“Aapa Atu mo le Olioli,” Mo Le Malosi o le Autalavou, Fep. 2024.
Sau, Mulimuli Mai ia te A’u
Aapa Atu mo le Olioli
E maua le olioli tumau i le ola ai i le talalelei a Iesu Keriso.
Ona o Lona alofa atoatoa mo oe, ua naunau ai le Tama Faalelagi e faasoa mai Lona olioli atoatoa ia te oe—i le taimi nei ma le faavavau. O Lana faaosofiaga lena i mea uma mai le amataga, e aofia ai Lana fuafuaga mamalu o le fiafia ma le taulaga a Lona Alo, o Iesu Keriso.
A o nonofo Atamu ma Eva i le Faatoaga o Etena, sa la i ai i se tulaga o le lē sala. Sa “[la] aunoa ma se olioli, ona sa la le iloa se pagatia,” ma sa le mafai ona la faia “se mea lelei, ona sa la le iloa se agasala” (2 Nifae 2:23). O lea, e pei ona faamalamalama mai e Liae, “Na pa’ū Atamu ina ia i ai tagata; ma ua i ai tagata, ina ia latou maua le olioli” (2 Nifae 2:25; tagai foi Mose 5:10–11).
I lenei lalolagi pa’ū, ua e aoaoina ai le eseesega i le va o le lelei ma le leaga e ala i mea ua aoaoina ai oe ma mea e te oo i ai. Tatou te “tofo i le oona, ina ia [tatou] iloa ai ona faataua le lelei” (Mose 6:55). E oo mai le olioli a o e aapa atu i ai e ala i le teenaina o le oona ma le faateleina o le faatauaina ma le pipiimau i le lelei.
Mauaina o le Olioli
E le faamalosia e le Atua le olioli po o le fiafia ia te oe, ae Na te aoao oe i le auala e maua ai. Ua Ia ta’u atu foi ia te oe le mea e le mafai ona maua ai le olioli—“o le amioleaga [e le o le] fiafia ma e le’i avea lava ma fiafia” (Alema 41:10).
O le olioli tumau e maua i le tausiga o poloaiga a le Atua. O Ana poloaiga, o loo maua i le talalelei a Iesu Keriso, ua tuuina mai e Ia e aumaia ia te oe le olioli. E le o ni avega mamafa ae o ni avega mamafa ua siitiaina. Afai e te toilalo mo se taimi e tausi ai poloaiga, e mafai lava ona e liliu atu, teena le oona, ma toe tulitulimatagau le lelei e ala i le salamo, lea ua mafai ona o Iesu Keriso e ala i Lana taulaga togiola (tagai Helamana 5:10–11).
Sa fetalai mai Iesu:
“Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.
“Ua ou fai atu nei mea ia te outou, ina ia tumau ai lou olioli ia te outou, ma ia atoatoa foi lo outou olioli” (Ioane 15:10–11).
O le mea lea na lagonaina e Liae i lana miti a o ia tofo i le fua o le laau o le ola, lea e faatusa i le alofa o le Atua. Sa ia fai mai, “A o ou ’ai i lona fua sa faatumulia ai lo’u agaga i le olioli tele” (1 Nifae 8:12; tagai foi 1 Nifae 11:21–23).
Na faaalia foi e Liae se isi auala e lagona ai le olioli. Fai mai o ia, “O le mea lea, sa amata ai ona ou manao ia aai ai [i le fua] foi lo’u aiga” (1 Nifae 8:12).
Fesoasoani i Isi ia Maua le Olioli
E ala i le ola ai i le talalelei, e mafai ai ona “faatumuina oe i le olioli” (Mosaea 4:3). Ae o le tele o le olioli i lou olaga, iinei ma le olaga a sau, o le a oo mai pe a e vaavaai atu i fafo ma saili e fesoasoani i aiga, uo, ma isi ia maua lena lava olioli ma le filemu na tuuina mai e le Atua. O le auala sili lea e faaali atu ai lou alofa mo le Atua ma mo lou tuaoi (tagai Mataio 22:37–39).
A o avea ma se alii talavou, sa sailia e Alema le olioli i mea uma e tetee i le talalelei a Iesu Keriso. Ina ua uma ona aoaiina o ia e se agelu, sa matua oo o ia i se aafiaga o “le oona” ma oo atu ai i “le lelei” e ala i le salamo ma le alofa tunoa tele o le Faaola (tagai Mosaea 27:28–29). I ni tausaga mulimuli ane, sa tautino atu ai e Alema i lona atalii o Helamana:
“Ma ʼoi, le olioli e, ma le malamalama ofoofogia tele na ou vaaia; ioe, sa faatumulia loʼu agaga i le olioli sa sili atu ona tele e pei o loʼu tiga! …
“Ioe, ma mai i lena taimi e oo mai i le taimi nei, o ou galue e le taofia, ina ia mafai ona ou aumai o agaga i le salamo; ina ia mafai ona ou aumai i latou e totofo i le olioli tele lea sa ou tofo i ai. …
“Ioe, ma o lenei faauta, … ua tuuina mai e le Alii ia te aʼu le olioli tele i le fua o aʼu galuega” (Alema 36:20, 24–25).
Sa lagonaina foi e Alema le olioli lofituina ina ua faamanuiaina isi i le aumaia o agaga ia Keriso, ma o lea na tauave ai lona agaga ma le olioli tele (tagai Alema 29:14–16).
E mafai ona e maua le olioli lava e tasi e pei ona e alofa atu i isi i “le alofa le pona o Keriso” (Moronae 7:47; tagai foi fuaiupu 48), faasoa le upumoni toefuataiina ia i latou, ma valaaulia i latou e faapotopoto faatasi ma le nuu o le feagaiga a le Atua.
E mafai ona e Lagonaina le Olioli e tusa lava pe Faigata le Olaga
E le tatau ona e fefe faapea o tofotofoga ma luitau o le a mautinoa lava o le a e feagai ai i le olaga nei o le a taofia pe faaumatia ai lou olioli. O le taumafai e ola i le talalelei, e mafai ai ona “tofatumoanaina ou luitau i le olioli ia Keriso” (Alema 31:38)
Ua faamanatu mai e Peresitene Russell M. Nelson ia i tatou, o le olioli na i ai se matafaioi i puapuaga o le Faaola (tagai Eperu 12:2). Sa ia faapea, “Ina ia mafai ona Ia onosaia aafiaga aupito i sili ona tiga e lei onosaia muamua i le lalolagi, na taulai atu ai lo tatou Faaola i le olioli!” O lenei na “aofia ai le olioli i le faamamaina, faamaloloina, ma le faamalosia o i tatou; o le olioli i le togisalaina o agasala a tagata uma o le a salamo; o le olioli o le a mafai ai e oe ma a’u ona toe foi atu i le aiga—i le mama ma le agavaa—e nonofo ma o tatou Matua Faalelagi ma aiga.
A tatou taulai i le olioli lea o le a oo mai ia i tatou, po o i latou tatou te alolofa i ai, o le a le mea e mafai ona tatou onosaia lea e foliga lofituina, tiga, taufaafefe, le talafeagai, pe foliga e le mafai?”1
Ou te uunaia outou ia aapa atu mo le olioli e ala i le taliaina o le talalelei a Iesu Keriso ma fesoasoani i isi ia faia foi faapea. I luga o le ala o le talalelei, o loo i ai le olioli tumau i le faigamalaga ma le olioli i le iuga. O le talalelei a Iesu Keriso o le ala i le olioli i aso uma.