“Inyong Papel diha sa Dakong Buhat sa Ginoo,” Alang sa Kalig-on sa mga Kabatan-onan, Hulyo 2024.
Inyong Papel diha sa Dakong Buhat sa Ginoo
Kon kamo naghigugma, nagpakigbahin, ug nagdapit, inyong giabagan ang Ginoo sa pagtabang sa matag bililhong kalag nga moduol ngadto Kaniya.
Si Kristo Nag-ampo uban sa mga Nephita, ni Casey Childs
Ang atong propeta, si Presidente Russell M. Nelson, mitudlo nga ang dakong pagpundok sa Israel “mao ang labing importante nga buhat nga nahitabo sa yuta karon.” Miingon siya, “Walay laing ikatandi ang kamahinungdanon niini. Walay laing ikatandi ang kaimportante niini. Ang mga misyonaryo sa Ginoo—Iyang mga disipulo—nalambigit diha sa labing dakong hagit, sa labing dakong kawsa, sa labing dakong buhat dinhi sa yuta karon.”
Dili kinahanglan nga i-set apart kamo isip usa ka pangtudlo o pangserbisyo nga misyonaryo aron makaapil niini nga buhat. Ang mga oportunidad anaa bisan asa sa paghigugma, pagpakigbahin, ug pagdapit. Makatabang ka sa uban nga moduol kang Kristo—karon dayon—pinaagi sa pagpakita sa inyong gugma, pagpakigbahin sa inyong mga tinuohan, ug pagdapit kanila sa pag-apil kaninyo aron masinati ang kalipay sa ebanghelyo.
Kamo makahimo sa pagsalmot diha sa dakong buhat sa Ginoo!
Sugdan uban sa Gugma
Didto sa Tanaman sa Getsemani ug sa krus, si Jesukristo midala sa Iyang Kaugalingon sa pagpas-an sa mga sala sa kalibotan ug miantos sa tanang kagul-anan, ug “mga sakit ug mga kasakit, ug mga pagtintal sa matag matang” (Alma 7:11). Kini “nakapahimo [Kaniya], … ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit” (Doktrina ug mga Pakigsaad 19:18). Pinaagi sa Iyang Pag-ula ug Pagkabanhaw, si Jesukristo naghimo sa kaluwasan ug kahimayaan nga posible alang sa tanan.
Ang pagduol ngadto sa Manluluwas ug pagpamalandong sa tanan nga Iyang nabuhat alang kaninyo mopuno sa inyong kasingkasing og gugma alang Kaniya. Himoon Niya dayon ang inyong kasingkasing nga adunay gugma ngadto sa uban. Naghangyo Siya nga inyong higugmaon sila (tan-awa sa Juan 13:34–35) ug sa pagpakigbahin sa Iyang ebanghelyo ngadto kanila (tan-awa sa Mateo 28:19; Marcos 16:15). Mao kini ang Iyang gibuhat sa dihang Siya nagpuyo sa yuta. Siya mipakigbahin sa Iyang kinabuhi ug sa Iyang gugma ug midapit sa tanan sa pagduol ngadto Kaniya.
Kon inyong ipakigbahin ang ebanghelyo, sugdi sa gugma. Samtang kamo motabang sa uban inubanan sa gugma—maghinumdom nga sila imong igsoong mga lalaki ug igsoong mga babaye ug minahal nga mga anak sa imong Langitnong Amahan—ang mga oportunidad magbukas alang kanimo sa pagpakigbahin sa unsay imong nahibaloan nga tinuod.
Matinguhaon nga Moapil ug Mopakigbahin
Walay si bisan kinsa nga mas mapahinungoron sa pagpakigbahin sa ebanghelyo kay ni Presidente M. Russell Ballard (1928–2023). Sa tibuok niyang kinabuhi, siya matinguhaon nga miapil sa pagpakigbahin sa tanan nga ang kahingpitan sa ebanghelyo ni Jesukristo gipahiuli pinaagi ni Propeta Joseph Smith. Kita gidasig niya sa pagbuhat sa ingon.
Si Presidente Ballard mitudlo nga mahimo ninyong ipakigbahin ang ebanghelyo “pinaagi sa pagkahimong [usa ka] maayong [silingan] ug pinaagi sa pag-amuma ug pagpakita og gugma.” Sa pagbuhat niini, mahimo ninyong “idan-ag ang ebanghelyo sa [inyong] kaugalingong [kinabuhi], ug … modan-ag ngadto sa [uban] sa mga panalangin nga ikatanyag sa ebanghelyo.” Mahimo usab ninyong “ihatag ang inyong pagpamatuod sa unsay inyong nahibaloan ug gituohan ug kon unsay inyong gibati.” Si Presidente Ballard mitudlo, “Ang lunsay nga pagpamatuod … mahimong dad-on pinaagi sa gahom sa Espiritu Santo ngadto sa mga kasingkasing sa uban kinsa bukas sa pagdawat niini.”
Ang pagpakigbahin sa gipahiuli nga ebanghelyo ni Jesukristo mao ang labing dako nga tinguha sa kasingkasing ni Presidente Ballard. Mahimo kang matinguhaon nga moapil—sama kaniya—sa pagpakigbahin sa ebanghelyo diha sa pulong ug sa buhat. Wala kamo makahibalo kon kinsa ang nangita sa kahayag sa ebanghelyo apan wala masayod asa kini pangitaon (tan-awa sa Doktrina ug mga Pakigsaad 123:12).
Presidente M. Russell Ballard ug Elder Quentin L. Cook sa Liverpool, England, niadtong Oktubre 25, 2021. Silang duha nagserbisyo og misyon sa England.
Paghatag og Kinasingkasing nga mga Pagdapit
Sa pagtabang sa uban nga moduol kang Kristo, mahimo nimong dapiton sila sa pagsinati sa kalipay nga gidala sa Manluluwas ug sa Iyang ebanghelyo. Mahimo nimong dapiton sila sa pagtambong sa usa ka kalihokan, sa pagbasa sa Basahon ni Mormon, o sa pagpaminaw sa leksiyon gikan sa mga misyonaryo. Makahimo gani kamo sa paghatag og kinasingkasing nga pagdapit sa pag-apil sa panagtigom alang sa sakramento uban ninyo.
Kita motambong sa panagtigom alang sa sakramento matag semana aron “mosimba sa Dios ug moambit sa sakramento aron sa paghinumdom ni Jesukristo ug sa Iyang Pag-ula.” Kini usa ka espesyal nga panahon alang sa mga tawo nga mobati sa Espiritu, mopaduol ngadto sa Manluluwas, ug molig-on sa ilang pagtuo diha Kaniya.
Samtang mangita kamo og mga paagi sa paghigugma, pagpakigbahin, ug pagdapit, sulayi pagdapit ang pamilya ug mga higala sa pagtambong sa panagtigom sa sakramento. Kon dawaton nila ang inyong pagdapit ug motambong, makatabang kini nila sa pagpadayon sa dalan sa bunyag ug pagkakabig. Nagtuo ko sa tibuok nakong kasingkasing nga ang dakong kalamposan moabot kon inyong dapiton ang uban ug tabangan sila nga makaila sa mga panalangin nga ilang madawat gikan sa pagtambong uban kaninyo.
Ang Ginoo Mogiya Kaninyo
Dili ninyo mahibaloan kon unsa nga mga kalamposan ug mga hagit ang inyong maangkon samtang kamo naghigugma, nagpakigbahin, ug nagdapit. Ang anak nga mga lalaki ni Mosiah adunay dako nga kalamposan taliwala sa mga Lamanita samtang sila nagsangyaw ug nagtudlo sa pulong sa Dios. Pinaagi sa ilang mga paningkamot, “liboan ang nadala ngadto sa kahibalo sa Ginoo” ug daghan [ang] “nakabig … [ug] wala gayod mobiya” (Alma 23:5–6).
Samtang dili kini kanunay ang inyong masinati, ang Ginoo misaad nga Siya motabang kaninyo tungod kay ang matag kalag bililhon Kaniya. Samtang inyong ibutang ang inyong pagsalig sa Ginoo ug moapil sa Iyang pagserbisyo, Siya mogiya kaninyo kon unsaon sa pagpakigbahin sa Iyang ebanghelyo ngadto sa uban pinaagi sa paghigugma kanila, pagpakigbahin sa inyong kinabuhi ug sa pagpamatuod ngadto kanila, ug pagdapit kanila sa pag-apil kaninyo sa pagsunod Kaniya.
“Unsa ka dako ang imong hingpit nga kalipay” (Doktrina ug mga Pakigsaad 18:15) kon inyong buhaton ang mga oportunidad sa inyong palibot sa pagtabang ni Ginoong Jesukristo sa Iyang dakong buhat sa pagdala og mga kalag ngadto Kaniya.