Digital Lamang
Nganong Ganahan Kaayo Ko sa Basahon ni Mormon
Ang Basahon ni Mormon mao ang pundasyon sa akong pagpamatuod ug saksi ni Jesukristo.
Gikan sa usa ka pakigpulong nga gihatag sa seminar alang sa bag-o nga mga lider sa misyon niadtong Hunyo 23, 2023.
Gusto nako nga balik-balikon sa pagsulti nga, “Ganahan ko sa Basahon ni Mormon.” Mao kini ang instrumento sa Ginoo sa pagkabig niining ulahing mga adlaw. Ang pagmantala niini mao ang timaan nga ang dugay nang gipanagna nga pagpundok sa Israel nahitabo na karon. Ang Basahon ni Mormon mao ang himan, ang “sanggot,” kon buot ninyo, nga kita “mogalab” gamit ang atong kusog nianang dakong umahan nga “puti ug andam na sa pag-ani.”
Sa ingon, ang Basahon ni Mormon nahimong timaan ug ang pamaagi alang sa pagpundok sa mga katawhan sa pakigsaad sa Ginoo niining kataposang dispensasyon. Sama sa gihulagway ni Presidente Russell M. Nelson “Kini ang basahon nga makatabang sa pag-andam sa kalibotan alang sa Ikaduhang Pag-anhi sa Ginoo.”
Ako labaw pa kaayong mapasalamaton tungod ni Propeta Joseph Smith ug sa iyang walay ikatandi nga nakab-ot sa paghubad ug pagmantala sa Basahon ni Mormon. Ako adunay usa ka pagpamatuod nga nahimo kini niining batan-on, matinud-anon nga sulugoon pinaagi “sa gasa ug gahom sa Dios,” sama sa iyang giingon.
Sa Unsang Paagi ang Basahon ni Mormon Mitabang sa Pagkabig sa mga Tawo
Ang gahom sa Basahon ni Mormon anaa sa pagsaksi sa Balaang Espiritu nga nagauban niini—ang pagsaksi sa Balaang Espiritu nga ang basahon tinuod ug nga kini ang mapugsanon nga ebidensiya sa Pagpahiuli sa ulahing mga adlaw, ang pagsaksi sa Balaang Espiritu sa kamatuoran sa doktrina nga gitudlo niini, ug ang pagsaksi sa Balaang Espiritu nga ang pagpamatuod niini bahin ni Jesukristo tinuod.
Ang Basahon ni Mormon mao ang usa ka gamhanan nga himan sa pagtubag sa mga pangutana sa kalag, sama sa “Nakaila ba ang Dios kanako o nagpakabana ba mahitungod nako?” “Unsa ang katuyoan sa kinabuhi?” “Unsaon man nako nga mahimong mas maayo nga tawo?” “Unsaon nako nga mobati sa pagpasaylo sa Dios?” “Unsay mahitabo human ako mamatay?”
Ang Basahon ni Mormon mopalambo ug mopalig-on sa mga pagtulun-an ug mosaksi sa Biblia kalabot ni Jesukristo. Mamatikdan nato sa hustong paagi nga kini mao ang “Laing Tugon ni Jesukristo,” apan sa daghang paagi, ang Basahon ni Mormon mao ang nag-unang tugon ni Jesukristo.
Ako mismo, wala gayod hingpit nga nakadayeg sa Biblia hangtod nga ako nahimong usa ka tinun-an sa Basahon ni Mormon.
Ang Basahon ni Mormon ug ang lahi nga pagsaksi bahin ni Jesukristo ug sa Iyang misyon nakapahimo sa gipahiuli nga ebanghelyo kon unsa kini. Si Joseph Smith miingon, “Kuhaa ang Basahon ni Mormon ug ang mga pagpadayag, ug asa na man ang atong relihiyon? [Kita walay] relihiyon.”
Ang Akong Pagpamatuod kabahin sa Basahon ni Mormon
Ang Basahon ni Mormon nahimong instrumento sa akong kaugalingon nga pagkakabig. Sa unsang paagi nga kini dili? Kini ang “labing tukma … nga basahon dinhi sa yuta.” Si Jesukristo Mismo mipamatuod nga ang Basahon ni Mormon gihubad sa Iyang direksiyon pinaagi sa Iyang gahom, ug Siya namahayag nga “samtang ang imong Ginoo ug ang imong Dios buhi kini tinuod.”
Ang Basahon ni Mormon mitudlo kanako og daghan sa unsay akong nahibaloan kabahin ni Jesukristo. Kini mao ang pundasyon sa akong pagpamatuod ug pagsaksi Kaniya. Kini nakapaduol kanako ngadto Kaniya. Mao kini ang nag-unang tinubdan sa akong pagsabot sa talagsaong plano sa katubsanan. Mao kini ang basihan sa akong pagpamatuod sa Pagpahiuli.
Pagtuon ug pag-ampo aron mahibaloan nga ang pagsaksi sa Basahon ni Mormon kalabot ni Jesukristo—kinsa Siya ug unsa ang Iyang nahimo ug gipadayon sa paghimo—tinuod. Ako nagbuhat niana, ug ako nakahibalo nga ang pagpamatuod sa Basahon ni Mormon kalabot ni Jesukristo—kon si kinsa Siya, unsa ang Iyang gitudlo, ug unsa ang Iyang nahimo—tinuod. Ako nakabig.