“O Se Manumalo i le Sapati,” Mo Le Malosi o le Autalavou, Fep. 2024.
O Se Manumalo i le Sapati
O Parker J. mai Oregon, ISA, sa le’i lagonaina le latalata atu i le Atua. Ae o lana filifiliga e tausia le aso Sapati ia paia na fesoasoani ia te ia e toe fesootai ai.
Ata na pueina e Christina Smith
A o sauni Parker J e 17 tausaga le matua mo le sailiga siamupini o pi’iga i le vaega sinia, sa koleni o ia mo so’o se gaoioiga e mafai ona fai atu e isi tagata tauva ia te ia. Ae e ui sa ia atinaeina lona malosi i le piiga, lakapi, togi pulu mamafa, e oo lava i le piano toso mo le tele o tausaga, o sauniuniga aupito taua a Parker sa leai se mea e faatatau ai i maso faaletino. Sa manaomia le malosi faaleagaga e faia ai lenei taamilosaga o se manumalo i fofoga o le Atua.
Piiga ma se Faaiuga
“O le lagonaina o le alofa o le Atua na faaosofia ai a’u i taimi uma,” o le tala lea a Parker. Ae mo se mafuaaga, na te le’i lagonaina le latalata tele i le Atua i vaiaso e tau atu i le tauvaga. I le taimi ua tuanai, na ia fai mai ai, “o le agaga faafetai i le Atua na fesoasoani moni lava ia te a’u e faamalosia ai la’u molimau, o lea sa ou le iloa ai pe sa na ona pau lava o lo’u le agaga faafetai pe na aveese moni lava e le Atua Lona aao.”
O le fuafuaga mo le vaiaso o le taamilosaga sa faigofie: o le a ō le au a Parker i le pasi i le Aso Tofi e tauva i le taamilosaga i le Aso Faraile ma le Aso Toonai. Ae paga lea, o se afā kiona leaga na faigata ai mea. Na toe tolo i tua le taamilosaga i se aso, o lona uiga o le au piʻi e manumalo ia latou taaloga i le Aso Toonai e tatau ona tauva i le Aso Sa. Ma o le tomai ma le malosi o Parker na maua ai e ia le avanoa maualuga e sao ai i lena mamao.
A o saofafai i luga o le pasi ma lana au taaalo, sa iloa e Parker sa i ai sana filifiliga e fai: pi’i i tauvaga faaiu i le Aso Sa pe faamamalu le Sapati. Ma talu ai o le a faauu o ia pe a mavae lenei tausaga, o lona avanoa mulimuli lea e tauva faatasi ai ma lana au.
“O se taimi faigata tele mo a’u le faia o lena faaiuga. Ou te le’i lagonaina lava le aao o le Atua i na vaiaso a o lumanai le taamilosaga,” o lana tala lea.
Ae o le manatuaina o aafiaga ua mavae ma le Atua na tuuina atu ai ia Parker le malosi sa ia manaomia e filifili ai. “E ui ou te le’i lagonaina Lona aao talu ai nei, ae sa ou iloaina sa ou lagonaina muamua Lona aao. Ou te folafola atu i vaiaso uma pe a ou tagofia le faamanatuga e manatua pea o Ia, ae le na o le taimi ou te manao ai. O lea na ou filifili ai ou te le pi’i i le Aso Sa.”
Manumalo Moni
Sa tu atu Parker i le taeao o le Aso Toonai ma le iloaina o le a le pi’i o ia i le sailiga siamupini i le Aso Sa, e tusa lava pe manumalo o ia i Aso Toonai uma. Ae o le mea e ofo ai, na te le’i toe lagonaina le le fiafia. “Sa ou filemu i laʻu filifiliga,” o lana tala lea. “Sa manaia lava, aua o le vaitau atoa sa faatoa ou lagonaina ai le tele o le uunaiga ia manumalo. Ae i lena faatasiga, sa na ona ou fiafia lava e faatasi ma tagata ou te alofa i ai. Sa na ona ou manao lava e fai le mea sili ou te mafaia.”
Ma sa ia faia. Na tauia le koleni a Parker, ma manumalo ai i taaloga uma i lena Aso Toonai. Ae ina ua ia lafoaia le Aso Sa, sa lagona e Parker ua ia manumalo i se mea e sili atu ona taua. “O lena pine tulaga muamua semanu e pefua i luga o la’u fata,” o lana tala lea. “Ae o le manino ma le filemu na ou maua mai le filifilia o le Atua ma le mafai ona iloa Lona aao sa matua taua lava.”
O le manumalo moni o Parker sa le’i i ai i se pine po o se ipu. O le filifilia lea o le Atua ma le mafai ona iloa Lona aao.
Fai mai Parker, “O lenei aafiaga na ou iloa ai le mea ou te mafaia. O le toatele o le autalavou e le talitonu i lo latou tomai e faia filifiliga faigata. Sa ou i ai iina. Ae o loʻo ia te oe lava le filifiliga e fai le mea saʻo, e tusa lava pe na e faaletonu i le taimi ua tuanai. E silafia oe e le Atua ma e talitonu ia te oe. Na te silafia o loo ia te oe le tomai e faia ai.”
Faamanuiaga mai le Ositaulaga
E le’i leva ona manumalo faaleagaga Parker, ae maua lona valaauga faamisiona i Romania. Ua ia iloa o le filifili e tausi poloaiga a le Atua o le a i ai se faatosinaga lelei i lana misiona ma lona olaga atoa. Fai mai o ia, “O lea ua ou iloa o le faaavanoaina o se aso e tasi o le vaiaso mo le Atua e faamanuiaina ai oe i le faatolu, faafaina ma sili atu. E le o le ‘Ia, ua ou misia lenei taamilosaga faaiu, o le a ou alu la i le lagi.’ O lo’u gafatia e auauna atu, ositaulaga, ma latalata atili atu i le Atua ua faateleina.”
Ua fiafia Parker e auauna atu i le Alii o se faifeautalai faamisiona i Romania.
O le isi taimi e tauivi ai Parker ma se faaiuga taua, ua sili atu lona saunia nai lo se isi lava taimi. “E le toatele ni tagata o le a maua le avanoa e lafoai ai le taaloga mulimuli o se suega siamupini i piiga a le setete,” ua tautino mai ai Parker. “O le vaega talafeagai o le ositaulaga. O le mafai ona tuuese o se mea mo le Atua ma tuuto atu ia te Ia na ou maua ai se lagona o le mana ou te le’i mauaina muamua. E sili atu le silafia o oe e le Tama Faalelagi nai lo lou iloaina o oe lava.” Faimai o ia, “O le a faatagaina oe e le Atua e oo i tulaga e faigata ae e le mafai lava ona faigata ona faatoilalo i Lana fesoasoani.”