សូមបងប្អូនចងចាំផ្លូវត្រឡប់ទៅផ្ទះវិញ
យើងមានគំរូដ៏ឥតខ្ចោះរបស់ព្រះយេស៊ូវគ្រីស្ទដើម្បីធ្វើតាម ហើយដំណើរឆ្ពោះទៅកាន់ផ្ទះដ៏អស់កល្បរបស់យើង គឺអាចធ្វើទៅបានដោយសារតែការបង្រៀនរបស់ទ្រង់ ព្រះជន្មរបស់ទ្រង់ និងពលិកម្មដ៏ធួនរបស់ទ្រង់ប៉ុណ្ណោះ ។
ក្នុងឆ្នាំ ១៩៤៦ អ្នកស្រាវជ្រាវវ័យក្មេងម្នាក់ឈ្មោះ អាស័រ ហាស្លឺរ បានដើរឡើងភ្នំតាមដងអូរក្បែរផ្ទះកុមារភាពរបស់គាត់ ជាពេលដែលគាត់មានបទពិសោធន៍មួយ នាំឲ្យមានរបកគំហើយដ៏សំខាន់មួយ អំពីរបៀបដែលត្រីរកផ្លូវត្រឡប់ទៅអូរកំណើតរបស់វាវិញ ។
ពេលដើរឡើងភ្នំ ហួសទឹកជ្រោះដែលគាត់ចូលចិត្តកាលពីកុមារភាព ស្រាប់តែហាស្លឺរបាននឹកឃើញអនុស្សាវរីយមួយ ។ គាត់បាននិយាយថា « ខ្យល់ត្រជាក់បក់នាំក្លិនស្លែ និងផ្កា បក់ផាត់តាមចន្លោះថ្ម ទឹកធ្លាក់ដ៏ស្រស់ស្អាត នៅខាងមុខភ្នំ បានធ្វើឲ្យគាត់គិតឃើញពីរឿងមួយភ្លាមៗ » ។១
ក្លិនទាំងនេះបានដាស់អនុស្សាវរីយពីកុមារភាព ហើយបានរំឭកគាត់ពីផ្ទះកំណើត ។
គាត់បានទាញហេតុផលថា ប្រសិនបើក្លិននោះអាចគាស់កកាយការចងចាំបាន នោះក្លិននេះក៏អាចធ្វើឲ្យត្រីសាលម៉ុននឹកឃើញផ្លូវត្រឡប់ទៅអូរកំណើតរបស់វាដើម្បីពងវិញដែរ បន្ទាប់ពីនៅក្នុងសមុទ្រដ៏ល្វឹងល្វើយជាច្រើនឆ្នាំមកនោះ ។
ដោយផ្អែកលើបទពិសោធន៍នេះ ហាស្លឺរ ព្រមទាំងអ្នកស្រាវជ្រាវដទៃទៀត បានចាប់ផ្ដើមបង្ហាញថា ត្រីសាលម៉ុនចងចាំក្លិនទាំងនោះ ដែលនឹងជួយពួកវាឲ្យរកផ្លូវរាប់ពាន់គីឡូម៉ែត្រពីសមុទ្រ ដើម្បីត្រឡប់ទៅផ្ទះពួកវាវិញ ។
ដំណើររឿងនេះបានបណ្ដាលឲ្យខ្ញុំគិតថា រឿងដ៏សំខាន់បំផុតមួយដែលយើងអាចធ្វើនៅក្នុងជីវិតនេះគឺ ត្រូវស្គាល់ និងចាំផ្លូវត្រឡប់ទៅកាន់ព្រះវរបិតាសួគ៌យើងវិញ ហើយត្រូវខិតខំព្យាយាមដោយស្មោះត្រង់ និងរីករាយក្នុងដំណើរនេះ ។
ខ្ញុំបានគិតដល់ការរំឭកចំនួនបួន ដែលអាចដាស់អារម្មណ៍ឲ្យនឹកឃើញពីផ្ទះសួគ៌ារបស់យើង បើប្រើប្រាស់ និងអនុវត្តវាដោយខ្ជាប់ខ្ជួនក្នុងជីវិតយើងនោះ ។
ទីមួយ យើងអាចចងចាំថា យើងគឺជាកូនរបស់ព្រះ
យើងមានកេរដំណែលដ៏ទេវភាពមួយ ។ ការដឹងថាយើងជាកូនរបស់ព្រះ ហើយថាទ្រង់សព្វព្រះទ័យចង់ឲ្យយើងត្រឡប់ទៅកាន់វត្តមានរបស់ទ្រង់វិញ គឺជាជំហានដំបូងមួយនៅលើដំណើរត្រឡប់ទៅផ្ទះសួគ៌ារបស់យើងវិញ ។
សូមរំឭកខ្លួនបងប្អូនអំពីកេរដំណែលនេះ ។ សូមបង្កើតពេលវេលាឲ្យបានទៀងទាត់ដើម្បីបង្កើនប្រព័ន្ធការពារខាងវិញ្ញាណរបស់បងប្អូន ដោយការចងចាំពីពរជ័យទាំងឡាយ ដែលបងប្អូនបានទទួលពីព្រះអម្ចាស់ ។ សូមទុកចិត្តលើការណែនាំដែលបងប្អូនបានទទួលពីទ្រង់ ជាជាងការងាកទៅរកលោកិយទាំងស្រុងក្នុងការវាស់ពីតម្លៃផ្ទាល់ខ្លួន ហើយស្វែងរកផ្លូវរបស់បងប្អូននោះ ។
ថ្មីៗនេះ ខ្ញុំបានទៅសួរសុខទុក្ខមនុស្សជាទីស្រឡាញ់ម្នាក់ បន្ទាប់ពីគាត់បានចូលមន្ទីរពេទ្យ ។ គាត់បានប្រាប់ខ្ញុំដោយអារម្មណ៍ក្ដុកក្ដួលថា ពេលគាត់ដេកលើគ្រែមន្ទីរពេទ្យ អ្វីទាំងអស់ដែលគាត់ប្រាថ្នា គឺសូមឲ្យមាននរណាម្នាក់ច្រៀងបទ « ខ្ញុំជាកូនរបស់ព្រះ » ឲ្យគាត់ស្ដាប់ ។ គាត់បាននិយាយថា គំនិតនោះតែម្យ៉ាងបានផ្ដល់ភាពសុខសាន្ត ដែលគាត់ត្រូវការនៅក្នុងគ្រាដ៏ឈឺចាប់នោះ ។
ការដឹងថាបងប្អូនជានរណា ផ្លាស់ប្ដូរអ្វីដែលបងប្អូនមានអារម្មណ៍ និងអ្វីដែលបងប្អូនធ្វើ ។
ការយល់ដឹងថា បងប្អូនជានរណាប្រាកដ ជួយរៀបចំបងប្អូនកាន់តែប្រសើរ ដើម្បីស្គាល់ និងចងចាំផ្លូវរបស់បងប្អូនដើម្បីត្រឡប់ទៅផ្ទះសួគ៌ាវិញ ហើយចង់ទៅទីនោះយ៉ាងខ្លាំង ។
ទីពីរ យើងអាចចងចាំពីមូលដ្ឋានគ្រឹះដែលការពារយើង
កម្លាំងបានមក នៅពេលយើងបន្តមានភាពសុចរិត ទៀងត្រង់ និងស្មោះត្រង់ចំពោះព្រះវរបិតាសួគ៌ និងព្រះយេស៊ូវគ្រីស្ទ សូម្បីតែនៅពេលដែលមនុស្សដទៃមិនគោរពតាមបទបញ្ញត្តិ និងគោលការណ៍នៃសេចក្ដីសង្គ្រោះក្ដី ។២
នៅក្នុងព្រះគម្ពីរមរមន ហេលេមិនបានបង្រៀនពួកកូនប្រុសលោកឲ្យចងចាំថា ពួកគេត្រូវតែសង់គ្រឹះរបស់ពួកគេលើព្រះយេស៊ូវគ្រីស្ទ ដើម្បីមានកម្លាំងក្នុងការទប់ទល់នឹងការល្បួងរបស់មារសត្រូវ ។ ខ្យល់ព្យុះដ៏ខ្លាំងរបស់សាតាំងកំពុងតែបក់បោកមកលើយើង ប៉ុន្តែវានឹងគ្មានអំណាចអ្វីដើម្បីទាញយើងចុះនោះទេ ប្រសិនបើយើងដាក់ការទុកចិត្តរបស់យើងនៅកន្លែងដែលមានសុវត្ថិភាពបំផុត—គឺក្នុងព្រះអង្គប្រោសលោះរបស់យើង ។៣
ខ្ញុំបានដឹងមកពីបទពិសោធន៍ផ្ទាល់ខ្លួនថា នៅពេលយើងជ្រើសរើសស្ដាប់សំឡេងទ្រង់ និងធ្វើតាមទ្រង់ នោះយើងនឹងទទួលបានជំនួយពីទ្រង់ ។ យើងនឹងទទួលបានទស្សនវិស័យដែលកាន់តែទូលំទូលាយអំពីស្ថានភាពរបស់យើង ហើយយល់ដឹងកាន់តែជ្រាលជ្រៅអំពីគោលបំណងនៃជីវិតនេះ ។ យើងនឹងទទួលអារម្មណ៍បំផុសខាងវិញ្ញាណ ដែលនឹងដឹកនាំយើងទៅផ្ទះសួគ៌ារបស់យើងវិញ ។
ទីបី យើងអាចចងចាំអធិស្ឋានជានិច្ច
យើងរស់នៅក្នុងគ្រាមួយ ដែលដោយគ្រាន់តែចុច ឬបញ្ជាដោយសំឡេង គឺយើងអាចចាប់ផ្ដើមស្រាវជ្រាវរកចម្លើយបានស្ទើរតែគ្រប់ប្រធានបទ នៅក្នុងទិន្នន័យដ៏ធំសម្បើម ដែលត្រូវបានរក្សាទុក និងរៀបចំនៅក្នុងបណ្តាញកុំព្យូទ័រដ៏ធំ និងស្មុគស្មាញមួយ ។
ម្យ៉ាងទៀត យើងមានការអញ្ជើញដ៏សាមញ្ញឲ្យចាប់ផ្ដើមស្វែងរកចម្លើយពីស្ថានសួគ៌ ។ « ចូរអធិស្ឋានជានិច្ច យើងនឹងចាក់ព្រះវិញ្ញាណរបស់យើងមកលើអ្នក » ។ បន្ទាប់មកព្រះអម្ចាស់សន្យាថា « ហើយពររបស់អ្នកធំណាស់ហ្ន៎ — មែនហើយគឺច្រើនជាងអ្វីដែលអ្នកគប្បីបានទទួលនូវទ្រព្យសម្បត្តិពីផែនដី » ។៤
ព្រះត្រាស់ដឹងយ៉ាងពេញលេញពីយើងម្នាក់ៗ ហើយត្រៀមជាស្រេចដើម្បីស្ដាប់ការអធិស្ឋានរបស់យើង ។ ពេលយើងចងចាំអធិស្ឋាន នោះយើងរកឃើញសេចក្ដីស្រឡាញ់គាំទ្ររបស់ទ្រង់ ហើយកាលណាយើងអធិស្ឋានទៅព្រះវរបិតាសួគ៌នៅក្នុងព្រះនាមព្រះគ្រីស្ទកាន់តែច្រើនប៉ុណ្ណា នោះយើងនាំព្រះអង្គសង្គ្រោះចូលក្នុងជីវិតយើងកាន់តែច្រើនប៉ុណ្ណោះដែរ ហើយយើងនឹងស្គាល់ផ្លូវដែលទ្រង់បានគូសទៅកាន់ផ្ទះសួគ៌ារបស់យើងវិញកាន់តែច្បាស់ ។
ទីបួន យើងអាចចងចាំដើម្បីបម្រើមនុស្សដទៃទៀត
កាលដែលយើងព្យាយាមធ្វើតាមព្រះយេស៊ូវគ្រីស្ទ ដោយការបម្រើ និងការបង្ហាញចិត្តសប្បុរសទៅកាន់មនុស្សដទៃទៀត នោះយើងធ្វើឲ្យពិភពលោកក្លាយជាកន្លែងមួយកាន់តែល្អប្រសើរ ។
សកម្មភាពរបស់យើងអាចផ្ដល់ពរជ័យជាពិសេសដល់ជីវិតរបស់មនុស្សដែលនៅជុំវិញយើង និងជីវិតយើងផ្ទាល់ផងដែរ ។ ការបម្រើដោយសេចក្តីស្រឡាញ់ បន្ថែមអត្ថន័យដល់ជីវិតអ្នកផ្ដល់ឲ្យ និងជីវិតអ្នកទទួលផងដែរ ។
សូមកុំមើលស្រាលសក្ដានុពលដែលបងប្អូនមាន ក្នុងការជះឥទ្ធិពលល្អដល់មនុស្សដទៃទៀត ទាំងតាមរយៈការបម្រើដោយសកម្មភាព និងគំរូរបស់បងប្អូន ។
ការបម្រើដោយសេចក្តីស្រឡាញ់ដល់មនុស្សដទៃទៀត ដឹកនាំយើងឲ្យដើរតាមផ្លូវទៅកាន់ផ្ទះសួគ៌ារបស់យើង—ជាផ្លូវនៃការក្លាយដូចជាព្រះអង្គសង្គ្រោះរបស់យើង ។
ក្នុងឆ្នាំ ១៩៧៥ ជាលទ្ធផលនៃសង្គ្រាមស៊ីវិល អាណាលដូ និង យូជិនៀ ថេលេ ហ្គ្រីឡូ និងកូនៗរបស់ពួកគេត្រូវបង្ខំចិត្តចាកចោលផ្ទះ និងអ្វីៗទាំងអស់ដែលពួកគេបានខិតខំសាងឡើងអស់ជាច្រើនទសវត្សរ៍មកនោះ ។ ពេលត្រឡប់ទៅប្រទេសព័រទុយហ្គាល់ ជាប្រទេសកំណើតរបស់ពួកគេ បងប្រុស និងបងស្រី ថេលេ ហ្គ្រីឡូ បានប្រឈមនឹងឧបសគ្គនៃការចាប់ផ្ដើមជាថ្មីម្ដងទៀត ។ ប៉ុន្តែជាច្រើនឆ្នាំក្រោយមក បន្ទាប់ពីបានចូលរួមក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពួកគេបាននិយាយថា « យើងបានបាត់បង់អ្វីៗទាំងអស់ដែលយើងមាន ប៉ុន្តែវាជារឿងល្អ ដោយសារវាបានបង្ខំយើងឲ្យពិចារណាពីសារៈសំខាន់នៃពរជ័យដ៏អស់កល្បជានិច្ច » ។៥
ពួកគេបានបាត់បង់ផ្ទះនៅលើផែនដីរបស់ពួកគេ ប៉ុន្តែពួកគេបានរកឃើញផ្លូវត្រឡប់ទៅកាន់ផ្ទះសួគ៌ារបស់ពួកគេវិញ ។
មិនថាបងប្អូនត្រូវទុកចោលអ្វី ដើម្បីដើរតាមផ្លូវទៅផ្ទះសួគ៌ាវិញនោះទេ នៅថ្ងៃណាមួយ វានឹងមើលទៅដូចជាគ្មានការលះបង់អ្វីទាំងអស់ ។
យើងមានគំរូដ៏ឥតខ្ចោះរបស់ព្រះយេស៊ូវគ្រីស្ទដើម្បីធ្វើតាម ហើយដំណើរឆ្ពោះទៅកាន់ផ្ទះដ៏អស់កល្បរបស់យើង គឺអាចធ្វើទៅបាន តាមតែការបង្រៀនរបស់ទ្រង់ ព្រះជន្មរបស់ទ្រង់ និងពលិកម្មដ៏ធួនរបស់ទ្រង់ប៉ុណ្ណោះ—រួមមានការសុគត និងការមានព្រះជន្មរស់ឡើងវិញរបស់ទ្រង់ ។
ខ្ញុំសូមអញ្ជើញបងប្អូនឲ្យដកពិសោធន៍នូវអំណរនៃការចងចាំថា យើងជាកូនរបស់ព្រះ ហើយថាទ្រង់ស្រឡាញ់ពិភពលោកដល់ម្ល៉េះ បានជាទ្រង់បញ្ជូនព្រះរាជបុត្រារបស់ទ្រង់មក៦ឲ្យបង្ហាញផ្លូវដល់យើង ។ ខ្ញុំសូមអញ្ជើញបងប្អូនឲ្យចងចាំធ្វើជាមនុស្សស្មោះត្រង់ បង្វែរជីវិតទៅព្រះអង្គសង្គ្រោះ និងស្ថាបនាគ្រឹះរបស់បងប្អូននៅលើទ្រង់ ។ សូមចងចាំអធិស្ឋានជានិច្ចនៅក្នុងដំណើររបស់បងប្អូន ហើយបម្រើមនុស្សដទៃទៀតនៅតាមផ្លូវ ។
បងប្អូនប្រុសស្រីជាទីស្រឡាញ់ នៅថ្ងៃអាទិត្យបុណ្យអ៊ីស្ទើរនេះ ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទជាព្រះប្រោសលោះ និងជាព្រះអង្គសង្គ្រោះនៃពិភពលោកនេះ ។ ទ្រង់ជាអង្គដែលអាចជូនយើងទៅកាន់ជីវិតពេញដោយអំណរ ហើយដឹកនាំយើងនៅក្នុងដំណើររបស់យើង ។ ចូរយើងចងចាំ ហើយដើរតាមទ្រង់ត្រឡប់ទៅផ្ទះវិញ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕