“Taumafai e Ola i le Talalelei e aunoa ma Iesu Keriso?,” Mo Le Malosi o le Autalavou Fep. 2024.
Taumafai e Ola i le Talalelei e aunoa ma Iesu Keriso?
Sa ou lagona le le faamalieina i le lotu seia oo ina ou iloaina o le faafitauli e le o le lotu—o le mea moni ou te le’i taulai atu i le Faaola.
Aao o le Faaolataga, saunia e Michael Malm
A o ou i ai i le aoga maualuga, sa toetoe lava o taimi uma ou te lagona ai le mamao ese mai le Atua ma Iesu Keriso. O tagata uma sa siomia a’u sa foliga mai e sili atu le faaleagaga ma na latou maua uma nei aafiaga matagofie faaleagaga.
Sa le mafai ona ou iloa po o le a le mea sa ou faia. Sa ou alu i le lotu, faitau tusitusiga paia, tatalo, ma alu i le malumalu pe a fuafuaina e la’u uarota ni malaga i le malumalu. Ae sa ou lagonaina lava e pei sa ou misia se mea.
Ana ou le oo lava i la’u misiona ou te le iloaina le vaega lena o le paso na misi: Iesu Keriso.
Sa ou taulai atu i le faia o mea nai lo le taulai atu i le Faaola ma le avea ma se so’o tuuto ia te Ia.
Ina ia manino, o mausa amiotonu e lelei. O le ola ai i poloaiga e fesoasoani e aumaia ai i tatou ia Iesu Keriso. Ae o nisi taimi tatou te pisi tele ai i “galuega a le ekalesia” lea tatou te aveesea ai le Faaola mai gaoioiga tonu ia ua faamoemoe e aumai ai i tatou ia te Ia. O lenei mea e mafai ona tatou lagona ai le gaogao faaleagaga.
I ai i le Lotu, Misi ma Keriso
Talu ai nei sa ta’u mai ai e nisi o a’u uo ua o ese ma le Ekalesia e leai se isi taimi ua latou lagonaina ai le fiafia ma le filemu sili atu. Sa matuai nenefu lava ia te a’u! Afai o le Ekalesia lenei a Keriso, e faapefea la ona tupu lena mea?
A o o’u faalogo i aafiaga ma atugaluga o a’u uo, sa ou iloa ai e le o le tuua o le Ekalesia na aumaia ia i latou le filemu; o le tuua lea o lisi o mea e fai lea sa latou manatu e tatau ona latou faia. O le taimi lava na latou tuua ai le Ekalesia, sa latou tuua foi a latou lisi o mea e fai faaleagaga.
Ae e le o le mea lena sa mafaufau i ai le Faaola ina ua Ia faatuina Lana Ekalesia ma tuuina mai Ana poloaiga.
Na aoao mai Elder Donald L. Hallstrom o le Fitugafulu i se tasi taimi: “O nisi ua oo ina manatu o le toaaga i le Ekalesia o se sini sili lea. O loo taoto ai i totonu se tulaga lamatia. E mafai ona toaga i le Ekalesia ae le toaga i le talalelei. Sei ou faamamafa atua: o gaoioiga i le Ekalesia o se sini moomia maualuga lea; peitai, e le o lava.”1
E mafai ona fai mea sa’o ae misi atoa ai le mafuaaga i tua atu.
O Le Matautia o le Vaai i tua atu o Keriso
O Sister Tracy Y. Browning, Fesoasoani Lua i le Au Peresitene Aoao o le Peraimeri, sa i ai se malamalamaaga taua e uiga ia Isaraelu i le Feagaiga Fou: “E pei lava ona tatou i ai i aso nei, sa valaaulia tagata o le Atua anamua e vaai i o latou olaga e ala ia te Ia ina ia mafai ona vaai atili i ai o Ia i o latou olaga. Ae e oo atu i le taimi o le galuega a le Faaola, ua leai se vaaiga a Isaraelu ia Keriso i o latou maitauga. …
“… Sa talitonu le fanauga a Isaraelu i le tulaga lea, e faapea, o faiga ma sauniga o le tulafono o le ala lea i le faaolataga faaletagata lava ia, ma ua faaitiitia ai se vaega o le tulafono a Mose i se ituaiga o faiga faavae na faatautaia ai le olaga faatagatanuu. O lea mea na manaomia ai le Faaola e toefuatai le taulai ma le manino i Lana talalelei.”2
O nisi taimi e le faalavelaveina ai e Satani tagata o le Ekalesia toefuataiina a Keriso ina ia latou faia ni agasala matuia. Nai lo lena, na te aveina mea tonu tatou te manatu e lelei ma faatalitonu i tatou e vaai sese i ai.
E pei ona aoao mai Peresitene M. Russell Ballard, o le Sui Peresitene o le Korama a Aposetolo e Toasefululua: “O nisi taimi o le Au Paia o Aso e Gata Ai faamaoni … e amata ona taulai atu i ‘faaopoopoga’ nai lo mataupu faavae autu. O lona uiga, e faaosooso i tatou e Satani ia faalavelaveina lo tatou taulai atu i le savali faigofie ma manino o le talalelei toefuataiina.”3
Nai lo le aumaia ia i tatou o le filemu, o a tatou taumafaiga e ola i le talalelei e mafai i nisi taimi ona taunuu i se atuatuvale ma le le fiafia. O le mea tonu lava lena e manao ai Satani ia tatou lagona e uiga i le talalelei. Afai e le mafai ona ia faia i tatou ia agasala, o le a ia faatalitonuina i tatou o le ola i le talalelei e faigata tele, e faavaivai tagata tele, ma e sili atu nai lo mea e mafai ona tatou ausiaina ma le manuia.
Taulai Atu a Tatou Molimau ia Keriso
I le toe foi ai i le aoga maualuga, sa ou manatu sa le lava au mea na fai. O lena fefe i le le atoatoa o le mafuaaga lea sa ou le lagonaina ai le faaleagaga e pei o i latou o siomia a’u.
E ui o a tatou faatinoga e mafai ona avea ma faailoga o lo tatou liua, e le mafai ona tatou faatagaina a tatou gaoioiga i fafo e faamatala atoa ai lo tatou faaleagaga. Afai tatou te faia, e mafai ona tatou amata tuuina le mamafa o lo tatou faaolataga i o tatou lava tauau nai lo le faalagolago ia Iesu Keriso.
Ua uunaia i tatou e Peresitene Nelson ina ia avea la tatou taulaiga ma mea e “masani ai i le Faaola ma Lana talalelei.” 4 O lenei mea o le a aveesea ai i tatou mai lisi faaleagaga i le liua filemu ma le olioli i Lana Ekalesia. “E leai se mea na te valaauliaina le Agaga nai lo le tāmau o lau taulaiga ia Iesu Keriso.” 5