Vakararavi vua na Kalou ka Sega ni Veivukiyaki
Kevaka eda sa tudei tikoga ka sega ni veivukiyaki na noda vakabauta, ena vakalevutaka na Turaga na noda igu meda laveti keda cake mai na ibolebole ni bula oqo.
Kemuni na taciqu kei na ganequ, au gadreva meu tekivutaka na noqu itukutuku nikua niu vakadinadinataka ni o Peresitedi Thomas S. Monson e Parofita ni Kalou ena noda gauna oqo. Sa vakakina oi rau na nona daunivakasala ena Mataveiliutaki Taumada kei ira na iApositolo Le Tinikarua era sa parofita, daurairai, ka dauvakatakila tale ga. Era sa matataka na Turaga o Jisu Karisito ka sa nodra dodonu me ra vakaraitaka na Nona lewa kei na lomana me vaka sa vakaraitaki vei ira. Au vakadinadinataka ni da na taqomaki ni da muria na nodra ivakasala. Sa vakauqeti ira tiko na Turaga me ra vakamatatataka tiko vei keda me da vaqaqacotaka na noda vakabauta na Tamada Vakalomalagi kei na Luvena, o Jisu Karisito, kei na Nona Veisorovaki me da kakua kina ni veivukiyaki ni da sotava na bolebole ni noda veisiga oqo.
Eda wilika ena iVola i Momani na italanoa ni dua na tagane o Amoni a talai mai na vanua o Saraemala ki na vanua i Liai-Nifai me laki tarogi iratou na tacidra. E kea a raica kina naTui o Limiai kei ira na nona tamata, era a tiko vakavesu vei ira na Leimanaiti. E a vakauqeti na Tui o Limiai ena veika a wasea vei koya o Amoni me baleti ira na nona tamata e Saraemala. A vakasinaiti na yalona na Tui o Limiai ena vakanuinui cecere kei na reki ka vakasokomuni ira mai na nona tamata ki na valetabu ka kaya:
“O koya mo ni laveta cake na ulumuni, ka ia na marau, ka vakararavi vua na Kalou. …
“…Ia kevaka ko ni na vuki vua na Turaga ena lomamuni taucoko, ka vakararavi Vua, ka qaravi Koya ena nomuni vakasama taucoko, kevaka ko ni sa kitaka oqo, ena sereki kemuni ko Koya mai na veivakabobulataki me vaka na nona lewa kei na nona gagadre.”1
E a vakaukauwataki sara na nodra vakabauta na tamata i Limiai na Tui ena vosa i Amoni ka mai vakavuna na nodra veiyalayalati kina kei na Kalou me ra sa na qaravi Koya ka muria na Nona ivakaro, se cava ga na ituvaki dredre era sotava. Ena vuku ni nodra vakabauta, era a vakarautaka kina e dua na ivadi ka ra dro rawa kina mai na ligadra na Leimanaiti.2
Kemuni na taciqu kei na ganequ, yalovinaka ni vakasamataka mada na bibi ni veisureti a cakava na Tui o Limiai kei na kena ibalebale vei keda. A kaya o koya: “O koya mo ni laveta cake na ulumuni, ka ia na marau, ka vakararavi vua na Kalou.” Ena vosa oqo, a sureti ira na nona tamata na Tui o Limiai me ra raica na siga nikua kei na veisiga ni mataka ena rai ni vakabauta; ka veisosomitaka na nodra rere ,ena kakavaki ni inuinui vakasucumi mai na vakabauta; ka kakua ni veivukiyaki ni ra sa vakararavi tiko vua na Kalou se cava ga na kedra ituvaki.
Na bula oqo sa gauna ni vakatovolei, e gauna tale ga me da na vakaraitaka ka vakadinata ke rawa ni da na cakava na ka kece ga sa vakaroti keda kina na Turaga na noda Kalou.3 Oqo ena gadrevi kina na vakabauta e sega ni veivukiyaki vei Jisu Karisito ena gauna mada ga ni veidredre lelevu. Sa na gadrevi kina meda toso tikoga ki liu ni tudei tu noda vakabauti Karisito, ka liutaki tiko ena Yalo, ka vakararavi tiko vua na Kalou ni na vakarautaka na veika eda gadreva.4
Ni sa mai cava tiko na Nona cakacaka vakalotu e vuravura, ni vo toka vakalailai me kau vakavesu kina, a vakavulici ira na Nona tisaipeli na iVakabula: “Dou na kunea e vuravura na rarawa; ia mo dou vakacegu; au sa vakamalumalumutaki vuravura.”5
Me da vakasamataka mada vakatitobu—ni o Jisu Karisito, na Luvena e Duabau Ga na Tamada, a mai bulataka e dua na bula e sega ni cala ka vorata rawa na veitemaki, mosi, ibolebole, kei na veika rarawa ni vuravura oqo. A tiri mai vua na dra mai Kecisemani; ka sotava na mosi vakaitamera e sega ni vakamacalataki rawa. A colata Vua na noda rarawa kei na tauvimate kece. Sa tu vakarau o Koya me veivuke—vukei keda yadua—ena noda oca kecega. Ena Nona bula taucoko, rarawa, mate, kei na Tucaketale, a vagalalataka na veika malumalumu kecega me da bula reki ka kune vakacegu ena vuravura oqo. Na mana ni Nona Veisorovaki sa soli vei ira kece era sa guilecavi ira ga ka ciqomi Koya kei ira era sa taura na Nona kauveilatai ka muri Koya me ra Nona tisaipeli dina.6 O koya gona, ni da sa vakabauti Jisu Karisito kei na Nona Veisorovaki, eda na vaqaqacotaki, ena mamada na noda icolacola, ka yaco meda vorati vuravura rawa ena Vukuna.
Kemuni na taciqu kei na ganequ, ni da vakasamataka na kaukauwa kei na inuinui eda rawa ni ciqoma mai vua na iVakabula, e tiko na inaki me da laveta cake na uluda, reki, ka toso tiko ga ena vakabauta ka sega ni vakatitiqa, “ko koya sa vakatitiqa, sa vaka na ua ni waitui, sa cagina e na cagi ka veitubuyaki. … … A tamata lomalomarua, sa yamekemeke e na nona ivalavala kecega.”7
A veivakasalataki tale ga kina na Tui o Limiai, “Ka vakararavi Vua, ka qaravi Koya ena nomuni vakasama taucoko, kevaka ko ni sa kitaka oqo, ena sereki kemuni ko Koya mai na veivakabobulataki me vaka na nona lewa kei na nona gagadre.”8
Rogoca na vosa ni vakamasuti keda na iVakabula:
“Me kakua ni rarawa na lomamudou: dou sa vakabauta na Kalou, dou vakabauti au talega. …
“Kevaka dou sa lomani au, dou muria na noqu vunau. …
“Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua.”9
E vakalougatataki keda tiko na Kalou ena noda vakabauta.10 Na vakabauta sa ivurevure ni bula ena inaki sa vakalou kei na kena vakanananu tawamudu. Na ivakavuvuli ni vakabauta e cakacakataki e vakauqeta na gumatua. Sa dua na kaukauwa bibi, ka bula sa matanataki tiko ena noda vakasama dodonu kei na gagadre me sa lomada dina meda cakava na veika kecega e kerea na Kalou kei Jisu Karisito vei keda. Ena muataki keda meda tekiduru ka masuta na Turaga meda dusimaki ka tucake yani ka cakacakataka ena nuidei me rawati na veika sa vaka na Nona lewa.
Vica na yabaki sa oti niu a se peresitedi kina ni kaulotu, a qiriti au mai na itubutubu ni dua na daukaulotu lomani ka kaya mai ni sa mate o ganena. Au nanuma lesu, na vakaciriloloma ni gauna o ya, neirau a veivosakitaka kei koya na daukaulotu oqo na ituvatuva lagilagi ni veivakabulai ni Kalou me baleti ira na luvena ka a vakacegui koya ni sa kila tu na ka oqo.
Dina ga ni a kurabui sara ka rarawa ena leqa o ya, ia o daukaulotu oqo—a tagi ka vakabauta tiko na Kalou kei na Nona ituvatuva cecere ni bula marau—sa marautaka na bula nei ganena. A vakaraitaka o koya na nuidei ka sega ni vakatitiqa ena nona loloma na Turaga. A kaya kina vei au, ni sa vakadeitaka ni na tomana tikoga na nona kaulotu ena vakabauta kei na gugumatua kecega me rawa ni kilikili kaya ki na yalayala ni Kalou vua kei na nona matavuvale. Ena gauna ni gagadre vakaoqo, a vagolea na yalona vua na Kalou o daukaulotu me vakararavi vakatabakidua Vua, ka vakavouia nona yalayala me qaravi Koya ena gugumatua kecega.
Kevaka eda na sega ni yavutaki ena vakararavi tudei vua na Kalou ka gadreva meda qaravi Koya ena gugumatua kecega, sa na rawa me muataki keda na rarawa ni bula oqo meda vakila ni sa tara bi mai na noda icolacola bibi; ka na rawa meda vakayalia na uqeti ni yalo meda bulataka vakataucoko na kosipeli. Ni sega na vakabauta, eda na laki vakayalia na yalo meda marautaka kina na ibulibuli ni Kalou me baleta na veika ena rawa me yaco ki na noda bula ena veisiga ni mataka.11
Ena veigauna veivakatovolei vakaoqo, ena tovolea tiko o vu-ni-meca——ka sa vakairovi keda tiko—me saga me vakayagataka na noda vakasama dina kei na inaki me valuti keda kina. Ena tovolea me vakauqeti keda ni sa tawayaga meda bulataka na ivakavuvuli ni kosipeli. Kemuni na taciqu kei na ganequ, yalovinaka mo ni nanuma tiko ni vakasama dina ni tamata vakayago “sa sega ni vakabauta na veika ni Yalo ni Kalou: ni sa ka lialia vua.”12 Mo ni nanuma tiko ni ko Setani “sa meca [ni] Kalou na tevoro ka sa veivala tiko ga kei koya, ka sa veisureti ka veivakayarayarataki [vei keda] ki na ivalavala ca, ka me vakayacori tiko ga na ka ca.”13 Meda sa tarovi koya me kakua ni lawakitaki keda; ni da vakatarai koya, eda na lutu ena noda vakabauta ka vakayalia na kaukauwa meda taura kina na veivakalougatataki ni Kalou.
Kevaka eda sa tudei tikoga ka sega ni veivukiyaki na noda vakabauta, ena vakalevutaka na Turaga na noda igu meda laveti keda cake mai na ibolebole ni bula oqo. Eda sa qai rawa ni vakamalumalumutaka na lewa vakatani ka da na taracake na igu meda uabaleta yani, na veika mada ga e matanataka mai na veivakataotaki lelevu. Oqo na ka a rawa kina vei ira na tamata i Limiai na Tui me ra dro bula rawa mai na nodra veivesuki tiko na Leimani.
Kemuni na taciqu kei na ganequ, au sureti kemuni mo ni vakararavi vua na Kalou kei na nodra vakavuvuli na Nona parofita. Au sa veisureti tiko mo ni vakavouia na nomuni veiyalayalati vua na Kalou, mo ni qaravi Koya ena yalomuni taucoko, se cava ga na veimedreyaki ni ituvaki ni bula oqo. Au vakadinadinataka ni kaukauwa ni nomuni vakabauta na Karisito sa sega ni veivukiyaki, ko ni na sereki mai na ivesu ni ivalavala ca, vakatitiqa, sega ni vakabauta, rarawa, mosi, ka yaco mo ciqoma taucoko kina na veivakalougatataki sa yalataki tu mai vua na Tamada dauloloma.
Au vakadinadinataka ni bula dina tiko na Kalou. Ni sa bula tiko o Koya. E lomani keda o Koya. Sa dau rogoca na noda masu ni da marau tiko kei na gauna ni noda vakatitiqa, rarawa, kei na nuiqawaqawa. Au vakadinadinataka ni o Jisu Karisito na iVakabula kei vuravura. O Koya na noda Dauveivueti.
Au mai tinia na noqu vosa nikua ena qaqani sere ni lotu “Not Now but in the Coming Years,” e tiko ena serenilotu vaka-Potukali:
Ke vakaruguya na yaloda na o ka sega ni matanisiga,
Ke vakamavoataki keimami na rarawa, veitalia ga; keimami na kila ga o cei koi Kemuni.
Sa dusimaki keda o Jisu ena Ligana, ka na tukuna vei keda na vuna;
Keda rogoca na domona, ena vosa tikoga mai vei keda o Koya.
Vakararavi ga vua na Kalou ka sega ni veivukiyaki, ka laiva me tokoni keda;
Lagata Nona lagilagi me tawamudu, ni na qai tukuna ga mai o Koya.14
Au tukuna na veika oqo ena yaca tabu i Jisu Karisito, emeni.