Mga Pangutana ug Mga Tubag

“Walay bisan usa sa eskwelahan nga adunay sama sa akong mga sumbanan. Unsaon man nako sa pagbaton og maayong mga higala didto?”

“Kitang tanan mobati nga nagkinahanglan og mga higala. Kitang tanan nangita og pipila ka ebidensiya nga kita mga tawo nga adunay bili. Kita mohimo og mga pagpili base niini nga mga tinguha. Ang uban mahimong modala kanato palayo gikan sa kahayag nga gidalit sa Dios kanato isip giya. Ang uban mahimong mopahayag niana nga kahayag nga pinaagi niini kita makakita sa atong agianan.”

Presidente Henry B. Eyring sa Unang Kapangulohan, “Lakaw diha sa Kahayag,” Abr. 2008 nga kinatibuk-ang komperensiya (Liahona, Mayo 2008, 124).

“Paghisgot bahin sa inyong managsama nga mga interes. Dili kinahanglan nga inyong tagoan ang inyong espirituhanong kusog. Kinahanglan lang nga mahimo kamong normal nga tin-edyer nga ganahan usab sa pipila ka makalingaw nga mga butang nga gikalingawan sa ubang mga tin-edyer. Sunda ang mga sumbanan ni Jesukristo, ug ipatin-aw sa inyong mga ka-eskwela ang mga sumbanan nga inyong gisunod.”

Jamie Ann B., 18, Negros Occidental, Philippines

“Pangitaa ang mga tawo nga parehas og mga klase, mga interes, mga talento, o mga kalingawan. Adunay mga maayo nga mga tawo sa ubang mga tinuohan, ingon man usab mga talagsaon nga mga tawo nga walay pagtuo. Sila mga pinangga gihapon nga mga anak sa Dios. Samtang magpadayon kamo sa pagsunod sa inyong mga sumbanan, bisan og ang inyong mga higala wala, ang inyong ehemplo mahimong makadasig sa uban sa paghimo og mas maayong mga pagpili.”

Lucy B., 15, Lima, Peru

“Pagmapailobon ug bukas ang hunahuna. Ang panaghigalaay mahitungod sa kalidad, dili sa padaghanay, ug ang pagbaton ug pipila ka tinuod nga mga higala mahimong mas magantihon kay sa pagpaningkamot nga dawaton sa grupo nga dili mohaom sa inyong mga mithi.”

Adedoyin Alma O., 17, Osun, Nigeria

“Mopakigbahin sa inyong sumbanan ngadto kanila. Kon sila masayod unsa ang inyong mga sumbanan, mahimo nila kini nga respetohon. Mahimo usab ninyong dapiton ang inyong mga higala sa eskwelahan ngadto sa simbahan ug/o ngadto sa mga kalihokan sa Simbahan aron sa pagtabang kanila nga makakita og dugang mahitungod sa unsay inyong gituohan.”

Margarett P., 13, Texas, USA

“Akong nakat-onan nga makakita kamo og maayong mga higala pinaagi sa mga pag-aghat ug pinaagi sa pagpabilin lamang sa kon kinsa kamo. Usahay ang mga tawo moduol kaninyo, ug usahay kinahanglan kamoy mangita, apan adunay mga tawo nga mahimong maayong mga higala o nanginahanglan og usa ka maayong higala sama kaninyo.”

Katie R., 18, Nebraska, USA

Ang mga tubag gituyo alang sa pagtabang ug sa panglantaw, dili isip opisyal nga mga pamahayag sa doktrina sa Simbahan.

Unsay Inyong Hunahuna?

“Aduna koy pipila ka dagkong mga desisyon nga pagahimoon. Unsaon nako pagkadawat og personal nga pagpadayag?”

Ipadala ang inyong tubag ug litrato sa dili pa ang Agosto 15, 2024.

Pag-email kanamo sa [e-mail]. O adto sa ftsoy.ChurchofJesusChrist.org ug iklik ang “Isumiter ang Inyong Gibuhat [Submit Your Work].” Mo-sign in gamit ang inyong Account sa Simbahan ug dayon pilia ang “Alang sa Kalig-on sa mga Kabatan-onan” ubos sa “Pagpili og Magasin.” Iklik ang “Magdugang og File [Add File]” aron sa pagpili sa inyong file ug mga litrato, ug dayon iklik ang “Isumiter [Submit]” aron sa pag-upload ug sa pagpadala ngari kanamo sa inyong file.

Ang mga tubag mahimong i-edit alang sa gitas-on o ka klaro.