នេះគឺជាពេលវេលារបស់យើង !
ព្រះបានចាត់យើងមកទីនេះ នៅពេលនេះ ក្នុងវេលាដ៏សំខាន់នេះក្នុងប្រវត្តិសាស្ត្រ ។
នៅក្នុងឆ្នាំ ១៩៧៨ ខ្ញុំបានឈរនៅទីលានបាល់ឱបក្នុងពហុកីឡាដ្ឋានដែលមានអ្នកគាំទ្រចូលរួមចំនួន ៦៥០០០ នាក់ ។ នៅពីមុខខ្ញុំមានគូប្រជែងធំៗជាច្រើនដែលមើលទៅដូចជាពួកគេចង់កាត់ក្បាលខ្ញុំចេញអញ្ចឹង ។ វាគឺជាការប្រកួតលើកទីមួយរបស់ខ្ញុំធ្វើជាខ្សែការពារនៅក្នុងការប្រកួតបាល់ឱបថ្នាក់ជាតិ ហើយយើងកំពុងលេងដណ្តើមពានរង្វាន់ជើងឯកសម្រាប់ Super Bowl ។ និយាយតាមត្រង់ ខ្ញុំបានសួរខ្លួនឯងថាតើខ្ញុំលេងល្អគ្រប់គ្រាន់ដើម្បីចូលទីលានឬទេ ។ ខ្ញុំបានថយក្រោយដើម្បីចោលបាល់ដំបូងទៅកាន់មិត្តរួមក្រុម ហើយពេលដែលខ្ញុំបានចោលបាល់ទៅហើយនោះ ខ្ញុំត្រូវបានគេរត់បុកខ្លាំងជាងពេលណាៗទាំងអស់ ។ ពេលដួលដេកនៅក្រោមពួកអត្តពលិកមាឌធំៗទាំងនោះ ខ្ញុំបានឆ្ងល់ថា តើខ្ញុំកំពុងធ្វើអ្វីនៅទីនោះ ។ ខ្ញុំត្រូវធ្វើការសម្រេចចិត្តមួយ ។ តើខ្ញុំនឹង អនុញ្ញាតឲ្យការសង្ស័យឈ្នះខ្ញុំ ឬតើខ្ញុំនឹងស្វែងរកភាពក្លាហាន និងកម្លាំងដើម្បីបន្តបោះជំហានទៅមុខទៀត ?
សារព័ត៌មាន ពាក់ព័ន្ធ
ពេលនោះខ្ញុំមិនដឹងថា បទពិសោធន៍នេះនឹងរៀបចំខ្ញុំសម្រាប់ឳកាសជាច្រើននាពេលអនាគតទេ ។ ខ្ញុំត្រូវរៀនថា ខ្ញុំអាចរឹងមាំ និងក្លាហាននៅពេលប្រឈមមុខនឹងស្ថានភាពដ៏លំបាកទាំងឡាយ ។
ការប្រកួតបាល់ឱបមួយអាចមិនសូវសំខាន់ដូចជាឧបសគ្គដែលបងប្អូននឹងប្រឈមមុខនោះទេ ។ ក្នុងករណីភាគច្រើន វាពុំមានកីឡាដ្ឋានដែលពេញដោយមនុស្សកំពុងមើលនោះទេ ។ ប៉ុន្តែការសម្រេចចិត្តដ៏អង់អាចរបស់បងប្អូននឹងមាននូវផលប៉ះពាល់ដ៏អស់កល្ប ។
ប្រហែលជាយើងពុំតែងតែមានអារម្មណ៍អាចឈ្នះទៅនឹងឧបសគ្គនោះឡើយ ។ ប៉ុន្តែព្រះវរបិតាសួគ៌ទតមកយើងជាអ្នកសាងសង់ដែលគ្មានភាពភ័យខ្លាចនៃនគររបស់ទ្រង់ ។ នោះហើយគឺជាមូលហេតុដែលទ្រង់បានចាត់យើងមកទីនេះក្នុងអំឡុងពេលដែលមានការសម្រេចចិត្តបំផុតនៅក្នុងប្រវត្តិសាស្ត្រពិភពលោកនេះ ។ នេះគឺជាពេលវេលារបស់យើង !
សូមស្តាប់នូវអ្វីដែលប្រធាន រ័សុល អិម ណិលសុន បានមានប្រសាសន៍ភ្លាមៗបន្ទាប់ពីបានក្លាយជាប្រធាននៃសាសនាចក្រ ៖ « ព្រះអង្គសង្គ្រោះ និងព្រះដ៏ប្រោសលោះរបស់យើង ព្រះយេស៊ូវគ្រីស្ទ នឹងធ្វើកិច្ចការដ៏អស្ចារ្យបំផុតរបស់ទ្រង់មួយចំនួននៅចន្លោះពេលនេះ និងពេលដែលទ្រង់យាងមកម្ដងទៀត ។ យើងនឹងឃើញការបង្ហាញដ៏អស្ចារ្យថា ព្រះជាព្រះវរបិតា និងព្រះរាជបុត្រាស្ងួនភ្ញារបស់ទ្រង់ព្រះយេស៊ូវគ្រីស្ទធ្វើជាអធិបតីលើសាសនាចក្រនេះដោយភាពរុងរឿង និងសិរីល្អ » ។ ( « Revelation for the Church, Revelation for Our LivesLiahonaខែឧសភា ឆ្នាំ ២០១៨, ទំព័រ ៩៦ ) ។
កិច្ចការដ៏អស្ចារ្យឬ ? ការបង្ហាញដ៏អស្ចារ្យឬ ? តើស្ថានភាពនោះនឹងដូចជាអ្វីទៅ ? តើយើងនឹងដើរតួជាអ្វី ហើយតើយើងនឹងដឹងនូវអ្វីដែលត្រូវធ្វើយ៉ាងដូចម្តេច ? ខ្ញុំមិនដឹងពីចម្លើយទាំងអស់នោះទេ ប៉ុន្ដែខ្ញុំដឹងថាព្រះអម្ចាស់ត្រូវការឲ្យយើងត្រៀមខ្លួន ! ការអនុវត្តអំណាចបព្វជិតភាពយ៉ាងសក្តិសមពុំដែលមានសារៈសំខាន់ខ្លាំងជាងពេលនេះទេ ។
តើយើងជឿលើព្យាការីរបស់ព្រះដែរទេ ? តើយើងអាចរកឃើញ និងបំពេញជោគវាសនារបស់យើងបានទេ ? បាទ យើងអាច និងបាទ យើងត្រូវតែអាច ពីព្រោះនេះគឺជាពេលវេលារបស់យើង !
នៅពេលយើងឮនូវរឿងរ៉ាវពីអ្នកបម្រើដ៏អស្ចារ្យរបស់ព្រះដែលបានមកពីមុនយើង—ដូចជា ម៉ូសេ, ម៉ារា, មរ៉ូណៃ, អាលម៉ា, អេធើ, យ៉ូសែប, និងអ្នកផ្សេងជាច្រើនទៀត—ពួកលោកហាក់ដូចជាសំខាន់ខ្លាំងណាស់ ។ ប៉ុន្តែពួកលោកពុំមានភាពខុសប្លែកពីពួកយើងឡើយ ។ ពួកលោកក៏ជាមនុស្សធម្មតាដែលបានប្រឈមមុខនឹងឧបសគ្គទាំងឡាយដែរ ។ ពួកលោកបានដាក់ទីទុកចិត្តលើព្រះអម្ចាស់ ។ ពួកលោកបានធ្វើការសម្រេចចិត្តដ៏ត្រឹមត្រូវនៅពេលដ៏សំខាន់ក្រៃលែង ។ ហើយជាមួយនឹងសេចក្តីជំនឿនៅលើព្រះយេស៊ូវគ្រីស្ទ ពួកលោកបានធ្វើកិច្ចការដែលតម្រូវនៅក្នុងជំនាន់របស់ពួកលោក ។
ហ្គូដសល
ពិចារណាពីវីរៈបុរស យ៉ូស្វេ នៅក្នុងព្រះគម្ពីរសញ្ញាចាស់ ។ លោកគឺជាអ្នកដើរតាមដ៏ស្មោះស្ម័គ្ររបស់ ម៉ូសេ ជាអ្នកដឹកនាំម្នាក់ដ៏អស្ចារ្យបំផុតនៅក្នុងប្រវត្តិសាស្ត្រ ។ បន្ទាប់ពីម៉ូសេបានស្លាប់ទៅ វាគឺជាពេលវេលារបស់ យ៉ូស្វេ ។ លោកត្រូវបានចាត់ឲ្យដឹកនាំកូនចៅអ៊ីស្រាអែលទៅកាន់ដែនដីសន្យា ។ តើគាត់នឹងធ្វើតាមរបៀបណា ? យ៉ូស្វេ បានកើត និងចិញ្ចឹមធំឡើងជាទាសករនៅប្រទេសអេស៊ីព្ទ ។ លោកពុំមានសៀវភៅក្បួនខ្នាត ឬ វីដេអូបង្រៀនដើម្បីជួយលោកនោះទេ ។ លោកក៏ពុំមានសូម្បីតែទូរសព្ទដៃទំនើប ! ប៉ុន្តែលោកពិតជាមានការសន្យានេះពីព្រះអម្ចាស់ ៖
« យើងនឹងនៅជាមួយនឹងឯង ដូចជាបាននៅជាមួយនឹងម៉ូសេដែរ យើងមិនដែលខាននឹងប្រោសឯងក៏មិនដែលបោះបង់ចោលឯងឡើយ ។
« ចូរឲ្យមានកំឡាំង និងចិត្តក្លាហានចុះ » ( យូស្វេ ១:៥–៦ ) ។
កាលខ្ញុំទើបបានក្លាយជាក្រុមចិតសិបថ្មី ពុំមានបទពិសោធន៍ ខ្ញុំបានទទួលទូរសព្ទបន្ទាន់មួយមកពីការិយាល័យរបស់គណៈប្រធានទីមួយ សុំឲ្យខ្ញុំនឹងធ្វើជាតំណាងឲ្យព្យាការីទៅជួបយុវជនម្នាក់នៅឯមន្ទីរពេទ្យ—ភ្លាមៗ ។ យុវជននោះឈ្មោះ ហ្សាក់ ។ គាត់បានរៀបចំដើម្បីក្លាយជាអ្នកផ្សាយសាសនា ប៉ុន្តែបានជួបគ្រោះថ្នាក់ និងបានរងរបួសក្បាលធ្ងន់ធ្ងរ ។
នៅពេលខ្ញុំបើកឡានទៅមន្ទីរពេទ្យ ខ្ញុំបានគិតភ្លាមថា តើត្រូវនិយាយអ្វី ។ ធ្វើកិច្ចការសម្រាប់ព្យាការី—តើអ្នកនិយាយលេងទេឬអី ? តើខ្ញុំនឹងត្រូវប្រឈមមុខនឹងអ្វី ? តើខ្ញុំនឹងជួយយុវជននេះដោយរបៀបណា ? តើខ្ញុំមានសេចក្តីជំនឿគ្រប់គ្រាន់ដែរឬទេ ? ការអធិដ្ឋានដ៏ក្លៀវក្លា និងចំណេះដឹងដែលខ្ញុំមានអំពីសិទ្ធិអំណាចនៃបព្វជិតភាពដ៏បរិសុទ្ធបានក្លាយជាយុថ្ការបស់ខ្ញុំ ។
ហ្សាក់ កំពុងតែគេងនៅលើគ្រែក្នុងមន្ទីរពេទ្យ ពេលខ្ញុំទៅដល់ ។ អ្វីៗបានត្រៀមរួចរាល់ ដើម្បីនាំគាត់ចូលទៅបន្ទប់វះកាត់ ឲ្យវេជ្ជបណ្ឌិតអាចបន្ថយសម្ពាធលើខួរក្បាលរបស់គាត់ ។ ខ្ញុំបានឃើញម្តាយគាត់ពោរពេញដោយទុក្ខក្រៀមក្រំ និងមិត្តម្នាក់ដែលពេញដោយភាពភ័យខ្លាច កំពុងតែឈរនៅក្បែរនោះ ហើយខ្ញុំបានដឹងយ៉ាងច្បាស់ថា ហ្សាក់ ត្រូវការការប្រសិទ្ធពរពីបព្វជិតភាព ។ មិត្តរបស់គាត់ទើបតែទទួលបានបព្វជិតភាពម៉ិលគីហ្សាដែកថ្មីៗនេះ ដូច្នេះខ្ញុំបានសុំឲ្យគាត់ជួយខ្ញុំ ។ ខ្ញុំមានអារម្មណ៍នៃអំណាចនៃបព្វជិតភាពនៅពេលយើងបានប្រសិទ្ធិពរ ហ្សាក់ ដោយចិត្តរាបសារ ។ បន្ទាប់មកគាត់ត្រូវបាននាំយកទៅយ៉ាងលឿនសម្រាប់ធ្វើការវះកាត់ ហើយអារម្មណ៍នៃភាពសុខសាន្តមួយបានបញ្ជាក់ថា ព្រះអង្គសង្គ្រោះនឹងដោះស្រាយអ្វីៗទៅតាមប្រាជ្ញារបស់ទ្រង់ ។
បុគ្គលិកពេទ្យបានធ្វើការថតកាំរស្មីអ៊ិចជាលើកចុងក្រោយ ពីមុនការធ្វើការវះកាត់ដំបូង ។ ជាការភ្ញាក់ផ្អើល បុគ្គលិកពេទ្យបានរកឃើញថា ពុំបាច់ធ្វើការវះកាត់នោះទេ ។
បន្ទាប់ការព្យាបាលច្រើនមក ហ្សាក់បានរៀនដើរ និងនិយាយម្តងទៀត ។ គាត់បានបម្រើបេសកកម្មយ៉ាងជោគជ័យមួយ ហើយឥឡូវមានគ្រួសារមួយដ៏ល្អ ។
ពិតប្រាកដណាស់ នោះពុំមែនជាលទ្ធផលដែលតែងតែកើតឡើងនោះទេ ។ ខ្ញុំបានផ្តល់ពរជ័យបព្វជិតភាពផ្សេងទៀតដោយជំនឿដូចគ្នា ហើយព្រះឆន្ទៈរបស់ព្រះអម្ចាស់គឺពុំផ្តល់ឲ្យនូវការព្យាបាលជាសៈស្បើយនៅក្នុងជីវិតនេះទេ ។ យើងទុកចិត្តលើព្រះគោលបំណងរបស់ទ្រង់ ហើយទុកលទ្ធផលថ្វាយដល់ទ្រង់ ។ យើងមិនអាចជ្រើសរើសលទ្ធផលពីសកម្មភាពរបស់យើងជានិច្ចនោះទេ ប៉ុន្តែយើងអាចជ្រើសរើសត្រៀមខ្លួនជាស្រេចដើម្បីធ្វើសកម្មភាព ។
បងប្អូនប្រហែលជាមិនធ្លាប់ត្រូវបានសុំដោយគណៈប្រធានទីមួយឲ្យធ្វើជាតំណាងពួកគាត់ក្នុងស្ថានភាពដែលគំរាមកំហែងដល់អាយុជីវិតបែបនេះទេ ។ ប៉ុន្តែយើងត្រូវបានហៅឲ្យធ្វើនូវរឿងដែលផ្លាស់ប្តូរជីវិតក្នុងនាមជាតំណាងនៃព្រះអម្ចាស់ ។ ទ្រង់នឹងមិនបង្ខំយើងឡើយ ។ នេះគឺជាពេលវេលារបស់យើង !
ពេត្រុស ជាសាវកច្បងរបស់ព្រះអង្គសង្គ្រោះបានស្ថិតនៅលើទូក កាលលោកបានឃើញព្រះគ្រីស្ទយាងលើទឹកនោះ ? គាត់ចង់ចូលរួមជាមួយទ្រង់ដែរ ហើយព្រះអង្គសង្គ្រោះបានមានបន្ទូលថា « ចូរមកចុះ » ។ ដោយភាពក្លាហាន និងអព្ភូតហេតុ ពេត្រុស បានចុះពីទូក ហើយចាប់ផ្តើមដើរទៅកាន់ព្រះអង្គសង្គ្រោះ ។ ប៉ុន្តែនៅពេលពេត្រុស បានផ្តោតចិត្តលើខ្យល់បក់ជាខ្លាំង នោះ សេចក្តីជំនឿរបស់គាត់បានធ្លាក់ចុះ ។ « គាត់មានចិត្តភ័យ ហើយដោយព្រោះចាប់តាំងលិចទៅបានជាគាត់ស្រែកឡើងថា ព្រះអម្ចាស់អើយសូមជួយសង្គ្រោះទូលបង្គំផង ។ ស្រាប់តែព្រះយេស៊ូវ ទ្រង់លូកព្រះហស្តរបស់ទ្រង់ទៅចាប់គាត់ភ្លាម » ។ សូមមើល ម៉ាថាយ ១៤:២២–៣៣ ។
ពេលមានសេចក្តីលំបាកនៅក្នុងជីវិត តើការផ្តោតយកចិត្តទុកដាក់របស់យើងទៅទីណា ? សូមចងចាំថា យើងតែងតែមាននូវប្រភពនៃកម្លាំង និងភាពក្លាហានមួយដែលអាចពឹងពាក់បាន ។ ព្រះហស្តរបស់ទ្រង់លាតសន្ធឹងមក រកយើងដូចដែលបានលាតសន្ធឹងទៅរកពេត្រុសដែរ ។ នៅពេលដែលយើងឈោងទៅរកទ្រង់ នោះព្រះអង្គនឹងជួយសង្គ្រោះយើងដោយសេចក្តីស្រឡាញ់ ។ ពួកយើងគឺជារបស់ទ្រង់ ។ ទ្រង់បានមានបន្ទូលថា « កុំឲ្យខ្លាចឡើយ ដ្បិតយើងបានលោះឯងហើយ យើងបានហៅចំឈ្មោះឯង ឯងជារបស់ផងអញ » ( អេសាយ ៤៣:១ ) ។ ទ្រង់នឹងឈ្នះនៅក្នុងជីវិតរបស់បងប្អូន ប្រសិនបើបងប្អូនអនុញ្ញាតឲ្យ ។ ជម្រើសនោះគឺជារបស់បងប្អូន ! ( សូមមើល រ័សុល អិម ណិលសុន « ទុកឲ្យព្រះឈ្នះ »Liahonaខែ វិច្ឆិកា ឆ្នាំ ២០២០ ទំព័រ ៩២–៩៥ ) ។
នៅចុងបញ្ចប់នៃជីវិតរបស់លោក យ៉ូស្វេ បានអង្វរប្រជាជនរបស់លោកថា « ចូររើសយកព្រះណាដែលឯងចង់គោរពប្រតិបត្តិតាមនៅ ថ្ងៃនេះចុះ … តែឯយើង និងពួកគ្រួយើង យើងនឹងគោរពប្រតិបត្តិដល់ ព្រះយេហូវ៉ា តែមួយប៉ុណ្ណោះ » ( យ៉ូស្វេ ២៤:១៥ ) ។ ពីព្រោះតែជម្រើសដែលគាត់បានជ្រើសដើម្បីបម្រើព្រះអម្ចាស់ នោះយ៉ូស្វេបានក្លាយជាអ្នកដឹកនាំដ៏អស្ចារ្យបំផុតក្នុងជំនាន់របស់លោក ។ មិត្តជាទីស្រឡាញ់របស់ខ្ញុំអើយ នេះគឺជាពេលវេលារបស់យើងហើយ ! ហើយជម្រើសដែលយើងនឹងបញ្ជាក់ពីជោគវាសនារបស់យើង ( ថូម៉ាស អេស ម៉នសុន «Decisions Determine Destinyការប្រជុំ វិសេសសាកលវិទ្យាល័យ ព្រិកហាំ យ៉ង់ ថ្ងៃទី ៦ ខែ វិច្ឆិកា ឆ្នាំ ២០០៥ ] speeches.byu.edu ) ។
ខណៈពេលដែលខ្ញុំកំពុងបម្រើជាប៊ីស្សព យើងមានបាវចនាមួយនៅក្នុងវួដរបស់យើង ៖ ជម្រើសល្អស្មើហ្នឹងសុភមង្គល—ដ៏អស់កល្បជានិច្ច ។ មានយុវវ័យដើរកាត់ខ្ញុំនៅក្នុងសាលប្រជុំដោយនិយាយថា « ប៊ីស្សព ខ្ញុំកំពុងធ្វើការជ្រើសរើសល្អ ! » នោះជាក្តីសុបន្តិរបស់ប៊ីស្សព !
តើយើងចង់មានន័យថាម៉េច « ជម្រើសល្អ » ហ្នឹង ? មានមនុស្សម្នាក់បានសួរព្រះយេស៊ូវថា « តើបញ្ញត្តិណាដែលយ៉ាងសំខាន់បំផុត ? » ទ្រង់បានឆ្លើយថា ៖
« ត្រូវឲ្យស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង ។
នេះជាបញ្ញត្តយ៉ាងសំខាន់ទី១ ។
« ហើយបញ្ញត្តទី២ក៏បែបដូចគ្នាគឺថា ត្រូវឲ្យស្រឡាញ់អ្នកជិតខាងដូចខ្លួនឯង » ( ម៉ាថាយ ២២:៣៦–៣៩ ) ។
ខ្ញុំពុំដឹងអំពីបងប្អូនទេ ប៉ុន្តែពេលខ្ញុំអានបញ្ញត្តដ៏សំខាន់ទាំងពីរនេះ ខ្ញុំរកឃើញបញ្ញត្តទី៣ ដែលបរិយាយថា ៖ ចូរស្រឡាញ់ខ្លួនឯង ។
តើអ្នកធ្លាប់គិតថាការស្រឡាញ់ខ្លួនឯងជាបញ្ញត្តមួយដែរឬទេ ? តើយើងពិតជាអាចស្រឡាញ់ព្រះ និងស្រឡាញ់បុត្រាបុត្រីរបស់ទ្រង់ទេ ប្រសិនបើយើងពុំស្រឡាញ់ខ្លួនយើងផងហ្នឹង ?
អ្នកដឹកនាំដ៏ឈ្លាសវៃម្នាក់នាពេលថ្មីៗនេះ បានផ្តល់ដំបូន្មានដល់បុរសម្នាក់ដែលព្យាយាមយកឈ្នះលើជម្រើសដែលមិនល្អអស់ជាច្រើនឆ្នាំ ។ គាត់មានអារម្មណ៍ខ្មាស់អៀន និងសង្ស័យថា តើគាត់សមនឹងទទួលបានការស្រឡាញ់ពីនរណាម្នាក់ដែរទេ ។
អ្នកដឹកនាំគាត់បានប្រាប់គាត់ថា « ព្រះអម្ចាស់ស្គាល់អ្នក ស្រឡាញ់អ្នក ហើយរីករាយ [ ជាមួយ ] អ្នក និងជំហានដ៏ក្លាហានដែលអ្នកកំពុងតែដើរ » ។ ប៉ុន្តែគាត់បានបន្ថែមទៀតថា « [ អ្នក ] ត្រូវស្តាប់នូវបញ្ញត្តឲ្យស្រឡាញ់ខ្លួនឯង ដូច្នេះអ្នកអាចដឹងអារម្មណ៍នៃសេចក្តីស្រឡាញ់របស់ [ ព្រះ ] និងស្រឡាញ់អ្នកដទៃ » ។
នៅពេលដែលបងប្រុសដ៏ល្អនេះបានឮដំបូន្មាននោះ គាត់បានឃើញជីវិតដោយភ្នែកថ្មី ។ ក្រោយមកគាត់មានប្រសាសន៍ថា « ខ្ញុំបានចំណាយពេលពេញមួយជីវិតព្យាយាមស្វែងរកភាពសុខសាន្ត និងការទទួលយក ។ ខ្ញុំបានស្វែងរកអ្វីទាំងនោះនៅកន្លែងខុស ។ មានតែនៅក្នុងសេចក្ដីស្រឡាញ់របស់ព្រះវរបិតាសួគ៌ និងព្រះអង្គសង្គ្រោះទេដែលខ្ញុំអាចស្វែងរកការលួងលោមបាន ។ ខ្ញុំដឹងថាពួកទ្រង់ចង់ឲ្យខ្ញុំស្រឡាញ់ខ្លួនឯង វាគឺពិតជាវិធីតែមួយគត់ដែលខ្ញុំអាចទទួលអារម្មណ៍នៃសេចក្តីស្រឡាញ់របស់ពួកទ្រង់សម្រាប់ខ្ញុំ » ។
ព្រះវបិតាសួគ៌ចង់ឲ្យយើងស្រឡាញ់ខ្លួនឯង—ក៏ពុំមែនចង់ឲ្យយើងក្លាយជា មនុស្សឆ្មើងឆ្មៃ ឬ អាត្មានិយមឡើយ ប៉ុន្តែឲ្យយើងឃើញខ្លួនឯងតាមរបៀបដែលទ្រង់ទតឃើញយើង ៖ យើងជាបុត្រាបុត្រីដ៏ជាទីស្រឡាញ់របស់ព្រះអង្គ ។ ពេលសេចក្តីពិតនេះបានកប់ចុះជ្រៅក្នុងបេះដូងយើង សេចក្តីស្រឡាញ់របស់យើងចំពោះព្រះក៏លូតលាស់ឡើងដែរ ។ ពេលយើងមើលមកខ្លួនឯងដោយការគោរពដ៏ស្មោះ នោះបេះដូងរបស់យើងបើកដើម្បីប្រព្រឹត្តទៅលើអ្នកដទៃតាមរបៀបដូចគ្នានោះដែរ ។ ពេលយើងកាន់តែស្គាល់តម្លៃដ៏ទេវភាពរបស់ខ្លួន នោះយើងនឹងយល់សេចក្តីពិតដ៏ទេវភាពនេះកាន់តែប្រសើរ ៖ ថាព្រះបានបញ្ចូនយើងមកទីនេះ ពេលនេះនៅពេលដ៏សំខាន់នេះ ក្នុងប្រវត្តិសាស្ត្រ ដើម្បីយើងអាចធ្វើនូវអ្វីដែលល្អបំផុតជាមួយនឹងទេពកោសល្យ និងអំណោយទានទាំងឡាយដែលយើងមាន ។ នេះគឺជាពេលវេលារបស់យើង ! ( សូមមើល រ័សុល អិម ណិលសុន « Becoming True Millennialsការប្រជុំធម្មនិដ្ឋានទូទាំងពិភពលោកសម្រាប់ពួកយុវមជ្ឈិមវ័យ ថ្ងៃទី១០ ខែ មករា ឆ្នាំ ២០១៦ ] នៅគេហទំព័រ broadcasts.ChurchofJesusChrist.org ) ។
យ៉ូសែប ស្ម៊ីធ បានបង្រៀនថា គ្រប់ព្យាការីនៅគ្រប់ជំនាន់ « ទន្ទឹងរង់ចាំដោយចិត្តអំណរដល់ថ្ងៃដែលយើងនឹងរស់នៅ … ដែលពួកគេបានច្រៀង និងសរសេរ និងព្យាករអំពីជំនាន់របស់យើងនេះ … យើងជារាស្ដ្រដែលព្រះបានសព្វព្រះទ័យ [ ជ្រើសរើស ] ដើម្បីនាំមកនូវសិរីល្អថ្ងៃចុងក្រោយ » ( Teachings of Presidents of the Church: Joseph Smith២០០៧ ], ទំព័រ ១៨៦ ) ។
ពេលបងប្អូនប្រឈមមុខនឹងឧបសគ្គប្រចាំថ្ងៃ សូមចងចាំពីការធានានេះដែលបានផ្តល់ឲ្យដោយ អែលឌើរ ជែហ្វ្រី អ័រ ហូឡិន ៖ « មានអ្វីច្រើនណាស់ស្ថិតនៅលើស្មារយើង ប៉ុន្តែវានឹងជាបទពិសោធន៍ដ៏ជោគជ័យ និងរុងរឿង ។ … ជោគជ័យក្នុងការប្រកួតចុងក្រោយនេះ បានធ្វើការប្រកាសរួចរាល់អស់ហើយ ។ ជោគជ័យគឺត្រូវបានកត់ត្រាទុករួចហើយ…នៅក្នុងព្រះគម្ពីរ ! » ( « Be Not Afraid, Only Believe »[ សុន្ទរកថាទៅកាន់ គ្រូបង្រៀនខាងសាសនារបស់ប្រព័ន្ធអប់រំសាសនាចក្រ ថ្ងៃទី ៦ ខែកុម្ភៈ ឆ្នាំ២០១៥ ] broadcasts.ChurchofJesusChrist.org ) ។
នៅចុងសប្តាហ៍ បុណ្យអ៊ីស្ទើរ ដ៏ ស្រស់ស្អាតនេះ ខ្ញុំសូមផ្ដល់ការអញ្ជើញឲ្យយើងទាំងអស់គ្នាអធិស្ឋានដើម្បីទទួលស្គាល់ និងឱបក្រសោបយកតួនាទីរបស់យើងម្នាក់ៗ នៅពេលយើងរៀបចំសម្រាប់ថ្ងៃដ៏រុងរឿង នៅពេលដែលព្រះអង្គសង្គ្រោះយាងមកម្ដងទៀត ។ ព្រះអម្ចាស់ស្រឡាញ់យើងជាងយើងអាចយល់បាន ហើយទ្រង់នឹងឆ្លើយតបការអធិស្ឋានរបស់យើង ! យើងនៅលើទីលានបាល់ឱប នៅក្នុងមន្ទីរពេទ្យ ឬ នៅកន្លែងផ្សេងទេ យើងអាចជាផ្នែកដ៏សំខាន់នៃព្រឹត្តការណ៍ដ៏អស្ចារ្យទាំងនេះ—ពីព្រោះនេះគឺជាពេលវេលារបស់យើង ! នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕