Akong Kasinatian sa Operasyon sa Akong Kasingkasing

Ni Carter Thomas

Mga paghulagway pinaagi ni Adam Nickle

Ganahan kaayo ko og mga paugnat sa kusog, labi na sa basketball. Ganahan lang gyod ko nga makigsangka. Ug mao kana ang usa sa hinungdan kon nganong kinahanglan nakong atubangon ang walo ka oras nga operasyon sa akong kasingkasing sa edad nga 14 anyos.

Natawo ako nga may depekto sa usa sa mga balbula sa akong kasingkasing. Una ato, ang mga doktor miingon nga tingali magkinahanglan ko og operasyon kon edaran na ko—inig retiro nako, tingali. Apan ngadto-ngadto, ang problema nagkagrabe, tungod gayod kay grabe ko modula og sports.

Atol sa usa ka pagbisita sa tinglarag, ang doktor miingon nga tingali magkinahanglan ko og operasyon sa sunod tuig o sa sunod pa. Sa pagkakaron, nag-apil ko og lumba sa dagan (cross-country) didto sa eskwelahan. Apan imbis magkamaayo ko sa akong pagdagan, nagkagrabe man nuon ko. Mao to nga nasayod ko nga aduna gayoy dili maayo.

Mibisita na usab kami sa doktor pagka-Marso. Atol sa pagbisita, mibati ko nga kinahanglan na ko magpaopera sa mas madali kaysa among giplanohan. Misugod ko sa pagbati og kainit sa espirituhanon. Kadto nga personal nga pagpadayag nakahatag kanako og kahupayan. Sa kalit nadungog nako ang akong kaugalingon nga miingon nga gusto ko magpaopera sa labing madali. Ang akong mga ginikanan sa sinugdanan nahadlok og gamay, apan ako silang giingnan, “okay ra ko. Unsa ka dali nato kini mahimo?” Among gi-eskedyol ang pag-opera sa Abril.

Sa malisod nga mga panahon, ako nasayod nga si Jesukristo kanunay nga anaa alang kanako. Makaampo ako kanunay ngadto sa Langitnong Amahan, ug makatabang kini.

Ako adunay hugot nga pagtuo nga ang tanan mamaayo ra, apan ang adlaw sa pag-opera makahadlok gihapon. Sa kalit nakulbaaan ko, naglakaw paingon niadto nga lawak. Nahinumdom ko nga nagkurog. Ang akong anesthesiologist nakatabang gayod nako atong higayona. Mapasalamaton ko sa tanang tawo kinsa nakatabang nako niadtong tibuok nga kasinatian. Aduna usab akoy langitnong tabang. Sama pananglit, ang akong tibuok ward mipuasa alang kanako, ug gibati gyod nako ang gahom sa pagpuasa ug pag-ampo.

Litrato pinaagi sa maayong kabubut-on sa pamilyang Thomas.

Niining mga panahona ang akong kasingkasing maayo ra gyod kaayo. Kon wala pa ko nagpaopera, namatay na unta ko sulod sa duha ka tuig. Karon aduna na akoy gilaomang taas nga kinabuhi.

Kining tibuok nga kasinatian nakapausab sa akong panglantaw. Lahi na ang akong panglantaw sa tanang tawo samtang nagsinati sila sa ilang mga pagsulay. Gibati nako ang dakong empatiya alang kanila. Usahay makakita ko og usa ka tawo ug makabati nga nagsinati siya og usa ka butang nga bug-at, ug ako siyang adtoon ug tabangan siya.

Alang nako, ang pagkahimong usa ka disipulo ni Jesukristo nagpasabot gayod nga mamahimong usa ka panig-ingnan ngadto sa uban ug tagdon ang tanan sama nga Siya motagad. Kitang tanan magtinabangay niini. Ang Dios mao ang atong Amahan, ug kita Iyang mga anak. Ang matag usa adunay katuyoan ug bili. Adunay daghang negatibo, mao nga maninguha ko og tabang sa mga tawo nga mopahiyom ug mahimong positibo.

Ako mopamatuod nga makadawat ko og personal nga paggiya gikan sa Ginoo sa matag adlaw. Makahimo Siya kanako nga mas kusgan isip usa ka tawo ug hatagan ko og kalig-on. Makahimo ko sa tanang butang pinaagi kang Kristo (tan-awa sa Mga Taga-Filipos 4:13).