1 Ā, pēnei ka oti i a tātou n`ga rangi me te whenua, me ngā mano tini o reira.

2 Ā, ka mea ngā Atua ki waenganui i a rātou anō: Hei te rā tuawhitu ka whakamutua e tātou ā tātou mahi, pērā i tā tātou i rūnanga ai; ā, ka okioki tātou hei te rā tuawhitu i ā tātou mahi katoa kua rūnangatia nei e tātou.

3 Ā, ka whakakapia e ngā Atua i te rā tuawhitu, nā te mea hei te wā tuawhitu ka okioki rātou i ā rātou mahi i rūnangatia ai e rātou (ngā Atua) i waenganui i a rātou anō hei hanga; ā, ka whakatapua. Ā pēnei ā rātou whakataunga i te wā i rūnanga tahi ai rātou i waenganui i a rātou anō kia hangaia ngā rangi me te whenua.

4 Ā, ka heke iho mai ngā Atua, ā, ka hangaia ēnei whakatipuranga o ngā rangi, ā, o te whenua, i te wā i hangaia ērā i te rā i hangaia ai e ngā Atua te whenua me ngā rangi,

5 E rite ana ki tā rātou katoa i mea ai rātou e pā ana ki ia tupu o te pārae i mua i tana tipu i te whenua, me ngā mahuri katoa o te pārae i mua i tana tipunga; nā te mea kāore anō ngā Atua kia mea i te ua kia heke ki runga i te whenua i te wā i rūnanga rātou kia pērāhia, ā, kāore anō kia hangaia te tangata hei ngaki i te whenua.

6 Engari i rewa ake tētahi kohu i te whenua, ā, ka whakamākūkūtia te mata katoa o te whenua.

7 Ā, ka hangaia e ngā Atua te tangata mai i te puehu o te whenua, ā, ka mau tōna wairua (koia, ko tō te tangata wairua), ā, ka purua ki roto ki a ia; ā, ka whakaueuehā ki roto i ōna pungaihu te manawaora, ā, ka meinga he wairua ora.

8 Ā, ka whakatōkia e ngā Atua tētahi kāri, ki te taha rāwhiti i Erene, ā, i reira whakanohoia te tāne, i purua iho tōna wairua e rātou ki roto i te tinana i hangaia ai e rātou.

9 Ā, meinga ana e ngā Atua kia tipu ake i te whenua ngā rākau katoa e āhuareka ana ki te titiro atu, ā, he pai hoki hei kai; ko te rākau o te ora, anō hoki, kei waenganui i te kāri, me te rākau o te mātauranga o te pai me te kino.

10 I reira tētahi awa e rere atu ana i Erene, ki te whakamākūkū i te kāri, ā, atu i reira ka wehewehe kia whā ngā mātāpuna.

11 Ā, ka tangohia e ngā Atua te tāne, ā, ka whakanohoia ia ki roto i te Kāri o Erene, hei whakapai, ā, hei tiaki.

12 Ā, ka whakahaua te tāne e ngā Atua, e mea ana: E pai ana kia kai noa i ngā rākau katoa o te kāri,

13 Engari kaua e kai i te rākau o te mātauranga o te pai me te kino; nā te mea mehemea ka kainga e koe tō reira hua, ka mate rawa koe. Ināianei ahau, a Aperahama, i kite atu he rite ki tō tā Ariki taima, arā, e rite ana ki te taima o Koropa; nā te mea kāore anō ngā Atua kia whakatau atu ki a Arama tōna tatauranga taima.

14 Ā, ka mea ngā Atua: Tukua tātou kia hangaia tētahi hoa mō te tāne, nā te mea kāore i te pai kia noho takakau noa te tāne, nō reira ka hangaia e tātou he hoa mōna.

15 Ā, ka meatia e ngā Atua kia au iho te moe o Arama; ā, ka moe ia, ā, ka tangohia tētahi o ōna rara, ā, ka katia iho te kikokiko whai muri i tērā;

16 Ā, nō te rara i tangohia atu e ngā Atua i te tāne, ka hangaia tētahi wahine, ā, ka haria mai ki te tāne.

17 Ā, ka mea a Arama: Koinei te wheua nō ōku wheua, me te kikokiko nō ōku kikokiko; ināianei ka huaina ia he Wahine, nā te mea i tangohia mai ia i te tāne;

18 Nō reira, ka whakarērea e tētahi tāne tōna matua me tōna whaea, ā, ka piri ki tana hoa wahine, ā, hei kikokiko kotahi rāua.

19 Ā, i te tahanga rāua, te tāne me tana hoawahine, ā, kāore ō rāua whakamā.

20 Ā, mai i te whenua hangaia ai e ngā Atua ngā kararehe katoa o te pārae, me ngā manu katoa o te rangi, ā, ka kawea mai ki a Arama kia kite ai he aha tāna hei ingoa mō ērā mea; ā, ahakoa he aha tā Arama i hua ai ki ngā mea ora katoa, nā, koinā te ingoa o reira.

21 Ā, ka tapaina e Arama he ingoa ki ngā kau katoa, ki ngā manu o te rangi, ki ngā kararehe katoa o te pārae; ā, mō Arama, i kitea tētahi hoa mōna.