Ira na Yalewa Yalodei
O ira na yalewa yalodei oqo era sa tisaipeli yavutaki vua na iVakabula o Jisu Karisito ka nuitaka tiko na yalayala ni Nona solibula veisorovaki.
Kemuni na taciqu lomani, keimami lomani kemuni dina ka vakavinavinakataka na dolei tiko mai ena yalomalumalumu kei na maqusa na nodratou veisureti na Mataveiliutaki Taumada kei na sasaga ni #AuAVulagi. Yalovinaka ni masu tiko ga, ka vakarorogo tiko ki na domo lailai ni Yalo, ka cakacakataka na veivakauqeti ko ni sa ciqoma.
Niu dau gole yani ena noda vanua se ena veiyasai vuravura, e sega niu kurabui ni dua e taro mai, “Ko ni kilai au beka?” Baleta, ni tu noqu malumalumu, au kaya eke niu dau sega ni nanuma rawa na yacadra eso. Ia, au nanuma tiko ga na loloma dina sa tu vua na Tamada Vakalomalagi sa vakatara meu vakila niu sotavi ira na Luvena yalewa kei na tagane talei.
Dua na gauna sa oti au a laki sikova eso na marama daulomani e valeniveivesu. Ni keimami sa veivakamocetaki ena loloma, a kaya mai e dua na marama lomani, “Sister Burton, yalovinaka ni kua ni guilecavi keimami.” Au nuitaka ni o koya kei na so era vinakata me ra kua ni guilecavi era na vakila dina niu mai wasea eso na itukutuku vei kemuni.
Ira na Yalewa Yalodei ena Gauna ni iVakabula: Era Yavutaki vua na iVakabula o Jisu Karisito
O ira na noda marama ni veitabayabaki era sa vakaraitaka tiko na iwalewale yalodina ni bula vakatisaipeli eda sa sasagataka tale tikoga. “Eda wilika ena Veiyalayalati Vou na kedra italanoa na yalewa [yalodei] eso, vakayacani kei ira e sega ni kilai na yacadra, ka ra vakabauti Jisu Karisito, era vulica ka bulataka na Nona ivakavuvuli, vakadinadinataka na Nona cakacaka, cakamana, kei na itutu vakatui. O ira na yalewa oqori era a ivakaraitaki ni tisaipeli ka ivakadinadina bula ni cakacaka ni veivakabulai.”1
Raica mada na itukutuku oqo ena ivola nei Luke. iMatai, ena gauna ni nona cakacaka vakalotu na iVakabula:
“Sa oti … sa qai lako voli e muri ko koya [Jisu] ena veikoro kecega kei na veikoro lalai kecega, ka vunau, ka tukuna na itukutuku vinaka ni matanitu ni Kalou: kei ira vata kaya na lewe tinikarua,
“Kei na yalewa eso, ko Meri sa vakatokai na yalewa ni Makitala, … kei Joana … , kei Susana, ka lewevuqa tale, era sa qaravi koya.”2
Tarava, ni oti na Nona Tucaketale:
“Ka so talega na yalewa … ni ratou sa lako ki nai bulubulu;
“… Ia ni ratou sa sega ni kunea na yagona, e ratou sa lako mai ka tukuna, ni ratou … a raica eso na agilosi sa sikavotu vei iratou, ka kaya sa bula ko koya.”3
Au sa wilika ka vakaraitaka na ivakamacala sega ni qoroi ni “yalewa eso” ena veigauna sa oti, ia walega oqo au mai vakasamataka tiko vakavinaka sara, sa vaka me bula mai na vosa oqo. Raica mada na vakatauvatataki ni ibalebale ni vosa yalodei ni semati kivei ira na yalewa yalodei yalodina: “vakauqeti,” “tudonu” “nuidei” “tudei” “dina” ”vakadeitaki” kei na “nuitaki.”4
Niu vakasamataka vakatitobu na ibalebale ni vosa eso oqori, au nanuma kina e rua vei ira na yalewa yalodei ena Veiyalayalati Vou era a tukuna tudonu, nuidei, tudei, na ivakadinadina vakadeitaki ni iVakabula. Dina ga, ni ra vakataki keda, era yalewa malumalumu, ia na nodra ivakadinadina e veivakauqeti.
Nanuma na yalewa ka sega ni kilai na yacana ena tobu ni wai a sureti ira eso me ra mai raica na veika sa vulica mai vua na iVakabula? A cavuta na nona ivakadinadina ena yalodei ena nona taroga “Sai koya oqo na Karisito se segai?”5 Na nona ivakadinadina kei na veisureti a veivakauqeti dina ka “le vuqa … era sa vakabauti koya.”6
Ni sa mai mate na ganena, o Lasarusa—a kaya kina o Marica, na tisaipeli lomani ka itokani ni Turaga, ena yalo luluvu levu, “Kemuni na Turaga, kevaka ko ni a tiko eke sa sega ni ciba na ganequ.” Vakasamataka na nona yalodei ena nona kaya, “Ia kau sa kila, ena solia vei kemuni edaidai na Kalou na ka kecega ko ni sa kerea vua na Kalou.” A vakadeitaka tale, “Au sa vakadinata ni sa Karisito koi kemuni, na Luve ni Kalou, ko koya sa dodonu me lako mai ki vuravura.”7
Eda vulica mai vei ira na tacida oqo ni o ira na yalewa yalodei era sa tisaipeli yavutaki vua na iVakabula o Jisu Karisito ka nuitaka tiko na yalayala ni Nona solibula Veisorovaki.
Yalewa Yalodei-Daumaroroya na Veiyalayalati ni Tabagauna ni Vakalesuimai: Sa Lomadra me ra Solibula
Ena gauna makawa, era solibula na yalewa yalodei ni ra vakadinadinataka ka bulataka na ivakavuvuli i Jisu. O ira na yalewa yalodei ena itekitekivu ni Vakalesuimai era a vakayacora talega oqo. A maliwai ira talega na curuvou ena lotu o Drusilla Hendricks kei na nona matavuvale, ka sotava vakakina na nodra vakacacani na Yalododonu mai Clay County Missouri. A paralase vakadua o turaga watina ena iValu ena Ucuiwai na Crooked. Sa qai mai qaravi koya tu ka vakakina na nona matavuvale.
“Ena dua na gauna ni lomaocaoca, ni sa sega tu na kedratou kakana, a nanuma kina o Drusilla ni tukuna vua e dua na domo, ‘Wawa, ni na vakarautaka mai na Turaga.’”
Ni sa gadrevi vei luvena tagane me volodia ki na Mataivalu ni Momani, taumada a besetaka o Drusilla ka masu vagumatua vua na Tamada Vakalomalagi me yacova “ni sa vaka e tukuna mai vua e dua na domo, ‘O vinakata beka na lagilagi cecere duadua?’ A kaya yani o koya, ‘Io,’ ka voqa tale mai na domo, ‘O na rawata beka vakacava na kena isau vakavo ga ena solibula cecere?’”8
Eda vulica mai vei ira na yalewa yalodei oqo ni maroroi ni veiyalayalati ena gadrevi kina meda lomadina ena solibula.
Yalewa Yalodei Nikua: Nanuma ka Vakavakarau me ra Marautaka na Nona Lesu mai
Au a vakamacalataki ira na marama yalodei ena gauna ni iVakabula kei na itekitekivu ni Vakalesuimai ni kosipeli, ia vakacava beka na nodra ivakaraitaki ni bula vakatisaipeli kei na nodra ivakadinadina na marama yalodei ena noda gauna oqo?
Ena dua na noqu ilesilesi wale ga oqo i Esia, au a vakauqeti tale mai na vuqa na yalewa yalodei au a sotavi ira. Au a taleitaki ira sara na imatai ni itabatamata lewenilotu mai Idia, Malesia, kei Idonisia, era saga tiko me ra bulataka na ivakarau ni kosipeli ena nodra itikotiko, so na gauna e cecere nodra solibula ni bulataki na kosipeli e dau veisaqasaqa kei na ivakarau makawa ni matavuvale kei na vanua. O ira na veitabatamata ni yalewa yalodei au a sotava e Hong Kong kei Taiwan era tomana tiko na nodra vakalougatataki ira nodra matavuvale, lewe ni Lotu, kei na itikotiko raraba ena nodra tudei tikoga vua na iVakabula ka lomadra dina me ra solibula ki na nodra veiyalayalati. Era kune talega na yalewa yalodei vakaoqo ena Lotu ena veiyasai vuravura.
E dua tale na yalewa yalodei a vakalougatataka na noqu bula ena vuqa na yabaki e sasaga bula tiko ena 15 na yabaki sa oti mai na mate veivakalolomataki, dredre, ka levu cake tikoga e vakatokai na inclusion body myositis. Dina ga ni dabe tikoga ena wilijea, sa dau saga me vakavinavinaka tiko ka tomana tikoga na “Lisi ni Au Rawa”—e dua na lisi ni ka e rawa ni cakava, me vaka na au rawa ni cegu, au rawa ni tilo, au rawa ni masu, kei na au rawa ni vakila na loloma ni iVakabula. Sa dau cavuta na nona ivakadinadina yalodei yavutaki vei Karisito vei ira na matavuvale kei na itokani ena veisiga.
Au a rogoca wale ga oqo na italanoa kei Jenny. Se qai lesu ga mai na kaulotu ka rau a veibiu na nona itubutubu ni se kaulotu tiko. E a tukuna o koya ni vakasama me baleta na lesu ki vale “sa rui ka rerevaki sara [vua]”Ni sa mai cava tiko na nona kaulotu mai Itali, a laki cegu vakalailai ena vale ni kaulotu me qai gole yani ki Amerika, e dua na yalewa yalodei na wati peresitedi ni kaulotu a mai tokoni koya tiko ni a barasitaka wale toka ga na uluna.
Ni oti e vica na yabaki, e dua tale na yalewa yalodei o Terry—e peresitedi ni iSoqosoqo ni Veivukei ni iteki ka tisaipeli i Jisu Karisito—a vakalougatataka na bula nei Jenny ena gauna a kacivi kina o Jenny me peresitedi ni iSoqosoqo ni Veivukei ni tabanalevu. Ena gauna o ya, a cakacakataka tiko o Jenny na nona ivola vakarautaki ki na nona koroi ni vuku vakavuniwai. A sega wale ga ni veituberi vakailiuliu o Terry vei Jenny, ia a dabe vata tiko kei koya me 10 na auwa e valenibula ni sa tukuni vei Jenny ni sa tauvi koya tiko na kenisa ni dra. A veisiko yani e valenibula o Terry ka draivataki Jenny me laki vakadikevi. A vakatusa o Jenny, “Au vakabauta niu a lualua vakavica ena nona motoka.”
Dina ni tauvimate, a tomana tiko ga o Jenny ena qaqa na nona ilesilesi vakaperesitedi ni iSoqosoqo ni Veivukei ena tabanalevu. Ena gauna mada ni nona rarawa, a veiqiriyaki ka vakau itukutuku kei na imeli mai na nona idavodavo, ka sureti ira na marama me ra mai raici koya. A vakau kadi ena meli kei na ivola vei ira eso, ka lomani ira tiko ga mai ni tu mai vakayawa. Ni ra sa kerea na tabanalevu e dua na nona itaba ni mataveiliutaki me itukutuku maroroi ni tabanalevu, oqo na ka era a ciqoma. Baleta ni o Jenny e dua na yalewa yalodei, a sureti ira kece me ra wasea na nodra dui icolacola, oka kina na nona.
Me vaka ni yalewa yalodei a kaya kina o Jenny: “E sega walega ni da mai veivukei ia meda mai vakabulai keda. Na veivakabulai o ya ena yaco ga keda duavata kei Jisu Karisito; ena noda kila vinaka na Nona loloma soliwale kei na Nona Veisorovaki kei na Yalona dauloloma vei ira na yalewa ena Lotu. Ena mana oqo ena veika rawarawa wale me vaka na seruti ni ulu, vakau itukutuku e veivakauqeti, matata, ivakatakila baleta na inuinui kei na loloma soliwale; se vakadonuya me ra qaravi keda o ira na marama.”9
Kemuni na marama, ni yaco mai na veilecayaki, vakatitiqa, yalolailai, valavala ca, rarawa, se lomolomora ni yalo, sa rawa meda ciqoma na veisureti ni Turaga meda gunu mai ena Nona wai ni bula me vakataki koya na yalewa yalodei ena tobu ni wai, ena nona sureti ira eso me ra mai cakava tale ga ni da mai vakaraitaka tale ga na noda ivakadinadina yalodei: “Sai koya oqo na Karisito se segai?”
Ni sa vaka me sega ni dodonu na bula, me vaka a yaco vei Marica ni sa mate o ganena—ni da sotava na mosi rarawa ni galili, sega ni vakaluveni, yali ni noda lomani, sega na madigi ni vakamau kei na matavuvale, matavuvale kavoro, lomaocaoca bibi, mate vakayago se vakasama, veilecayaki ni vakasama, mosi ni vakanananu, vakatotogani, leqa vakailavo, se tubu ni dra se leqa tale eso—meda sa qai nanumi Marica ka cavuta na noda ivakadinadina ena yalodei: “Au sa kila … [ka] vakabauta ni sa Karisito koi kemuni, na Luve ni Kalou.”
Meda sa qai nanuma tiko ni vuqa na yalewa yalodei era sega ni via biuta na iVakabula talei ena gauna ni Nona mosi levu a sotava ena kauveilatai ia ni oti e vica na auwa, a nodra na madigi talei me ra isevu ni ivakadinadina yalodei ni lagilagi ni Nona Tucaketale. Meda sa qai kunei ni da tiko voleka vua ena masu kei na vulici ni ivolanikalou. Meda sa qai toro voleka yani Vua ena kena vakarautaki ka votai ena ivakatakilakila tabu ni Nona solibula veisorovaki ena gauna ni cakacaka vakalotu ni sakaramede ni da maroroya na veiyalayalati ena noda qaravi ira na tamata ena nodra gauna ni leqa. Sa qai rairai meda sa tiki ni nodra marautaka na yalewa yalodei, tisaipeli i Jisu Karisito, na lagilagi ni Nona lesu mai.
Kemuni na marama, au vakadinadinataka na nodrau loloma na iTubutubu Vakalomalagi; noda iVakabula, o Jisu Karisito; kei na Nona Veisorovaki tawayalani ena vukuda. Au kila ni Parofita o Josefa Simici a lesi taumada tu mai me parofita ni Vakalesuimai. Au kila ni iVola i Momani e dina ka a vakadewataki ena kaukauwa ni Kalou. Eda sa vakalougatataki mai vua e dua na parofita bula ena gauna oqo, o ya o Peresitedi Thomas S. Monson. Au yalodei ena veika dina oqo! Ena yacai Jisu Karisito, emeni.
Me kilai: Ena i 1 ni Epereli, 2017, e sa vagalalataki kina o Sister Burton ena ilesilesi vaka Peresitedi Raraba ni Soqosoqo ni Veivukei.