1 Ut anajwan kik’ulman naq kink’ul jun li hu taqlanb’il xb’aan laj Ammoron, li rey, li nayehok naq wi tinq’axtesiheb’ li preex re pleet li kiqachap chaq naq a’an tixq’axtesi qe li tenamit Antiparah.

2 A’b’anan laa’in kintaqla jun li hu rik’in li rey, naq ch’olch’o chiqu naq tz’aqal li qateep re xchapb’al li tenamit Antiparah rik’in qametz’ew; ut wi ta taqaq’axtesi li preex choq’ reeqaj li tenamit a’an maak’a’aq raj qana’leb’ jo’ kiqak’oxla, ut naq ka’ajwi’ taqaq’axtesiheb’ li qapreex choq’ reeqajeb’ laj preex.

3 Ut laj Ammoron kixtz’eqtaana inhu, xb’aan naq ink’a’ kiraj xq’axtesinkil li preex chiqib’il qib’, jo’kan naq koo’ok chixkawresinkil qib’ re xpleetinkil li tenamit Antiparah.

4 A’b’an eb’ li wankeb’ Antiparah ke’xkanab’ li tenamit, ut ke’eelelik sa’eb’ li jun ch’ol chik xtenamiteb’, li eechaninb’il xb’aaneb’, re xk’eeb’al xkawileb’; ut chi jo’kan li tenamit Antiparah kit’ane’ sa’ quq’.

5 Ut chi jo’kan kiraqe’ li xwaqxaq xka’k’aal chihab’ rawa’b’ejileb’ laj raqol aatin.

6 Ut kik’ulman naq sa’ xtiklajik li xb’ele xka’k’aal chihab’, kiqak’ul jun taqlijik li k’a’ru nak’anjelak qe, jo’ ajwi’ xtiqb’al ru li qateep aj pleet, chalenaq chaq sa’ li ch’och’ Tzarahemla, ut sa’ li ch’och’ chixsutam, waqib’ mil rajlankileb’, jo’ ajwi’ oxk’aal reheb’ li ^aralaleb’ laj Ammonita li ke’chal chixjunajinkil rib’ rik’in ras riitz’ineb’, lin ch’ina teep wiib’ mil xk’ihaleb’. Ut anajwan k’e reetal, kawo chaq, relik chi yaal, tz’aqal ajwi’ chaq li k’a’aq re ru nak’anjelak qe, li taqlanb’il chaq qe.

7 Ut kik’ulman naq li qajom, a’an ok sa’ pleet rik’in li teep aj pleet li k’ojob’anb’il chixkolb’al rix li tenamit Kumeni.

8 Ut anajwan k’e reetal, tink’ut chawu naq chi seeb’ kiqataw li qajom; relik chi yaal, rik’in li qakawil teep, malaj rik’in jun raqal li qakawil teep, kiqasuti rix chi q’eq li tenamit Kumeni, ka’ch’in chik ma taawulaq rik’ineb’ jun taqlajik li k’a’ru nak’anjelak reheb’.

9 Ut kik’ulman naq kiqak’ojob’ li qateep chi sutsu chirix li tenamit chiru k’iila q’ojyin, a’ut koowar sa’ xb’eeneb’ li qayok’leb’ ch’iich’, ut kiqaxaqab’eb’ laj k’aak’alenel, re naq eb’ laj Lamanita ink’a’ te’ruuq chi chalk sa’ qab’een chi q’eq ut chiqakamsinkil, li ke’xyal k’iila sut; a’b’an jo’ k’ihal sut ke’xyal a’in kihoye’ xkik’eleb’.

10 Moqon kiwulak li k’a’ru taqlanb’il reheb’, ut okeb’ raj re sa’ li tenamit chi q’eq. Ut maawa’o aj Lamanita naq ke’ril; laa’o b’an aj Nefita, jo’kan naq kiqachapeb’, rochb’een li k’a’ru reheb’ li taqlanb’il chaq.

11 Ut eb’ laj Lamanita, us ta ramb’il chi jo’kan chiruheb’ li k’a’ru nak’anjelak reheb’, toj k’eek’ookeb’ xch’ool chixk’uulankil xwankil sa’ xb’een li tenamit, jo’kan naq ki’aje’ ru naq taqak’am li k’a’aq re ru a’an li taqlanb’il chaq reheb’ ut taqataqla aran Judea, ut eb’ li qapreex sa’ li ch’och’ Tzarahemla.

12 Ut kik’ulman naq moko numenaq ta naab’al kutan naq eb’ laj Lamanita ke’ok chi sachk xyo’onihomeb’ naq te’tenq’aaq; jo’kan naq ke’xq’axtesi li tenamit sa’ quq’, ut chi jo’kan kiqak’ul li k’a’ru k’oxlanb’il qab’aan rik’in xk’ulb’al li tenamit Kumeni.

13 A’b’anan kik’ulman naq q’axal k’iheb’ li qapreex, jo’kan naq us ta q’axal nim li qajlankil, ki’aje’ ru chiqu roksinkil chixjunil li qateep re xk’uulankileb’, malaj xk’eeb’aleb’ chi kamk.

14 Xb’aan naq k’e reetal, eb’ a’an neke’eelelik chaq chi k’iheb’ rajlankil, ut neke’pleetik rik’in pek, ut rik’in tenleb’ che’, malaj yalaq k’a’aq re ru naru neke’xk’e sa’ ruq’eb’, jo’kan naq kiqakamsi numenaq wiib’ mil reheb’ chirix naq ke’xq’axtesi rib’ choq’ preex re pleet.

15 Jo’kan naq ki’aje’ ru chiqu naq taqak’e xraqik xyu’ameb’, malaj naq taqak’aak’aleheb’, chi wank sa’ quq’ li yok’leb’ ch’iich’, toj taq’a sa’ li ch’och’ Tzarahemla; ut jo’kan ajwi’, li k’a’ru qe, yal tz’aqal choq’ re li qatenamit laa’o, us ta wan li k’a’ru kiqamaq’ chaq chiruheb’ laj Lamanita.

16 Anajwan ut, sa’ li ch’a’ajkilal a’an li koowan wi’, q’axal chik naq ki’ajman ru xk’uub’ankil qana’leb’ chirixeb’ li preex re pleet a’in; a’b’anan kiqak’e qach’ool chixtaqlankileb’ aran taq’a sa’ li ch’och’ Tzarahemla; jo’kan naq kiqasik’ ru jun raqal reheb’ li qawinq, ut kiqak’eheb’ xwankil sa’ xb’eeneb’ li qapreex re te’xik taq’a sa’ li ch’och’ Tzarahemla.

17 A’ut kik’ulman naq wulajaq chik a’an ke’sutq’i chaq. Anajwan ut k’e reetal, ink’a’ kiqapatz’ reheb’ chirixeb’ li preex, xb’aan naq k’e reetal, eb’ laj Lamanita chalenaqeb’ sa’ qab’een, ut tz’aqal li hoonal ke’sutq’i wi’ eb’ a’an, re qakolb’al chiru t’ane’k sa’ ruq’eb’. Xb’aan naq k’e reetal, laj Ammoron kixtaqla chaq re xtenq’ankileb’ jun ak’ taqlajik li k’a’ru nak’anjelak reheb’, jo’ ajwi’ jun teep chi winq nim rajlankileb’.

18 Ut kik’ulman naq eb’ li winq a’an li kiqataqla chaq rik’ineb’ li preex ke’wulak sa’ tz’aqal hoonal re xramb’aleb’ ru, naq okeb’ raj re chi numtaak sa’ qab’een.

19 A’ut k’e reetal, lin ch’ina teep wiib’ mil ut oxk’aal rajlankileb’ ke’pleetik chi q’axal anchaleb’ xch’ool; relik chi yaal, ke’xaqli chi kaw chiruheb’ laj Lamanita, ut ke’xk’e li kamk sa’ xb’eeneb’ chixjunil li ani ke’pleetink reheb’.

20 Ut naq li jun ch’ol chik re li qateep aj pleet okeb’ raj re chi tiikisiik xb’aaneb’ laj Lamanita, k’e reetal, eb’ li wiib’ mil rik’in oxk’aal a’an xaqxookeb’ chi kaw ut ink’a’ neke’eek’an xch’ool.

21 Relik chi yaal, ut eb’ a’an ke’xpaab’ ut ke’xk’e xch’ool chixb’aanunkil chi tz’aqal re ru li junjunq chi aatin taqlanb’il; relik chi yaal, ut jo’ chanru ajwi’ lix paab’aaleb’ ki’ux reheb’; ut kijultiko’ we li aatin ke’xye we naq eb’ lix ^ana’ ke’xtzoleb’ wi’.

22 Ut anajwan k’e reetal, b’antiox reheb’ li walal a’in, ut eb’ li winq a’an li ke’sik’e’ chaq ru re xk’amb’aleb’ li preex, naq ki’ux li nimla q’axok-u a’in, xb’aan naq a’aneb’ li ke’q’axok ruheb’ laj Lamanita, jo’kan naq ke’sutq’isiik wi’chik chirix toj sa’ li tenamit Manti.

23 Ut kikana sa’ quq’ li qatenamit Kumeni, ut moko chiqajunilo ta koosache’ rik’in yok’leb’ ch’iich’; a’b’anan naab’al li sachk kiqak’ul chaq.

24 Ut kik’ulman naq chirix naq ke’eelelik chaq laj Lamanita, tikto kintaqla naq eb’ lin winq li toch’enaqeb’ te’isiiq chaq sa’ xyanqeb’ li kamenaq, ut kintaqla naq te’lane’q xtoch’olaleb’.

25 Ut kik’ulman naq ke’wan wiib’ cient, sa’ xyanqeb’ lin wiib’ mil rik’in oxk’aal, li ke’lukta xb’aan xlajik xkik’eleb’; a’b’anan, jo’ chanru xchaab’ilal li Dios, k’a’jo’ xsachik qach’ool, ut xsahileb’ ajwi’ xch’ool chixjunil li qateep aj pleet, chirilb’al naq ^amaajun aamej kiwan sa’ xyanqeb’ li ki’oso’; relik chi yaal, chi moko wan ta junaq aamej sa’ xyanqeb’ li ink’a’ ta kixk’ul k’iila toch’olal.

26 Ut anajwan, sachb’a-ch’oolej choq’ re chixjunil li qateep aj pleet naq ke’kole’ rix, relik chi yaal, naq ke’kole’ xyu’ameb’ us ta wan jun mil reheb’ li qas qiitz’in li ke’kamsiik. Ut tiik ru naq naqaye naq a’an xb’aan lix sachb’a-ch’oolejil ^awankil li Dios, xb’aan xnumtajenaqil lix ^bpaab’aaleb’ chirix li k’a’ru tzolb’ileb’ chaq chixpaab’ankil—a’an naq wan jun li Dios tiik xna’leb’, ut li ani ink’a’ neke’wiib’an xch’ool, naq eb’ a’an te’kole’q rix xb’aan lix sachb’a-ch’oolejil wankilal a’an.

27 Anajwan a’in lix paab’aaleb’ a’in li kin’aatinak wi’; saajeb’, ut xaqxookeb’ xk’a’uxl, ut neke’xkanab’ rib’ chiru li Dios junelik.

28 Ut anajwan kik’ulman naq chirix naq kiqileb’ chi jo’kan li qawinq li toch’oleb’, ut kiqamuqeb’ li qakamenaq jo’ ajwi’ xkamenaqeb’ laj Lamanita, li k’iheb’ chaq, k’e reetal, kiqapatz’ re laj Gid chirixeb’ li preex li ke’xtikib’ chaq xik taq’a sa’ li ch’och’ Tzarahemla rochb’eeneb’.

29 Anajwan laj Gid a’an li xb’eenil aj taqlanel sa’ xb’een li jun ch’uut li kixaqab’aak re xk’aak’alenkileb’ chi xik taq’a sa’ li ch’och’.

30 Ut anajwan, a’in li aatin kixye laj Gid we: K’e reetal, koo’ok chi xik taq’a sa’ li ch’och’ Tzarahemla qochb’een li qapreex. Ut kik’ulman naq kiqak’uleb’ laj muqmuukil k’ehol eetal reheb’ li qateep aj pleet, li taqlanb’ileb’ chaq chixk’aak’alenkil xteepeb’ laj Lamanita.

31 Ut eb’ a’an ke’xjap re chiqu chixyeeb’al—K’ehomaq reetal, eb’ li teep aj pleet reheb’ laj Lamanita yookeb’ chi b’eek sa’ xjayal li tenamit Kumeni, ut k’ehomaq reetal, eb’ a’an te’chalq sa’ xb’eeneb’, relik chi yaal, ut te’xsacheb’ qatenamit.

32 Ut kik’ulman naq eb’ li qapreex ke’rab’i xjapomeb’ re, ut rik’in a’an ke’chal xkawileb’ xch’ool, ut ke’wakli chiqapleetinkil.

33 Ut kik’ulman naq sa’ xk’ab’a’ lix waklijikeb’ kiqak’e chi chalk li qayok’leb’ ch’iich’ sa’ xb’eeneb’. Ut kik’ulman naq sa’ jun molam ke’alinak chiru qayok’leb’ ch’iich’, sa’ li ke’kamsiik wi’ lix k’ihaleb’; ut li jun ch’ol chik reheb’ ke’xpa xb’e ut ke’eelelik chiqu.

34 Ut k’e reetal, chirix naq ke’eelelik ut ink’a’ kooru chixtawb’aleb’, kiqachap qab’e chi seeb’anb’il qib’ sa’ xjayal li tenamit Kumeni; ut k’e reetal, tz’aqal li hoonal koowulak wi’ re taqatenq’aheb’ li qas qiitz’in chixkolb’al rix li tenamit.

35 Ut k’e reetal, jun sut chik kolb’ilo chaq sa’ ruq’eb’ li xik’ neke’ilok qe. Ut osob’tesinb’il xk’ab’a’ li qaDios, xb’aan naq k’e reetal, a’an li xkolok chaq qe; relik chi yaal, li xb’aanunk re li nimla na’leb’ a’in choq’ qe.

36 Anajwan kik’ulman naq chirix naq laa’in, aj Helaman, kiwab’i li aatin a’in re laj Gid, kinnujak rik’in xsahil inch’ool chi numtajenaq, xb’aan xchaab’ilal li Dios rik’in xkolb’al qix, re naq ink’a’ koo’oso’ chiqajunil; relik chi yaal, ut nawoyb’eni naq li raameb’ li kamsinb’ileb’ ak ^aokenaqeb’ sa’ xhilob’aal lix Dios.