Meda sa Liutaki Tu;
Ni sa Nona itavi vakalou na Yalo Tabu me uqeta, vakadinadina, veivakavulici ka veivakauqeti vei keda , meda lako ena rarama ni Turaga.
Taciqu kei na ganequ, o au, me vakataki kemuni eda sa raica ni sa kusai dina tiko na cakacaka ni Turaga mai vei Peresitedi Thomas S. Monson kei na nona itukutuku ena mataka nikua. Peresitedi Monson keimami lomani kemuni, tokoni kemuni, ka dau masulaki kemuni tikoga na “neimami parofita lomani.”1
Eda sa vakila na veilumuti ni Yalo ena mua ni macawa oqo. Se ko ni tiko eke ena loma ni olo levu oqo se sarasara tiko mai vale se soqoni vata tiko ena dua na valenilotu mai na dua na vanua vakayawa sara sa nomuni na madigi mo ni vakila na Yalo ni Turaga. Na Yalo o ya sa vakadeitaka ki yalomuni kei na nomuni vakasama na dina ka sa vakatavuvulitaki ena koniferedi oqo.
Vakasamataka toka na qaqa ni serenilotu kilai levu oqo.
Mai na ivakatakila ni gauna oqo eda sa kila ni Lewetolu vakalou e tiko kina na Tamada Vakalomalagi, na Luvena e Duabau ga, o Jisu Karisito, kei na Yalo Tabu. Sa vakalewena ka vakasuina na yago i koya na Tamada ka rawa ni da tara me vaka ga e dua na tamata; sa vakatale ga kina ko koya na Luvena; ia na Yalo Tabu sa sega ni vakalewena se vakasuina na yagona, raica sa Yalo ga ka sa vaka na ibulibuli ni tamata. Kevaka me sega ni vakakina, ena sega ni rawa ni mai tiko e lomada na Yalo Tabu.”3
Na noqu itukutuku nikua sa vakanamata ki na bibi ni Yalo Tabu ena noda bula. Kila vinaka tu na Tamada Vakalomalagi ni da na mai sotava na dredre ena bula oqo, na veivakatovolei kei na veivukiyaki; E kila ni da na sotava na veivukiyaki ni vakatataro e veigauna ni veivakatovolei kei na veimalumalumu e so. Me tiko vei keda na kaukauwa vakayago kei na veituberi vakalou, sa qai vakarautaka o Koya na Yalotabu e dua tale na yaca ni Yalo Tabu
Na Yalo Tabu ena vauci keda vata yani kei na Turaga. Ni sa Nona itavi vakalou me uqeti, vakadinadina, veivakavulici ka veivakauqeti vei keda , meda lako ena rarama ni Turaga. Sa noda itavi bibi meda vulica meda na kila na Nona veivakayarayarataki ena noda bula ka vakayacora vakakina.
Nanuma na yalayala ni Turaga:“Au sa solia vei iko na noqu Yalo Tabu, io ena vakavukui iko ko Koya ka vakasinaita na nomu marau.”4 Au taleitaka na veivakadeitaki o ya. Na reki ka na vakasinaita na yaloda ena kauta mai e dua na vakasama e tawamudu ni vakatauvatani kei na bula e veisiga yadua. Na reki o ya ena salavata mai kei na vakacegu ena loma ni bula dredre kei na mosi ni yalo. Ena vakarautaka na veivakacegui kei na veivakaukauwataki tasereka na dina ni kosipeli ka vakarabailevutaka noda lomana na Turaga kei ira kece sara na luvena. Dina sara ni vakaitamera sara na kena gadrevi na veivakalougatataki vaka o ya na vuravura sa guilecavi ira ka vukitani mai kina.
Ni da laki vakayagataka na sakaramede ena veimacawa eda cakava na veiyalayalati “ni da na dau nanumi koya” na Turaga o Jisu Karisiro kei na Nona Veisirovaki. Na veivakalougatataki yalataki ni kena rokovi na veiyalayalati oqo o ya “me tiko ga kei keda na nona Yalo Tabu.”5
Me da cakava li vakacava?
Matai, eda tovolea meda bula kilikili me tikoga kei keda na Yalo.
Na Yalo Tabu ena salavata ga kei ira era dinata me ra nanuma na Turaga na nodra Kalou ena veisiga.”6 Me vaka sa veivakasalataki kina na Turaga, mo kakua ni domona na iyau vakavuravura, ia mo vakasaqara na iyau e uasivi cake,”7 baleta “na Yalo ni Turaga e sega ni dau mai tiko ena valetabu dukadukali.”8. Meda tovolea meda dau talairawarawa tu ga kina ivunau ni Kalou vulica na vosanikalou, masu, lakova na valetabu, ka bulataka tu ga na ika 3 ni yavu ni vakabauta, “ni sa kilikili meda yalododonu yalodina, talairawarawa, ka … caka vinaka vei ira kecega na tamata.”
Ai Karua, meda tuvakarau meda ciqoma na Yalo.
Sa yalataka na Turaga, “Io, raica, au na tukuna ki na nomu vakasama kei na vu ni yalomu, ena Yalo Tabu, ka na qai lako mai vei iko ia ka na tiko sara ena lomamu.”9 Au sa tekivu meu kila na veika oqo ena noqu itutu vaka daukaulotu gone mai Scotch Plains e New Jersey. Ena dua na mataka katakata ni vula o Jiulai keirau sa qai lokuca kei noqu itokani me keirau sa laki vakaraica mada e dua na dauvakatataro ka soli mai na yacana mai Temple Square “Keirau tukituki ena katuba nei Elwood Schaffer. Vakasukai keirau lesu o Mrs Schaffer ena yalo vinaka.
Ni sa tekivu sogota mai na katuba, au qai vakila meu cakava e dua na ka au se bera vakadua ni cakava ka se bera tale ni cakava me tekivu mai na gauna o ya! Au latia na katuba e yavaqu ka taroga yani, “E tiko tale beka e dua ena rairai via rogoca na neirau itukutuku?” Na luvena goneyalewa yabaki 16 o Marti e via rogoca ka a sa masulaka tiko ena dua na siga yani ki liu. Keitou qai sota kei Marti, ka oti e vica na gauna sa tomani keitou mai o tinana. Erau sa qai curu ruarua ka lewena na Lotu.
Mai na papitaiso nei Marti era qai curu mai kina ena Lotu e lewe 136 na tamata wili kina e levu sara na lewe ni nona matavuvale era sa ia na veiyalayalati ena nodra sa papitaiso. Au vakavinavinakataka niu a vakarorogo ki na Yalo meu latia na katuba e yavaqu ena siga katakata ni vula o Jiulai o ya. Era tiko oqo nikua o Marti kei na vica na lewe ni nona matavuvale.
iKatolu, E dodonu meda kidava na Yalo ni sa yaco mai.
Mai na veika au sa sotava au vulica ni Yalo e dau veitaratara ga mai vakawasoma kei keda ena veika eda na vakila. Ko ni vakila ena vosa ka sa matau vei kemuni na rogoca, ka na vakaibalebale vei kemuni, ka veivakauqeti. Vakasamataka nodra sausaumi lesu na Nifai ni ra vakarogoca tiko na Turaga ni masulaki ira: Era sa rogoca ga ka vakadinadinataka ko ira na lewevuqa; a sa cilavi na lomadra ka ra sa kila e lomadra na vosa sa cavuta ena nona masu.”10 Era vakila e yalodra na qaqa ni Nona masu. Na domo ni Yalo Tabu e vakamalua ka malumu.
Ena Veiyalayalati Makawa e a veileti kina o Ilaijia kei ira na bete nei Peali. O ira na bete era namaka ni rorogo ni domo i Peali mena lako sobu mai me vaka na kurukuru ka vakawaqa na nodra isoro ena bukawaqa. Ia a sega saraga na rorogo ni domo ka sega talega na bukawaqa.11
Dua tale na gauna e muri qai masu o Ilaijia. “Ka raica sa lako voli ko Jiova, a sa dua na cagi levu ka kaukauwa sa sea na veiulunivanua, a sa vorolaka na veiuluvatu e na mata i Jiova; ia sa segai ena cagi ko Jiova: ni sa oti na cagi, sa qai tavuki na vanua; ia sa segai ena tavuki ni vanua ko Jiova:
“Sa oti na tavuki ni vanua, sa qai dua na bukawaqa; ka sa segai ena bukawaqa ko Jiova: ia sa oti na bukawaqa, sa qai rogo mai e dua na domo lailai.” (12
“O kila beka na domo o ya?”
Vakavuvulitaka o Peresitedi Monson, “ni lakova na ilakolako ni bula oqo meda vulica na ivosavosa ni Yalo.”13 Ena vosa mai na Yalo ena vosa eda na vakila. Na veika e vakilai oqo ena malumu ena veivotoki meda yavalati kina meda cakacaka meda tukuna e dua na ka, meda sausaumi lesu kina ena ka meda cakava. Kevaka meda vakamamadataka se vakawalena na noda qaravi kalou, ka laiva meda dreti laivi kina veika vakavuravura, eda na raica ni da sa na malumalumu sara ena noda saga meda na vakila. A kaya kina o Nifai vei Leimani kei Lemueli, “Drau sa dau rogoca na domona, ka sa vosa vei kemudrau ena domo lailai, ia drau sa sega ni vakila na nona vosa ni drau sa yalo butobuto.”14
Au a lako tu ena dua na ileilesi ki na Ceva kei Amerika ena vula o June sa oti. Keitou lako ena dua na ituvatuva osooso sara ni 10 na siga ni veisiko ki Colombia, Peru, kei Ecuador. Dua na uneune kaukauwa e a vakamatea e vica vata na drau na tamata ka vakamavoataka e udolu vaka udolu vakacacana ka basuraka na veivalevale e Ecuador ena kena siti e rua o Portoviejo kei MantaAu vakauqeti me keitou sikovi ira talega na lewenilotu era bula tu ena koro lelevu oqori. Ni sa vakacacani tu na gaunisala keitou sega ni vakadeitaka ni keitou na rawa ni yaco ki kea. Kena dina ga ni a sa tukuni vei keitou ni na sega ni rawa ni keitou yaco ki kea, ia na veivakauqeti e sega ni rawa ni lako laivi. Ia e qai yaco, keitou a vakalougatataki ka sikova rawa na siti ruarua.
Ni lekaleka vaka o ya na kena vakadewataki na itukutuku ni soqoni ena rawa ni lailai sara na iwiliwili ni matabete era na yaco mai kina. Ia, ni keitou yaco yani ki na veivalenilotu ni iteki keitou raica ni ra sinai vakadua mai liu me yacova sara na tavata e muri. Eso era iliuliu nuitaki sara ga ni iwase ni vanua o ya, o ira na painia ka ra a kukuva matua toka na Lotu, ka vakauqeti ira eso tale me ra mai duavata kei ira ena sokalou ka vakila na Yalo e tu ena nodra bula. Era dabe sara tu ga e liu na lewenilotu ka ra vakayalia na wekadra ena uneune o ya Au a vakauqeti meu solia e kea e dua na veivakalougatataki vaka iApositolo vei ira era tiko rawa ena soqoni. Dina ga niu tucake sara tu mai liu ia e vaka me sa tara sara tu ga na uludra o ira kece era tu e kea na ligaqu kau vakila ni sa tasoro ga mai na vosa ni Turaga.
Sega walega ni yaco e kea. Au vakila niu vakauqeti meu vosa vei ira me vaka ga e a cakava o Jisu Karisito ena Nona a sikovi ira na tiko mai Amerika Sa keveti ira yadua na gonelalai … ka vakalougatataki ira ka masulaki ira vei Tamana.”15. Keitou a tiko mai Ecuador, ka vakayacora tiko na cakacaka nei Tamada ka sai ira oqo na Luvena.
iKava, me da cakacakataka na imatai ni veivakauqeti.
Dou dau nanuma tale ga na vosa i Nifai: “A sa kauti au yani na Yalo Tabu, ia au sega ni kila rawa tiko yani na ka meu na cakava. Ia,” a kaya, “Au sa lako ga yani.”16
Ka vakakina o keda. E dodonu meda yalodei ena imatai ni veivakauqeti. Ena so na gauna eda dau vakanananu vakabalavu sara ka taroga tale se eda sa vakauqeti dina tiko beka se ka ga ni noda vakanananu. Ni sa tekivu meda vakasama vakarua se mani vakatolu sara na veika eda vakila—ka sa vakakina vei keda kece—eda sa vakalesuya tiko na Yalo, eda sa taroga lesu tale tiko na ivakasala vakalou. Kaya vakaoqo na parofita o Josefa Simici “Kevaka mo vakarorogo kina imatai ni veivakauqeti ko na ciqoma na veika dina vakaciwa mai na vakatini.”17
Dua na ivakasala: kakua ni namaka na vakamakama baleta ni ko a cakava na veivakauqeti ni Yalotabu. Vakasamataka ni ko cakacaka tiko ena veivakauqeti ni “domo malua, ka lailai.
Ena noqu a veiqaravi tu vaka peresitedi ni kaulotu mai na New York City keimami tiko ena dua na valenikana kei na so tale na daukaulotu ena Bronx. Eratou a curu yani e dua na matavuvale gone ka mai dabe volekati keitou. Eratou rairai vaka na koula kina kosipeli. Au vakaraici iratou toka noda daukaulotu ena nodra veitalanoa vata tiko kei au, au qai raica ni ratou sa kana oti na matavuvale ka curu yani ki tuba. Au sa qai kaya, “kemudou na italatala sa dua na lesoni e vulici eke nikua. Dou raica nodratou curu mai ki na valenikana oqo e dua na matavuvale totoka. Na cava e dodonu meda a cakava?
Vosa totolo sara mai e dua vei ira na daukaulotu: “Au a nanuma meu a tucake ka laki vosa vei iratou. Au a vakila niu uqeti ia au sega ni cakava e dua na ka.”
Kemudou na italatala, dodonu meda na cakava e dua na ka ena imatai ni gauna eda vakauqeti kina. Na veiuqeti o a vakila sa ikoya na Yalo Tabu!”
Na imatai ni veivakauqeti sa veiuqeti savavuka mai lagi. Ni ra sa vakadeitaka se vakadinadinataka vei keda, e dodonu meda vakadinadinataka na kedra ituvaki ka kakua ni vakalaiva me siviti iko. Levu sara na gauna sa veivakauqeti sara tikoga na Yalo meda dolele yani vei ira e so era gadreva tu na veivuke vakauasivi o ira na matavuvale se noda itokani “Io … sa kaya vakaoqo na domo lailai, sa rogo yani ka laubasikata na ka kecega,”18 ka dusi keda yani kina madigi e so meda vakavulica na kosipeli ka vakadinadinataka na Veivakalesuimai nei Jisu Karisito ka veivuke yani ka veivueti vei ira na luvena lomani na Kalou
Vakasamataka me ka e vakatokai na imatai ni kena saumi. Ena levu sara na vanua, o ira era dau liu ena kaci ni veivuke sa ira na tabana ni bokobuka, ovisa, tabana vakavuniwai. Era na yaco yani kei na nodra cina kau na kuria eda sa na vakavinavinaka tu ga vei ira. Na sala ni Turaga e sega soti ni dau laurai levu ia ena gadrevi talega kina na totolo. Sa kila tu na Turaga na veika era gadreva na luvena—ka kila o Koya se o cei sa vakarau tu me veivuke. Kevaka meda laiva vua na Turaga me kila ena noda masu ena mataka ni da sa vakarau ena kacivi keda o koya meda veivuke. Kevaka me da sa na veivuke, sa na kacivi keda o Koya ena veigauna kece sara ka na qai raici keda ena ka e kaya o Peresitedi Monson “Na lesilesi mai vua na Turaga.”19 Eda na imatai ni ivurevure ni veivukei vakayalo ni kauta yani na veivukei mai cake.
Kevaka meda na vakanamata tikoga kina veivakauqeti ka na lako mai vei keda eda na tubu ena yalo ni ivakatakila ka na levu na ka eda na ciqoma me da dusimaki kina. Sa kaya na Turaga, “Mo vakarorogo vua na Yalotabu ni na tuberi iko ena sala dodonu.”20
Me da kakua ni vakawalena na kaci ni Turaga me “dou marau ga, niu na liutaki kemudou tiko.”21. Ena liutaki keda yani o Koya ena Yalo Tabu Meda sa na bula volekata tikoga na Yalo, me totolo noda kidava na imatai ni noda vakauqeti, ka kila ni sa lako mai vua na Kalou. Au vakadinadinataka na kaukauwa ni Yalo Tabu me tuberi keda, me taqomaki keda, ka me na tiko vata ga kei keda ena yaca i Jisu Karisito, emeni