“Gikan sa Pagkatumba ngadto sa Pagkamadaogon,” Alang sa Kalig-on sa mga Kabatan-onan, Hulyo 2024.
Gikan sa Pagkatumba ngadto sa Pagkamadaogon
Kinahanglan nga kamo dili mohunong, bisan pa kon kamo mapakyas. Tuo kanako.
Hulagway gikan sa 2023 Toyota USATF Outdoor Championships niadtong Hulyo 8, 2023, gikan sa USATF
Niadtong 2022 midagan ko sa 3,000-metros nga steeplechase sa Estados Unidos nga national championships. Ang lumba mga pito ug tunga nga pagtuyok libot sa track, ug adunay lima ka kahoy nga mga babag nga kinahanglan nimong ambakon sa matag tuyok, lakip ang usa nga sa atubangan adunay gahong [pit] sa tubig.
Duha na ko ka tuyok sa lumba sa dihang ang lalaki sa akong atubangan nadagma, ug hapit nako siya mabanggaan. Nakahimo ra siya sa pag-ambak sa babag, apan ako wala—natumba ko.
Hinay ang akong pagbarog tungod kay mibati ko nga nawad-an sa pagsalig. Naghunahuna ko, “Mohunong na lang ba ko ug mogawas dinha sa track?” Apan andam ko. Midesisyon na ako daan nga magpadayon ko kon matumba ko, mao nga midagan ko pag-usab. Gusto gihapon nako nga ihatag ang labing maayo nga anaa nako bisan og dili ko makadaog.
Duha pa ka pagtuyok ang akong gibuhat sa wala pa nako maapsan ang lalaki sa luyo sa grupo sa mga tawo nga miapil sa lumba. Sa wala madugay aduna nalay tulo pa ka pagtuyok ang nahabilin ug dayon duha ka pagtuyok na lang. Nagsugod ko sa paghunahuna nga tingali makasulod ko sa unang tulo ka makadaog. Apan sobra na ko kakapoy, ug naapsan na ko og duha ka mga lalaki dihang katunga na lang sa tuyok ang nahabilin. Naa na ko sa ikaupat, apan maayo kaayo ang akong kataposang pag-ambak sa tubig. Ug ako naghunahuna, “Pastilan gyod, tingali makadaog ko niini.”
Samtang nahuman nako ang kataposang 50 ka metro, nakaamgo ko nga makadaog ako. Dili gyod kadto katuohan. Naghunahuna ko, “Wow, modaog ba gyod ko niini karon?” Ug akong nabuhat. Nakadaog ko human nga natumba.
Sa wala madugay, nakaamgo ko nga dunay pipila ka leksiyon nga atong makat-onan gikan sa nahitabo.
1. Pagmapailobon sa Inyong Kaugalingon
Dihang natumba ko, gusto ko nga makaapas sa labing dali kutob sa mahimo. Apan kinahanglan nga kontrolado ug kasarangan ang akong katulin aron dili kaayo ko maluya. Adunay kasulatan nga nag-ingon “Daganon ta nga matinud-anon ang lumba nga atong gisalmotan” (Mga Hebreohanon 12:1). Sa kinabuhi, dili kinahanglan nga molampos kamo dayon. Usahay magkinahanglan kini og panahon.
2. Padayon
Normal lang nga mobati kamo nga gusto na nga moundang usahay. Dihang natumba ko, wala nako magtuo nga ako makadaog, apan mihukom ko nga mopadayon. Kanunay nga adunay paglaom kon kamo matumba—kinahanglan lang nga mobarog kamo ug mosulay pag-usab. Ang Manluluwas motabang kaninyo latas sa inyong mga hagit. Salig ug padayon sa pagbaton og hugot nga pagtuo sa kon unsa ang inyong nahibaloan nga tinuod ug duol sa uban ug pangayo og tabang. Mamaayo ra ang tanan.
3. Salig ni Jesukristo
Wala akoy kaseguroan nga makadaog sa lumba human ako natumba. Apan kon kita mapakyas diha sa ebanghelyo, kon kita makahimo og mga sayop o makasala, kita kanunay makaduol ngadto kang Kristo, sinsero nga maghinulsol, ug mapasaylo. Siya motabang kanato nga makabangon. Kita adunay dako nga potensiyal—ang potensiyal nga mahimong mas maayo,, mobuhat og mas maayo. Bisan kon kita balik-balik nga mapakyas, apan kon kita magpadayon sa paghinulsol ug maningkamot sa pagsunod sa Manluluwas, niana, Siya nagsaad kita makadaog sa lumba sa kinabuhi.