Yalovinaka, Loloma Uasivi kei na Loloma
Kemuni na taciqu, meda dikeva mada na noda bula ka meda rawa ni kila kevaka meda muria na noda iVakabula ena nona dau vakaraitaka tu na bula ni yalovinaka, yalololoma kei na loloma.
Kemuni na noqu itokani, au vakavinavinaka ena itavi dokai ena noda mai sota ena soqoni raraba oqo e vuravura meu mai vosa vei kemuni, na taura dei tu na matabete ni Kalou. Ena yakavi nikua au via wasea e dua na ulutaga au a sa vosa oti kina.
Na parofita o Momani e vakaraitaka e dua na itovo bibi me baleta na noda iVakabula ka ra saga me ra muria na Nona tisaipeli. E kaya kina o koya:
“Ia ko koya sa yalomalua ka yalo lokomi ka vakatusa ena kaukauwa ni Yalo Tabu ni sa Karisito ko Jisu, sa tu vua na loloma uasivi; ni kevaka sa sega vua na loloma uasivi, sa ka wale ga ko koya; o koya sa dodonu kina me tu vua na loloma uasivi.
“Sa dau vosota vakadede na loloma, sa yalovinaka; sa sega ni vuvu na loloma; sa sega ni vosa doudou na loloma; sa sega ni viavialevu. …
“Ia koi kemudou na wekaqu lomani, kevaka sa sega vei kemudou na loloma, dou sa ka walega, raica sa sega ni mudu na loloma. O koya mo dou kubeta matua kina na loloma uasivi ni sa ka cecere duadua sara vei ira kecega ni na mudu mai na ka kecega—
“Ia na loloma uasivi sa i koya na loloma taucoko i Karisito ka sa ia tikoga ka sega ni mudu; ka na vinaka vei koya sa kunei ni sa tu vua ena siga mai muri.”1
Kemuni na taciqu, eda na sega ni rokova na matabete ni Kalou kevaka eda sega ni lomani ira na tani.
Na noqu itokani voleka o Elder Joseph B. Wirthlin e dua na turaga dau loloma. E kaya kina o koya:
“Na yalovinaka e suitu ni bula vaka silesitieli. Na yalovinaka e draki ni bula Vakarisito ke bulataka e dua na tamata ena vakaraitaka vei ira na tani. Na yalovinaka ena vakaraitaki koya mai ena noda vosa, na noda itovo ena vanua ni cakacaka, e koronivuli, e valenilotu ka vakabibi ena lomani vuvale.
“Jisu, na noda iVakabula, e suitu ni yalovinaka kei na loloma.”2
Na vosanikalou e vakavulica vei keda na kena vakayagataki vakadodonu na matabete e vakatau tiko ena noda bulataka na yavu ni yalovinaka, yalololoma, kei na loloma. Eda wilika ena Vunau kei na Veiyalayalati:
“Sa sega sara ni kilikili me vakayacori na cakacaka vakabete ena ivakarau kaukauwa se vakasaurara, ia me vakayacori ga ena veivakauqeti, na vosota vakadede, … na yalomalua kei na yalomalumalumu, kei na loloma e sega ni veivakaisini;
io na yalo e veidokai, kei na yalomatua; raica ena rarama sara kina na yalona, ka sega vua na veivakaisini kei na lawaki.”3
Kemuni na taciqu, meda dikeva mada na noda bula ka meda rawa ni kila kevaka meda muria na noda iVakabula ena nona dau vakaraitaka tu na bula ni yalovinaka, yalololoma kei na loloma. Kevaka eda cakava oqo eda na rawa ni da duri dei me kaciva na kaukauwa mai lomalagi vei keda, me yaga vei ira na noda matavuvale, vei ira na noda itokani era veilakoyaki tu ena lakolako dredre ni lesu tale ki na noda vale mai lomalagi. Sa noqu masu oqori ena yaca i Jisu Karisito, emeni.