“O Filifiliga Laiti ma Faatauvaa,” Mo Le Malosi o le Autalavou, Fep. 2024.
O FilifiligaLaiti ma Faatauvaa
O le avea ma se talavou e le o se faiga masani mo le avea ma tagata matua. O filifiliga e te faia i le taimi nei e iloa ai po o ai o loo avea ai oe.
Ata na tusia e Iker Ayestaran
A o leʻi i ai ni moli eletise, o nisi taimi e faaalu ai e tagata ni vaiaso i tausaga taitasi e fufui ai vavae mamafa i le gaʻo, ma faamaalili mo sina taimi, ma toe fufui—faselau taimi. O taimi uma lava e alu ai le moligao i totonu o le ga’o, e tele atu mea na sau ai nai lo le mea na alu i ai. Atonu e foliga tuai le faagasologa, ae e tasi le vaega i le taimi, na avea moligao ma mea na mamanuina ina ia avea ai—malosi mo le aveina atu o le malamalama i tagata uma.
O nisi taimi e mafai ona lagona e pei o loo e faatalitali mo le amataga o le olaga, ae o faaiuga lelei e te faia i le asō e faaopoopo ai vaega o le malosiaga i le tagata ua avea ai oe. Sa saunoa Elder Jeffrey R. Holland o le Korama a Aposetolo e Toasefululua i lenei faataoto: “Aua le faatali e te ola. E le o se faataitaiga lenei; e le o se taufetuliga matutu lenei; e le o se faiga masani lea e muai faatinoina. O le mea lena. O le olaga moni lenei. Aua ne’i faatali. Tofo i minute uma.”1 Tatou te le tau faatalitali ina ia malolosi i le tauaveina o le Malamalama o Keriso.
Tatou te Suia e ala i Filifiliga, Ae Le o Faalavelave Faafuasei
Ina ua le malamalama Nifae i aoaoga a lona tamā, na ono mafai ona le fiafia o ia, ae sa ia ole atu i le Atua e aoao o ia (tagai 1 Nifae 10:17). Ina ua gau lana aufana, na ono mafai ona togi lona solo, ae nai lo o lena sa ia faamaualaloina o ia lava ma faia se aufana fou (tagai 1 Nifae 16:18–23).
Ina ua taunuu atu lona aiga i le sami ma sa poloaiina e le Atua ia Nifae e fau se vaa, sa ono mafai ona felafoaiina ona lima i le ea, ma le ita ona sa talosagaina o ia e le Atua e fai se isi mea faigata. Nai lo lena, sa ia ole atu i le Atua mo ni faatonuga ma alu loa e galue (tagai 1 Nifae 17:9–11). O taimi taitasi, sa i ai sana filifiliga e toso ese mai le Atua pe faaopoopo i ai se isi vaega o le malosiaga.
E le mafai ona tatou faamoemoe o le a i ai se aso o le a tatou malolosi ai, o moligao susulu o le faatuatua sei vagana ua tatou faatagaina a tatou filifiliga i aso uma e faamalolosia i tatou. O le faitauina o tusitusiga paia, salamo i aso taitasi, tatalo e le aunoa—atonu e foliga mai e le taua ia Satani, ae o nei faatinoga faatauvaa o le faatuatua e faaopoopo ai vaega i lo tatou malosi e filifili ai ma le amiotonu e tusa lava po o a mea e tauai mai e Satani ia i tatou!
O a ni mea o e filifilia? Pe o e filifili e faaopoopo ni vaega i lou faatuatua i le Tama Faalelagi ma Iesu Keriso, pe e te manatu e mafai ona e fetaiai ma Satani e aunoa ma lena mea? O e taumafai e filifili le amiotonu nai lo le fouvale?
Tasi le Vaega i le Taimi
Na tusia e le perofeta o Alema “o mea laiti ma faatauvaa e faataunuu ai mea tetele” (Alema 37:6). Na uunaia i tatou e Sister Marjorie Pay Hinckley, o le faletua o le Peresitene o le Ekalesia o Gordon B. Hinckley: “Pe a tatou toe tepa i tua i le tele o tausaga o le olaga, ua tatou iloa ai o mea e foliga mai e le taua tatou te faia ma faia e lalagaina moni ai le mamanu o o tatou olaga. Ma afai e lelei na mea laiti ma faatauvaa, o le a iu ina tatou ola i se olaga faamalieina—ma o se mea sili lena!”2
O a tatou filifiliga, o i tatou, e pei o le moligao, e mafai ona faia ia malolosi atu se vaega se tasi i le taimi i aao o lo tatou Foafoa. O a mea o le a e filifilia?