, hende por akusá bo di motibunan egoista, skondí. Sea amabel tòg. Loke bo a tuma añanan pa edifiká, un hende por destruí den un anochi. Edifiká tòg. E bon ku bo hasi awe, mañan hopi biaha hende lo lubid’é. Hasi bòn tòg. Duna e mundu e mihó ku bo tin, i kisas nunka e no ta sufisiente. Duna e mundu e mihó ku bo por tòg. Bo sa, den e análisis final, ta entre abo i Dios … tòg.”17
Hermananan, semper ta entre nos i Señor. Manera Presidente James E. Faust a bisa: “Kiko ta e nesesidat di mas grandi den e mundu?’ … ‘E nesesidat di mas grandi den mundu no ta pa tur persona tin un relashon personal, konstante, diario, kontinuo ku e Salbador?’ Tin tal relashon por revelá e dibinidat den nos, i nada no por hasi un diferensia mas grandi den nos bida ku ora nos yega na sa i komprondé nos relashon dibino ku Dios.”18
Igual, Alma a splika na su yu hòmber, ku tur kos ku e hasi mester ta pa Señor, i unda ku e bai e mester bai den kompania di Señor. E mester enfoká tur su pensamentunan riba Señor, i mester dirigí tur su afekshon na Señor semper.19
I Presidente Russell M. Nelson a siña nos meskos, “Ora nos ta komprondé Su Ekspiashon boluntario, kualke sentido di sakrifisio di nos parti ta keda lagá den sombra pa un sentido profundo di gratitut pa e privilegio di sirbi E.”20
Hermananan, mi ta testifiká ora JesuCristu, mediante di e poder di Su Ekspiashon, ta obra riba nos i den nos, E ta kuminsá obra pa medio di nos bendishonando otronan. Nos ta sirbi nan, pero nos ta hasi asina dor di stima i sirbi E. Nos ta bira lokual e skrituranan ta deskribí: kada hòmber [i muhé] buskando e bienestar di su próhimo, i hasiendo tur kos ku e bista únikamente poné na e gloria di Dios.21
Kisas nos obispu tabata sa ku esei tabata e lès ku mi kasá i ami lo siña for di e promé i bon intenshoná, ainda no perfekto esfuersonan, pa ministrá na Su yunan stimá. Mi ta duna mi testimonio personal i testiguá sigur di e bondat i amor ku E ta kompartí ku nos hasta ora nos ta hasi esfuerso pa sirbi E. Den e nòmber sagrado di JesuCristu, amèn.