Mo Yaco me Dua na iVakatawa
Au nuitaka ni ko ira ko ni qarava era na raici kemuni ni o ni nodra itokani ka ra kila, ni o ni nodra qaqa, ka dauveimaroroi.
Wale ga oqo, au a sotava edua na gone ena Lalai mai Chile e kauta mai vei au na mata mamarau. “Ni bula,” a kaya mai, “Koi au ko Tevita. E rawa ni ko talanoataki au ena koniferedi?”
Ena gauna ni vakadirorogo, au dau vakananuma na veikidavaki tawanamaki nei David. Eda dau vinakata taucoko meda kilai. Eda vinakata meda kauwaitaki, meda nanumi, ka vakila na loloma.
Kemuni na taciqu kei na ganequ, ko ni kauwaitaki yadudua. Kevaka mada ga ko sega ni talanoataki ena koniferedi raraba, e nanumi iko na iVakabula ka lomani iko. Kevaka ko nanuma ke dina oya, ko gadreva mo nanuma ni O Koya esa “ceuti [iko] ena qeteqete ni [Ligana].”1
Ni da sa kila tiko ni lomani keda na iVakabula, e rawa ni da vakananuma e rawa vakacava ni da vakaraitaka noda lomani Koya.
Ea tarogi Pita na iVakabula, “Ko sa lomani au … ?”
A sauma ko Pita, “Io, na Turaga; ko ni sa kila niu sa lomani kemuni. Sa kaya vua ko koya, Vakatawana na noqu sipi.”
Ni sa tarogi na taro oqo ena ikarua kei na ikatolu ni gauna, “Ko sa lomani au?” A sa rarawa ko Pita ia ea vakadeitaka na nona loloma: “Kemuni na Turaga, ko ni sa kila na ka kecega; ko ni sa kila niu sa lomani kemuni. Sa kaya vua ko Jisu, Vakani ira na noqu sipi.”2
E sa sega beka ni vakadeitaki koya o Pita ni a dua na itokani lomani i Karisito? Mai na imatai ni sota ena matasawa, a biuta “sara tu” na nona lawa ni qoli me muria na iVakabula.3 E a yaco ko Pita me dauqoli ni tamata. E sa tokana na iVakabula ena Nona cakacaka vakaikoya ka vukea nodra vakatavulici na tani ena kosipeli nei Jisu Karisito.
Ia oqo sa kila na Turaga a vakaturi tale mai ni sa na sega tale ni tiko O Koya e yasa i Pita, me vakaraitaka vua na ivalavala kei na gauna me veiqaravi kina. Ni sa yali na iVakabula, sa gadreva o Pita me vakasaqara na veituberi ni Yalo, na ciqoma na ivakatakila vakaikoya, ka me tu vua na yaloqaqa kei na vakabauta me yavala. Ni raimatua tiko ki na Nona sipi, e vinakata na iVakabula me cakava o Pita na ka ena cakava O Koya kevaka ea tu ekea. A kerea O Koya vei Pita me ivakatawa mada.
Ena Epereli sa oti, a dulaka o Peresitedi Russell M. Nelson na veisureti tautauvata vei keda meda vakania na sipi nei Tamada ena sala savasava cake ka me caka ena veiqaravi.4
Me yaga na kena ciqomi na veisureti oqo, e dodonu meda vakatubura na yalo ni dua na ivakatawa ni sipi ka kila na nodra gagadre na sipi ni Turaga. Eda yaco vakacava me ivakatawa ni sipi ka gadreva na Turaga meda vaka?
Me vaka na taro kecega, e rawa ni da rai vua noda iVakabula, o Jisu Karisito—na iVakatawa Vinaka. Na sipi ni iVakabula era kilai ka wiliki; era wanonovi; ka ra kumuni ki na qelenisipi ni Kalou
Kilai ka Wiliki
Ni da saga meda muria na ivakaraitaki ni iVakabula, e dodonu taumada meda kila ka wiliki ira Nona sipi. Eda sa lesi ki na tamatayadua kei na matavuvale meda qarava ka da sa vakadeitaki kina ni na qelenisipi taucoko ni Turaga era sa kilai ka sega ni dua e guilecavi. Ia, na nodra wiliki, e sega ni baleta na iwiliwili; e baleta na kena vakadeitaki ni tamata yadua ena vakila na loloma ni iVakabula mai vua ka veiqaravi ena Vukuna. Ena sala oya, e rawa ni kila kece ni kilai ira vinaka tu mai na Tamada loloma mai Lomalagi.
Na gauna lekaleka sa oti au a sotava kina e dua na goneyalewa ka lesi me qarava e dua na marama ka vakalimataki nona yabaki mai vua. Erau kunea vata na marau tautauvata ni sereivakatagi. Ni dau siko ko goneyalewa, erau dau lagasere vata ka veiwasei nodrau sere taleitaki. Erau sema tiko na veitokani ka vakalougatataka nodrau bula ruarua.
Au nuitaki kemuni na dau veiqaravi era na raici kemuni ni o iko nodra itokani kei nodra kila, ni o iko tamata qaqa, ka dauveimaroroi—e dua ka kila na nodra ituvaki ka tokoni ira ena nodra vakanuinui kei na sasaga.
Au a ciqoma e dua noqui itavi meu veiqaravi vei dua na sisita ka keirau sega ni kilai koya kei na noqu itokani. Ni keirau veitalanoa kei Jess na noqu itokani ni veiqaravi yabaki tini-ka-ono, a vakatura vakayalomatua ,“E dodonu me daru kilai koya mada.”
Io, keirau vakatulewa saraga vakatotolo ni dodonu me dua mada na veitaba kei na ivakamacala me vakau. Au a taura tu na talevoni, ka tabaka ko Jess na bulukau me veitaba. Na neirau imatai ni madigi ni veiqaravi a sasaga vaka veitokani.
Ena imatai ni neirau siko, keirau tarogi koya na taci keirau ke dua na ka keirau rawa ni sema ena neirau masu ena vukuna. A wasea e dua na bolebole veivakamalumutaki e sotava ka sureta kina neirau veimasulaki. Na nona dina kei na veivakabauti a kauta vakasauri mai na isema ni loloma. Sa dua dina na madigi kamica meu vakananumi koya ena noqu masu ni veisiga.
Ni ko masu, ko na vakila na loloma nei Jisu Karisito vei ira ko veiqaravi kina. Wasea na loloma oya vei ira. Na sala vinaka cake cava e tu ka rawa ni ko vakatawai ira kina Nona sipi mai na nomu vukei ira mera vakila Nona loloma—mai vei iko?
Wanonovi
A ikarua ni sala meda vakatubura kina na yalo ni ivakatawa ni sipi sa ikoya meda wanonovi ira na Nona sipi Ni da lewenilotu i Jisu Karisito ni Yalododonu Edaidai, sa rawa ni da tosoya, vakavinakataka, ka taracake na cava ga e gadrevi. Eda totolo ni sotava e dua na gagadre ena liga ni veivuke se e dua na veleti keke. Ia e vo beka eso tale?
Era kila li na noda sipi ni da wanonovi ira tiko ena loloma ka da na yavala me da veivuke?
Ena Maciu 25 da wilika:
“Ni lako mai koi kemuni sa vakalougatataki vei Tamaqu, mo ni rawata na matanitu sa vakarautaki me nomuni … :
“Ni kau a via kana, ka ni a solia mai vei au na kakana: au a via gunu, ka ni a vagunuvi au: au a vulagi, ka ni a kauti au ki vale: …
“Ena qai vosa vua ko ira na yalododonu ka kaya, Na Turaga, keimami a raici kemuni mada ninaica ni kemuni a viakana ka vakani kemuni? Se viagunu, ka vagunuvi kemuni?
“Se keimami raici kemuni ninaica ni kemuni a vulagi, ka kauti kemuni ki vale?”5
Kemuni na taciqu kei na ganequ, na vosa bibi eke na raici. Ko ira na yalododonu era raici ira na gagadre tu baleta ni ra wanono ka raica tiko. E rawa talega meda mata veiwanonovi ki na veivuke kei veivakacegui, me veimarautaki ka tatadra. Ni da yavala, e rawa talega ni da vakadeitaki ena yalayala ena Maciu: “Ni kemuni a cakava vua e dua sa lailai vei ira oqo …, ni a cakava vei au.”6
E dua na itokani—eda na kacivi koya o Joni—a wasea na ka e yaco ni da raica na gagadre sega ni laurai vinaka ni dua tale: “E dua na sisita ena noqu tabanalevu a sasaga me vakamatei koya vaka taki koya. Ni oti e rua na vula, au kunea ni sega ni dua ena noqu lewe ni kuoramu e sotavi koya na watina me qarava na dredre sota kaya tiko oqo. E yalobibitaki, niu sega mada ga ni vakaitavi kina. Yaco na gauna, au a sureti watina me keirau laki vakasigalevu. E tamata mamadua, ka sega ni dau vosa. Ia niu kaya yani, ‘E saga me vakamatei koya vakataki koya ko watimu. E rairai tarabi vei iko oya. O vinakata beka mo veitalanoataka?’a tagi vakayauyau. Keirau veitalanoa malumu ka veivolekati yani ka vakatubura e dua na veiwekani vakasakiti ka veivakabauti ena vica ga na miniti.”
E kuria o Joni, “Au nanuma ni na malele me kauta mai na ka kamikamica mai kena vakadeuci na lakovi ni gauna oya ena dina kei na loloma.”7
Na noda sipi era na rairai beka ni ra mavoa, yali, se lako sese tu; ni da sa nodra ivakatawa, oi keda e rawa ni da raica nodra gagadre taudua iliu. E rawa ni da vakarorogo ka loloma tawa vakalelewa ka solia na vakanuinui ka veivuke vata kei na veituberi raimakare ni Yalo Tabu.
Kemuni na taciqu kei na ganequ, na vuravura e sinai cake ena vakanuinui kei na marau baleta na cakacaka vakauqeti lalai ni yalovinaka ni cakava. Ni da vakasaqara na veidusimaki ni Turaga se meda vakauta vakacava Nona loloma ka raica na nodra gagadre eda qarava, ena dolavi na matada. Na nomuni ilesilesi tabu ni veiqaravi e solia vei kemuni na dodonu vakalou mo ni vakayarayarataki. E rawa ni ko ni vakasaqara ena yalodei na veivakayarayarataki koya.
Kumuni ki na Lomanibai ni Kalou.
iKatolu, eda vinakati ira noda sipi mera kumuni yani ki na lomanibai ni Kalou. Meda cakava oqo, e dodonu meda vakasamataka era tu evei ena salatu ni veiyalayalati ka yalorawarawa me lako kei ira ena ilakolako ni vakabauta. Sa noda na dodonu tabu meda mai kila na lomadra ka dusimaki ira vua na nodra iVakabula.
Ko Sister Josivini mai Viti e dredre vua me raica nona sala ki liu kei na sala ni veiyalayalati—e yaco dina. Ko nona itokani e raica ni saga dredre o Josivini me raica na ivolanikalou me rawa ni wilika. E vakarautaka vei Josivini e dua matailoilo ni wiliivola vou kei dua na penikau dromodromoa kata me boroya na vanua kece e tukuni kina o Jisu Karisito ena iVola i Momani. A tekivu ena dua na gagadre lailai me veiqaravi ka veivuke ena vulica na ivolanikalou e sa yaco ki na nona lako ki na valetabu ko Josivini ena imatai ni gauna ni oti e 28 na yabaki mai na nona papitaiso.
Se ra kaukauwa na noda sipi se malumalumu, reki se rarawa, e rawa ni da vakadeitaka me kua ni dua e lako duadua tiko. E rawa ni da lomani ira se ra tiko e vei vakayalo ka solia na veitokoni kei na veivakayaloqaqataki ena ikalawa tarava ki liu. Ni da masu ka vakasaqara meda kila na lomadra, au vakadinadinataka ni na dusimaki keda na Tamada Vakalomalagi ka na lako vata kei keda na Yalona. E tu vei keda na madigi meda yaco meda “agilosi ka vakavolivoliti [ira]” ni lako voli e matadra Ko Koya.8
Na Turaga sa sureti keda meda vakania na Nona sipi, me qarauna Nona qelenisipi me vaka ena cakava O Koya. E sureti keda meda ivakatawa ki na veimatanitu, na veivanua. (Ka io, Elder Uchtdorf, keimami lomana ka gadreva na ivakatawa ni sipi mai Jiamani.) Ka vinakati ira O Koya na Nona itabagone mera sema ki na sasaga.
O ira na noda itabagone e rawa ni so na noda ivakatawa kaukauwa duadua. O ira, me vaka e kaya o Peresitedi Russell M. Nelson, “era maliwai ira na isakisaki ka ra se bau tala mai ki vuravura oqo na Turaga.” O ira oqo era :yalo vakaturaga.“ na noda dauqito vakasakiti,” ka ra muria na iVakabula.9 E rawa beka ni ko raitayaloyalotaka na kaukauwa era na kauta mai na ivakatawa vakaoqo ni ra qarava tiko Nona sipi? Ni da veiqaravi veitikivi tiko kei ira na itabagone, eda na raica na veika vakurabuitaki.
Kemuni na goneyalewa kei na cauravou, keimami gadrevi kemuni! Ke sega ni tiko nomu ilesilesi ni veiqaravi, vosa vei peresitedi ni iSoqosoqo ni Veivukei se kuoramu ni italatala qase. Era na matalau ena nomuni yalorawarawa me vakadeitaki na nodra kilai na Nona sipi ka wiliki, wanonovi, ka kumuni ki na lomanibai ni Kalou.
Ni sa yaco mai na siga ka da na tekiduru kina e yava i koya noda iVakabula lomani, ni da sa vakani ira Nona qelenisipi, au masulaka ni da na rawa ni sauma me vakai Pita: “Io, Turaga; ko ni kila niu sa lomani kemuni.”10 Oqo, na Nomuni sipi, era lomani, era taqomaki, ka ra sa tu e vale. Ena yaca i Jisu Karisito, emeni.