Mwakoro aika Rineaki man ana
Boki Mote

1 Ana taeka te Atua, are e taekin nakon Mote n te tai are e uotaki nako Mote nakon te maunga ae moan te rietata,

2 Ao e noora te Atua ni kaaitara ma ngaia, ao e taetae ma ngaia, ao mimitongin te Atua e mena i aon Mote; ngaia are e a kona Mote ni mena i matana.

3 Ao e taetae te Atua nakon Mote, ni kangai: Nooria, Ngai te Uea ae te Atua ae Moan te Mwaaka, ao arau Akea Tokina; bwa akea moan au bong ke akea tokin au ririki; ao tiaki bon anne akea tokina?

4 Ao, nooria, bon natiu ngkoe; ngaia are taraia, ao N na kaoti nakoim bwaai ake I a tia ni kariki n oin baiu; ma tiaki ni kabane, bwa akea tokin au mwakuri, ao au taeka naba, bwa a aki totoki.

5 Ngaia are, akea te aomata ae kona n noori au mwakuri ni kabane, ma ti ngkana e noora mimitongiu ni kabane, ao akea te aomata ae kona n noora mimitongiu ni kabane, ao e na tiku ni maiu i aon te aba i mwina.

6 Ao iai te mwakuri ae N na anganiko, Mote, ae natiu; ao ti te arona ngkoe ma au Rikitemanna, ao au Rikitemanna bon ngaia ao ngaia ae na riki bwa te Tia Kamaiu, bwa e onrake n te akoi ao te koaua, ma bon akea riki temanna te Atua irarikiu, ao a mena bwaai ni kabane i matau, bwa I atai ni kabane.

7 Ao ngkai, nooria, iai teuana te bwai ae N na kaotia nakoim, Mote, ae natiu, ibukina bwa ko mena n te aonaba, ao ngkai N na kaotia nakoim.

8 Ao e koro bukina bwa Mote e taraia, ao e noora te aonaba are e karikaki i aona; ao Mote e noora te aonaba ao tabotabona nako, ao natiia aomata ni kabane ake a karikaki, ao ake a tia ni karikaki; ao e korakora miimina ao kubanakona n aei.

9 Ao te Atua e kitana Mote, n te aro are akea mimitongina iroun Mote; ao e tiku n ti ngaia Mote. Ao ngke e tiku n ti ngaia, ao e a bwaka nako aontano.

10 Ao e koro bukina bwa i nanon te maan ae aoa aika a mwaiti i mwaain ae okira korakorana n aomata Mote n aron te aomata, ao e taku i bon irouna: Ngkai, man aio I a ataia bwa akea manen te aomata, te bwai ae I tuai ma ni kaman iangoia.

11 Ma ngkai a tia oin matau n noora te Atua; ma tiaki matau n aomata, ma matau n tamnei, bwa matau n aomata e aki kona n noria bwa N na riai n rai ao ni mate i matana; ma e mena mimitongina i aou; ao I noora ubuna, ibukina bwa I onikaki i matana.

12 Ao e koro bukina bwa ngke e tia n taekini taeka aikai Mote, nooria, e roko Tatan ni kariria, ni kangai: Mote, ae natin te aomata, taromauriai.

13 Ao e koro bukina bwa Mote e tara Tatan ao e taku: Antai ngkoe? Bwa nooria, ngai natin te Atua, ae ti te arona ma ana Rikitemanna, ao enga mimitongim, bwa N na taromauriko?

14 Bwa nooria, I aki kona n tara te Atua, ma ti ngkana e mena mimitongina i aou, ao I bon onikaki i matana. Ma I kona n taraiko n te aro n aomata. Ni koauana, tiaki arona anne?

15 E kakabwaiaaki aran Atuau, bwa e aki kitanai raoi tamneina, ke e mena ia mimitongim, bwa bon te rotongitong irou? Ao I ataa te kaokoro i marenam ma te Atua; bwa e taku te Atua nakoiu: Taromauria te Atua, bwa ti ngaia ae ko na toro irouna.

16 Kararoako Tatan, tai mwamwanaai; bwa e taku te Atua nakoiu: Bon ti te arona ngkoe ma au Rikitemanna.

17 Ao e anganai naba tua ngke e weteai mai buakon te buakoako are ura, ni kangai: Wetea te Atua n aran au Rikitemanna, ao taromauriai.

18 Ao e a manga taku Mote: N na aki toki ni wetea te Atua, iai bwaai riki tabeua ae N na titirakinna: bwa e a tia ni mena mimitongina i aou, ngaia are I ataa te kaokoro imarenana ma ngkoe. Nako mai ikai, Tatan.

19 Ao ngkai, ngke e tia Mote n taekini taeka aikai, e takarua n te bwana ae korakora Tatan, ao e tatakarua n te aro ni iowawa i aon te aonaba, ao e tua, ni kangai: Ngai te Rikitemanna, taromauriai.

20 Ao e koro bukina bwa e a moanna ni korakora maakun Mote, ao ngke e a moanna ni maaku, e noora ana karawawata moone. Ma e ngae n anne, ngke e wetea te Atua, e karekea korakorana, ao e tua, ni kangai: Nako mai irou, Tatan, bwa ti aio te Atua ae N na taromauria, are bon Atuan te mimitong.

21 Ao ngkai e a moanna n ruru Tatan, ao e mwaeiei te aonaba; ao e karekea korakorana Mote, ao e wetea te Atua, ni kangai: N aran te Rikitemanna, nako mai ikai, Tatan.

22 Ao e koro bukina bwa e takarua n te bwana ae korakora Tatan, ma te tang, ao te tatakarua, ao te kangenge wii; ao e nako mai ikekei, mai matan naba Mote, n te aro are e a aki nooria.

23 Ao ngkai ibukin aio e kaota koauana Mote, ma ibukin buakakaia ao akea irouia natiia aomata.

24 Ao e koro bukina bwa ngke e nako Tatan mai matan Mote, e euta matana Mote n tara karawa, bwa e kaonaki n te Tamnei ae Raoiroi, are e kaota koauan te Tama ao te Nati;

25 Ao ngke e wetea aran te Atua, e a manga noora mimitongina, bwa e mena i aona; ao e ongo te bwana, ae kangai: Ko a kakabwaiaaki, Mote, bwa Ngai, are Moan te Mwaaka, I a tia n rineiko, ao ko na kakorakoraaki nakon raan aika mwaiti; bwa a na ongo n am taeka kanga ae ai aron te Atua ngkoe.

26 Ao nooria, I memena iroum, ni karokoa tokin am bong; bwa ko na kainaomataia au botanaomata man te tautoronaki, ae Iteraera are I rineia.

27 Ao e koro bukina, bwa ngke e tabe n taetae te bwana, e euta matana Mote ao e noora te aonaba, eng, ni kabanea, ao bon akea mwakorona ae uarereke ae e aki nooria, bwa e nooria mai iroun Tamnein te Atua.

28 Ao e nooriia naba kaaina, ao bon akea te aomata ae e aki nooria; ao e nooriia mai iroun Tamnein te Atua; ao e korakora mwaitia, ao aki kona ni warekaki mwaitia n ai aron te tano i mataniwin taari.

29 Ao e noori aaba aika mwaiti; ao aaba n tatabeua nako a bon aranaki bwa te aonaba, ao bon iai kaain aoia.

30 Ao e koro bukina bwa Mote e wetea te Atua, ni kangai: Tuangai, I butiko, a kanga n riki bwaai aikai, ao tera ae ko karaoi mai iai.

31 Ao nooria, e mena mimitongin te Uea i aon Mote, n te aro are Mote e tei i matan te Atua, ao e kaaitara ma ngaia n taetae. Ao te Uea ae te Atua e taku nakon Mote: Ibukin oin au kaantaninga ae I karaoi bwaai aikai. Aio bon te wanawana ao e tiku irou.

32 Ao man te taeka ni mwaakau, are bon Natiu ae te Rikitemanna, I a tia ni karikiia, are e onrake n te akoi ao te koaua.

33 Ao aonaba ake aki kona ni warekaki I a tia ni kariki; ao I karikiia naba ibukin oin au kaantaninga; ao I karikiia mai iroun te Nati, are bon au Rikitemanna.

34 Ao te moan aomata mai buakoia aomata I aranna bwa Atam, are bon e mwaiti.

35 Ma ti rongorongon te aonaba aei, ao kaaina, are N na anganiko. Bwa nooria, a boni mwaiti aonaba ake a tia ni bua iroun te taeka ni mwaakau. Ao a mwaiti aika a tei ngkai, ao aki kona ni warekaki iroun te aomata, ma bwaai ni kabane a kona ni warekaki irou, bwa bon au bwai ao I ataiia.

36 Ao e koro bukina bwa e taetae Mote nakon te Uea, ni kangai: Nanoanga am toro, O te Atua, ao tuangai taekan te aonaba aei, ao kaaina, ao karawa naba, ao ngkanne e na rau nanon am toro.

37 Ao e taetae te Uea ae te Atua nakon Mote, ni kangai: Karawa, a boni mwaiti, ao aki kona ni warekaki iroun te aomata; ma a kona ni warekaki irou, bwa bon au bwai.

38 Ao n aron te aonaba teuana ae na mauna nako, ma taian karawa naba ao e na manga roko teuana; ao bon akea tokin au mwakuri, ao au taeka naba.

39 Bwa nooria, bon aio au mwakuri ao mimitongiu—ni karekea te aki mamate ao te maiu ae akea tokina ibukin te aomata.

40 Ao ngkai, Mote, ae natiu, N na taekini bwaai nakoim ibukin te aonaba ae ko tei i aona; ao ko na korei bwaai ake N na taekini.

41 Ao n te bong teuana ngkana a kaakea bonganan au taeka natiia aomata ao a anai aika mwaiti man te boki are ko na koreia, nooria, N na kateirakea temanna ae ai arom; ao a na manga reke nakoia natiia aomata—i buakoia ni kabane ake a na kakoaua.

42 (Taeka aikai a taekinaki nakon Mote i aon te maunga, are e na aki ataaki arana irouia natiia aomata. Ao ngkai a taekinaki nakoim. Tai kaotia nakon temanna ma ti naake a kakoaua. Eng. Amen.)