“Mga Tabang sa Emosyonal nga Kaayohan,” Alang sa Kalig-on sa mga Kabatan-onan, Hulyo 2024.
Tabang sa Kinabuhi
Mga Tabang sa Emosyonal nga Kaayohan
Aniay mga sugyot sa paghimo sa imong kaugalingon nga himsog sa emosyonal nga paagi.
Makahunahuna siguro ka og daghang paagi sa paghimo sa imong lawas nga himsog samtang magka-edaran ka na. Ikaw nasayod nga ang Langitnong Amahan ug si Jesukristo nahigugma kanimo ug gusto nga imong atimanon ang imong lawas. Ug ang “pag-atiman sa inyong lawas naglakip sa pag-atiman sa inyong mental ug emosyonal nga kahimsog” (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 29). Aniay mga butang nga imong mahimo aron sa pagtabang sa imong kaugalingon nga mahimong himsog sa emosyonal nga paagi usab!
-
Icon nga mga paghulagway pinaagi ni Emily E. Jones
Pakigkonektar ngadto sa uban. Ilabi na kon gibati nimo nga nagmagul-anon, ganahan ka nga mag-inusara. OK ra kana usahay, apan importante usab nga maggahin og panahon uban sa makadasig nga mga tawo. Ang pag-inusara hapit kanunay makapahimo sa mga hagit nga mas lisod.
-
Ipadayag ang imong mga emosyon. Pagpraktis nga mahimong matinuoron sa imong pagbati. Pagsulti mahitungod sa imong mga emosyon sa piho nga paagi. Ug sa pagkatinuod, OK ra gyod nga mohilak! Paghunahuna sa panahon nga mihilak si Jesus (tan-awa sa Juan 11:32–35).
-
Ilha nga ang mga pagbati mga impormasyon. Bisan tuod kon kini dili makapakomportable, ang mga pagbati niini dili makapasakit kanimo. Paninguha sa pag-ila sa imong mga emosyon ug ilha kon unsay gisulti niini kanimo.
-
Pagbansay og mga kahanas sa pagsugakod. Kon ikaw nagsubo o naglagot, kat-oni ang pagdala niana nga mga emosyon sa maayong paagi. Sama pananglit, daghang mga tawo nakakaplag nga makatabang ang paglakaw, pagpaminaw sa musika, pag-drowing, pag-ampo, o pagsulat sa journal.
-
Ayaw paghunahuna og dili maayo nga mga pagbati. Ginhawa og lawm ug paghanduraw sa mga panganod nga napadpad sa kalangitan, o tubig nga nagdagayday sa suba. Ilha ang imong mga hunahuna ug mga pagbati ug paninguha nga ipaanod lang kini.
-
Padayon og amuma sa imong espiritu. Ang mga kasulatan, mga himno, pag-ampo, simbahan—kining tanan makatabang sa paglig-on sa imong espiritu, nga makatabang kanimo nga magmahimsog.
-
Paninguha nga magpabilin ang pisikal nga kahimsog. Ang atong emosyonal nga panglawas ug pisikal nga panglawas konektado. Ang pagkaon og makapabaskog nga pagkaon, matulog og eksakto, ug mag-ehersisyo makatabang kanimo nga mas mabaskog sa emosyonal nga paagi samtang magdako.
-
Pangayo og tabang kon gikinahanglan nimo kini. Ang atong lawas usahay nagkinahanglan og propesyonal nga tabang aron mahimsog ug mamaayo. Kini nga mga kapanguhaan mga panalangin gikan sa Langitnong Amahan, kinsa gusto nga motabang kanato. Sa samang paagi, kita mahimong magkinahanglan usahay og tabang gikan sa mga doktor ug mga magtatambag aron mamaayo sa emosyonal nga paagi. Kon gibati nimo nga nagsubo ka og dugay nang panahon, o kon may hunahuna ka nga mopasakit sa imong kaugalingon, palihog pangayo og tabang gikan sa usa ka hamtong. Dili ka kinahanglan nga mag-inusara sa pagsagubang niini! Kab-ota ang tanang panalangin nga gitagana sa Langitnong Amahan alang kanimo.