Io ena Tubu Cake tiko ga na nona Rarama me Yacova na Siga Uasivi ko ya.
Ena veigauna ni butobuto kei na dredre, ena dua na rarama kei na veika vinaka e voliti keda tu.
A wasea o Paula e dua na itukutuku ni nuinui vata kei ira na kai Koronica:
“Sa buku na druadrua, ia keitou sa sega ni drigiti; keitou sa lomaocaocaga, ia keitou sa sega ni yalolailai.
“Keitou sa vakacacani, ia keitou sa sega ni biu laivi; keitou sa vakabalei sobu, ia keitou sa sega ni vakarusai.”1
E vure mai vei na nona inuinui o Paula? Rogoca na nona isau ni taro: “Ni sai koya na Kalou, o koya sa kaya eliu me cila mai na butobuto na rarama sa cila mai ki na loma i keitou me cila yani na serau ni Kalou, o koya sa vakatakilai rawa e na mata i Jisu Karisito.”2
Ena veigauna ni butobuto kei na dredre, ena dua na rarama kei na veika vinaka e voliti keda tu. Ena Okotova sa oti, e tokarua taka vei keda o Peresitedi Uchtdorf, “Eda sa wavoliti tu oqo ena rarama levu veivakurabuitaki kei na dina kau taroga se da sa marautaka dina tiko na veika eda sa taukena tu.”3
Io, na vunica e vakanamata tu ena “kabu ni butobuto … ka vakamataboko taka na matada, … vakaukauwataka … na lomada … kei na… kauti keda … tani ena mua ni gu eda dodonu meda muria.”4
Ni sa kila vinaka tu na noda veisiga ni veivakatovolei e yalataka na Turaga: “Raica sa vu ni rarama na Kalou; ia ko koya sa kunea na rarama ka tudei tiko ga vua na Kalou, ena vakararamataki vakalevu; io ena tubu tiko ga na nona rarama me yacova na siga lagilagi ko ya.”5
Eda sa luvena na Kalou. Ciqoma na rarama, toso tiko vua na Kalou, ka ciqoma e vuqa rarama sa ikoya na ka eda buli kina meda cakava. Mai na ivakatekivu, eda a muria na rarama, eda a muria na Tamada Vakalomalagi kei na Nona i tuvatuva. Ni da vaqara na rarama e sa tiki ni Yagoda Vakayalo.
Au rogoca na dina titobu oqo na kena a vulici ena dua na vanua au sega ni namaka ni na vulici kina. Gauna au a cakacaka tu kina ena dua na baqe levu, Au a sureti meu lai tiko ena dua na vuli torocake ena Univesiti e Michigan. Gauna ni vuli oqo, a vakavulica vei keimami o Professor Kim Cameron na yavu ni veiliutaki vinaka kei na veika ena kauta mai vei keda. A vakamacalataka o koya: Na veika kece e bula e dau vakanamata kina kaukauwa ni [rarama] ka meda vukitani mai na kaukauwa [butobuto]. Mai na dua na yavu ni bula lailai ki na verevereya ni veigacagaca ni tamata bula, na veika bula e dau veidonui kei na veika e donu ka sega so kina na veika ca.”6
Tokoni voli ena levu ni vakadidike vakavuli, e tolu na ulutaga bibi e dau vakanamata kina me baleta na kena rawati vinaka na itovo ni cakacaka vinaka ena vanua ni cakacaka sa ikoya ya na: yalololoma, veivosoti kei na vakavinavinaka.7 E vakaibalebale sara vakalevu vei keda na tamata ena noda vuki ki na kaukauwa vinaka [rarama], na veika oqo e semata donu ka vakaraitaka vei keda ni tiko na Rarama ni Vuravura, o Jisu Karisito!
Vei kemuni na taciqu kei na ganequ, yalovinaka mo kila ni vakacegu e tiko ena rarama e vakarautaki tu vei keda. Au via vakaraitaka e tolu na vanua tou na kunea tu ga kina na rarama:
Na Rarama mai na Lotu
Na Lotu e Vuni Rarama tu ena vuravura butobuto. Oqo e dua na gauna vinaka meda mai lewena tu na Lotu i Jisu Karisito ni Yalododonu Edaidai! Sa vakasakiti na kaukauwa ni lotu ena kena ituvaki mai na gauna eliu8 ka tubucake ena veisiga na wiliwili ni tamata era sa mai lewena, tauyavu vou na veitabana, era kacivi vou na kaulotu, ka tatadoladola na veiyalava ki na kosipeli. Eda raici ira era luluqa ena Lotu ena dua na gauna era suka mai ena raivotu ni veivueti nei Peresitedi Monson e kauta mai mana ena veisiga.
Wale toka ga oqo au sikovi ira voli na itabagone mai Paraguay, Uruguay, Chile, kei Argentina na gauna ni koniferedi ni Me iSakisaki ni Tabagone. Udolu na cauravou kei na goneyalewa era gole mai ena lomani dua na macawa me ra mai vakaukauwa taka na nodra lomana na noda iVakabula, ka me ra lesu ena nodra dui veivale kei na nodra matavuvale me ra vakadeitaka na rarama kei na loloma nei Karisito.
Raica na, Lotu ena tu ga na kena meca. E se vakatu o ya mai liu ka na vakatu ga vaka oya me yacova yani na vakataotioti ni gauna. Me da kua ni laiva na veimeca oqo me vakaluluqataka na kaukauwa ni rarama sa vakarautaki tu vei keda. Na noda ciqoma ka vakasaqara tiko na rarama oqo eda na rawata tale kina eso tale na rarama.
Ia ena vuravura ka sa butobuto tiko ga, na rarama ni lotu ena uasivi na kena cilavi keda tu me yacova yani na siga totoka koya.
Na Rarama ni Kosipeli
Na rarama ni kosipeli e salatu ka na cilava vakalevu ena siga totoka koya,”9 ka na cilava serau na noda matavuvale kei na valetabu e vuravura.
Vunautaka Na Kosipeli e kaya: “Ena rarama ni kosipeli, ena rawa ni vakameautaka e vuqa na veileti vakavuvale, na duiyaloyalo kei na dredre. Na vuvale e mavoa tu ena veileti ena rawa ni na vakabulai ena yalo ni veivosoti kei na vakabauta kei na mana ni nona Veisorovaki o Jisu Karisito.”10 Na gauna oqo, o ira na noda matavuvale era dodonu me ra vuni rarama tiko vei ira na tu vakavoliti keda. Ena toso cake na rarama ni noda vei vuvale ena gauna era vakalevutaka cake na nodra veilomani kei na yalovinaka. Na gauna eda tauyavutaka kina na noda vuvale ena vakabauta, … veivutuni, veisorosorovi, vakarokoroko, dauloloma [kei na] loloma vakalou,”11 eda na vakila na tubu ni noda lomana na noda iVakabula kei ira na wekada wavoliti keda. Ena kaukauwa na vuvale, ka na qai serau ga vakalevu cake na rarama e tiko vei keda yadua.
Eda wilika ena iVolavosa ni iVola Tabu: “Na itikotiko duadua ga sa rawa ni vakatauvatani vata kei na valetabu ena kena vakatabui.”12 E sa sivia ni 155 na valetabu e vakayacori tiko kina na cakacaka kei na levu tale e sa vakarau tiko me yaco mai. E sa levu tiko ga na matavuvale era sa vauci vata tiko ka tawamudu. Era sa vakacuruma tiko na lewe ni lotu na yacadra na wekadra era sa liu yani me mai qaravi na veicakacaka ni veivakabulai vakalotu ena valetabu. Eda sa mai sotava tiko na marau ena yasa ruarua ni ilati!
Ena vuravura butobuto oqo, na rarama ni kosipeli ena uasivi tiko ga na kena serau tiko mai me yacova yani na siga totoka koya.
3. Na Rarama i Karisito
O na sega ni rawa ni veitalanoataka na rarama e vuravura kevaka o na sega ni tukuna baleta na Rarama ni Vuravura, Jisu Karisito. Na vakaraitaki ni nona loloma na Tamada Vakalomalagi o ira kece era lako mai ena bula oqo e vakakalougataki tu ena nona rarama o Karisito ka na vukei keda me lesu bula tale ivale.A vakavulica o Peresitedi Packer: “Na Yaloi Karisito e tu vata tu ga kei keda. … Na Rarama i Karisito e sa rarama ni matasiga vakataki koya e vuravura. Na vanua cava ga e bula kina na tamata, ena tiko kina na Yalo i Karisito.”13 Na Rarama i Karisito e sureti keda meda caka vinaka ena vei gauna”14 ka vakarautaki keda kece ena noda vakasaqara na vinaka kei na dina ni noda ciqoma na Yalo Tabu.
Na noda iVakabula e vakavulica vei keda ni o Koya na rarama e “vakararamataka na matamu,” “sa vakabulabulataka na nomu kila ka,” ka “ sa solia na bula ki na ka kece ga.”15 Na Rarama i Karisito ena vukei keda meda raica ira na tani ena matana na noda iVakabula. Eda na loloma ka veiciqomi vakalevu cake ena vukuni dredre era sotava na tani. Ena vukei keda meda vosoti ira vakadede o ira era sega ni sokalou se veiqaravi vakai keda. Ena vukei keda meda kila vakavinaka na ituvatuva levu ni marau ka da na keda isema ena ituvatuva levu ni loloma oqo. E solia na bula, vakaibalebale, ka vaka inaki veikeda ena ka eda cakava. Io, ena delani marau ena lako mai vei keda ena gauna eda ciqoma kina na Rarama i Karisito, ena sega ni tautauvata kei na reki eda na vakila ena gauna eda raica kina na Rarama i Karisito na gauna e cakacaka kina vei ira na noda vuvale kei ira na noda itokani kei ira na tamata eda sega tu ni kila.
Au vakila na reki oqori ena gauna au rogoca kina me baleti ira na ilala daubokobuka ena nodra saga mera bokoca na kena kama voli e dua na valenisoqoni ni iteki mai na Ceva kei California ena vula o Julai ena yabaki, 2015. Ena gauna sa tete totolo na kama, na nodra iliuliu a qirita e dua na nona itokani YDE ka taroga vei koya na vanua cava e maroroi tu kina na iyaya tabu kei na bilo ni sakaramede me rawa ni ra taqomaka. E a qai vakaraitaka vua na nona itokani ni sega tu na yaya ni qaravi kalou kei na bilo ni sakaramede e rawarawa na kena sosomi taki. Ia na nodra iliuliu e sega ni vakacegu ka nanuma me dua na ka mera cakava, a tala tale e vica na daubokobuka mera lesu tale ena lomani vale kama ka kaya veiira mera maroroya mai na itaba kece nei Karisito e lili tu ena lalaga ka rawa ni ra maroroya mai. E ra vakaliliga talega e dua e lomani nodra lori ni bokobuka ena nodra vakasama me ra bau karoni voli kina o ira na dau bokobuka. A tarai au vakalevu na nona yalololoma na liuliu ni bokobuka kei na vinaka ni nona vakasama me baleta na rarama, vakabibi ena gauna rerevaki era tu kina oya.
Ia ena vuravura butobuto, na rarama ni Karisito ena uasivi na kena cilavi keda tu me yacova yani na siga totoka koya.
Au tokarua taka na nona vosa o Paula: “Meda dara na sasabai ni rarama.”16 Au vakadinadinataki Karisito. O Koya na Rarama kei Vuravura. Meda vakaukauwataki keda ena rarama e tu voliti keda ena noda vakaitavitaki keda vakalevu ena lotu ka vakayagataka na yavu ni kosipeli vei ira na noda matavule. Meda raica na Rarama i Karisito ena veigauna ena nodra bula na tani ka meda vukei ira me ra raica vakaiira. Na gauna eda ciqoma kina na rarama oya, eda na vakakalougata taki ena kuri ni rarama oqo, me yacova yani na siga totoka koya gauna eda na qai raica kina na Tama ni rarama,”17 na Tamada Vakalomalagi. Au vakadinadinataka ena yacana tabu na Rarama kei Vuravura, o Jisu Karisito, emeni.