“Ou te tauivi e aapa atu. E faapefea ona ou faauo i tagata?,” Mo Le Malosi o le Autalavou, Fep. 2024.
Fesili ma Tali
“Ou te tauivi e aapa atu. E faapefea ona ou faauo i tagata?”
O se Faagasologa
“Sa ou tauivi i le fatuina o ni sootaga lelei mo le tele o lo’u olaga! O se faagasologa o le aoaoina. Faataitai le faia o ni talanoaga ma se tagata po o se vaega toalaiti. Fai fesili ma ia fia iloa e uiga i le faamasani i isi. O le a tosina atu tagata ia te oe pe a latou vaai i ou uiga faaKeriso.”
Ethan G., 17, Iuta, ISA
Auai i Gaoioiga a le Ekalesia
“Mo a’u, e matuai faigata lava le faia o ni uo pe talanoa ma isi, ae o le auai i gaoioiga a le Ekalesia ua fesoasoani ia te a’u. O le alu i le MMA ma isi tolauapiga na fesoasoani ou te aoao ai ma faasoa atili atu i isi faaleagaga ma faaleagafesootai.
Caroline S., 14, Santiago, Chile
Tatalo mo le Fesoasoani.
“Ina ua ou oo i se gaoioiga tele, sa ou matuai manao lava e fai ni a’u uo. Sa ou tatalo mo se fesoasoani. Ina ua ou alu i le lotu i le aso na sosoo ai, sa faafeiloai tagata uma, ma sa ou faia ni uo se toatele. Faalagolago i le Atua ma ia faatuatua.”
Cache D., 13, Misuri, ISA
Avea ma se Faataitaiga
“O le faia o faauoga moni e faigata ona fai. Ae afai e ia te oe le onosai, anapogi, tatalo, ma liliu atu i taimi uma i le Alii, o le a Ia fesoasoani ia te oe e avea ma se faataitaiga faamaoni. Ona vaai lea o tagata i lou malamalama ma mananao e faatasi ma oe.
Raquel F., 17, Paraná, Pasila
Saofai, Talanoa, Faasoa Atu
“Ou te faamasani lelei i tagata e ala i le saofafai ma talanoa ma i latou. Fuafua po o le a le lanu e sili ona latou fiafia i ai, o a ata tifaga latou te fiafia e matamata ai, o a mea latou te fiafia e fai, ma isi mea faapena. Faasoa atu foi ni mea e uiga ia te oe lava. O lena tamaitiiti fou i lau vasega atonu e iu lava ina avea ma au uo mamae.”
Rachel S., 11, Iuta, ISA
Faalogo
“Fai fesili. E toatele tagata e fiafia e talanoa e uiga ia i latou lava. Ua ou aoaoina afai e te faalogo ma faia ia lagona e le isi tagata e taua i latou ma o le totonugalemu o lou gauai atu i ai, o le a fesoasoani moni lava e faamalosia ai sootaga.”
Eleanor B., 13, Kentucky, ISA
E Mafai Ona Fesoasoani Keriso
“Ia manatua i taimi uma o Iesu Keriso o lau uo ma e finagalo o Ia e fesoasoani ia te oe. Tatalo mo avanoa ma le lototele e tuu atu ai oe lava iina ma faamasani atili i se tasi.”
Connor F., 17, Iuta, ISA
Aua le Taumate
“Sa ou lagona le pei e le fia talanoa mai tamaitai talavou matutua ia te a’u aua sa ou laitiiti. Ona ou alu lea i se gaoioiga ma iloa ai latou te fiafia i lo’u ma i latou. O lea, tau lava o le talanoa atu i tagata, ona e le taumatea lava, latou te fia talanoa atu ia te oe.
Lily L., 12, Kalefonia, ISA