Ko te Pukapuka a Aperahama

1 I roto i te whenua o ngā Karari, kei te kāinga o ōku tūpuna, i kite au, a Aperahama, he mea tika mōku kia rapu kāinga hou mōku;

2 Ā, nō taku kitenga ake he koa nui ake, he rangimārie nui ake, ā, he okiokinga nui ake mōku, i whai atu au i ngā manaakitanga o ōku tūpuna, ā, ko te mana mā konā whakamanaia ai ahau kia whakahaerehia pērāhia; i te mea ko ahau anō tētahi kaiaru o te tika, e hiahia ana hoki kia meinga hei tangata whai mātauranga, ā, hei tangata kaha ake ki te whai i te tika, ā, kia mau hoki tētahi mātauranga nui ake, ā, kia meinga hei tūpuna nō ngā iwi maha, he wheao maungārongo, ā, e hiahia ana kia whakawhiwhia ki ngā tohutohu, ā, kia puritia ngā whakahaunga a te Atua, i meinga ahau hei kaiwhiwhi tika, he Tohunga Teitei, e puritia ana te mana o ngā tūpuna.

3 I whakataua iho ki runga ki ahau e ngā tūpuna; i heke iho mai i ngā tūpuna, mai i te tīmatanga o ngā wā, āe rā, mai i te tīmatanga pū anō, i mua rānei i te tūāpapa o te ao, tae noa mai ki tēnei wā, arā, ko te mana pū anō o te mātāmua, te tangata tuatahi rānei, āe rā, ko Arama, te matua tuatahi rānei, mā roto i ngā tūpuna ki ahau.

4 I whai atu au i tōku whakaritenga ki te Tohungatanga e rite ana ki te whakaritenga a te Atua ki ngā tūpuna e pā ana ki ngā uri.

5 I te mea kua tahuri kē atu ōku tūpuna i tō rātou tika, ā, i ngā whakahaunga tapu i homai ai e te Ariki tō rātou Atua ki a rātou, tae atu ana ki te koropiko ki ngā atua o te iwi karakia ki ngā whakapakoko, nō reira rātou i kore rawa ai i whakarongo ki tōku reo;

6 Nā te mea kua anga kē ō rātou ngākau ki te mahi kino, ā, kua huri katoa ki te atua o Erekana, me te atua o Ripana, me te atua o Mamakara, me te atua o Koraha, me te atua o Parao, te kīngi o Ihipa;

7 Nō reira tahuritia ai ō rātou ngākau ki te whakahere a ngā iwi karakia ki ngā whakapakoko i runga i tā rātou tāpae i ā rātou tamariki ki ēnei whakapakoko reo kore, ā, kīhai i aro mai ki tōku reo, engari i ngana kia murua atu tōku oranga he mea nā te ringa o te tohunga Erekana. Ko te tohunga o Erekana hoki te tohunga o Parao.

8 Nā, i tēnei wā ko te tikanga o te tohunga o Parao, te kīngi o Ihipa, ko te tāpae ake ki runga i te ahurewa i hangaia ai i te whenua o Karari, hei tāpaetanga ki ēnei atua whano kē, ngā tāne, ngā wāhine, me ngā tamariki.

9 Ā, i pahawa ake, nā, i meatia e taua tohunga tētahi tāpaetanga ki te atua o Parao, ki te atua o Hakarire anō hoki, i runga pū i te ritenga o ngā Ihipiana. Nā, ko te atua o Hakarire ko te rā.

10 Tērā pū anō i tāpaea ai tētahi tamaiti hei whakahere-whakawhetai e te tohunga o Parao ki runga i te ahurewa i tū tata ai ki te puke o Potiwha, kei te tīmatanga o te mānia o Orihema.

11 Nā, i tētahi wā, i tāpaea ake e tēnei tohunga ngā puhi wahine e toru ki runga i tēnei ahurewa i te wā kotahi, ko rātou nei ngā tamāhine a Onita, tētahi uri ariki i heke tōtika mai i ngā hope o Hama. I tāpaea ake ēnei puhi wahine nā tō rātou urutapu; i kore rawa ēnei i whakaae kia koropiko ki ngā atua rākau, atua kōhatu rānei, nō reira i whakamatea ai rātou i runga i tēnei ahurewa, ā, i meatia i runga i te ritenga o ngā Ihipiana.

12 Ā, i pahawa ake, nā, i mahi tai ngā tohunga ki ahau, kia whakamatea ahau anō hoki, pērā i tā rātou ki aua puhi wahine ki runga i te ahurewa; ā, kia whai mātauranga koutou e pā ana ki tēnei ahurewa, me whakaatu atu e ahau ki a koutou te whakaahua kei te tīmatanga o tēnei tuhinga.

13 I hangaia i runga i te āhua o tētahi moenga teitei, pērā i ngā mea i waenganui i ngā Karari, ā, i tū ai i mua i ngā atua o Erekana, o Ripana, o Mamakara, o Koraha, me tētahi atua anō hoki e rite ana ki tō Parao, te kīngi o Ihipa.

14 Kia whai mātauranga koutou ki ēnei atua, kua hoatu e au tētahi whakaahua mō rātou i roto i ngā whakaahua kei te tīmatanga, e kīa ana taua āhua e ngā Karari ko Rarino, tōna tikanga ko ngā tohu Ihipiana onamata.

15 Ā, i a rātou e ara ake ana i ō rātou ringaringa ki runga ki ahau, kia tāpaea ake ahau e rātou me te muru i tōku oranga, nana, i pāoro ake tōku reo ki te Ariki tōku Atua, ā, ka aro mai te Ariki, ā, ka whakarongo mai, ā, ka kī ahau i a ia ki tētahi kitenga o te Mea Kaha Rawa, ā, i tū tata ki tōku taha te anahera o tōna aroaro, ā, ka wewete wawe ia ōku here;

16 Ā, ka puaki tōna reo ki ahau: E Aperahama, e Aperahama, nana, ko Ihowa tōku ingoa, ā, kua rongo au i a koe, ā, kua heke iho mai ki te whakaora i a koe, ā, kia kahakina atu koe i te whare o tō matua, me ō huānga katoa, ki roto ki tētahi whenua tauhou kāore e mōhiotia ana e koe.

17 Ā, pēnei i te mea kua tahuri atu i ō rātou ngākau i ahau, kia koropiko i te atua o Erekana, me te atua o Ripana, me te atua o Mamakara, me te atua o Koraha, me te atua o Parao, te kīngi o Ihipa; nō reira kua heke iho mai au ki te toro iho ki a rātou, me te whakangaro i te tangata nāna nei ōna ringa i ara ake ki a koe, e Aperahama, e taku tama, kia murua atu tō oranga.

18 Nana, mā tōku ringa koe e ārahi, ā, māku koe e hari, kia tau ki runga ki a koe tōku ingoa, ko te tohungatanga pū anō o tō matua, ā, ka tau tōku mana ki runga ki a koe.

19 He pērā anō i te mea i a Noa, ā, ka pērā hoki ki a koe; engari mā roto i tō mahi minita e mōhiotia whānuitia tōku ingoa puta noa i te ao mō āke tonu atu, nā te mea ko au tō Atua.

20 Nana, kei te whenua o Uru o ngā Karari te puke o Potiwha. Ā, i pakaru iho i te Ariki te ahurewa o Erekana, me ngā atua o te whenua, ā, i whakangaromia rawatia, ā, ka patua te tohunga nā konā ka mate ia; ā, i reira tētahi tangihanga nui i Karari, i roto anō hoki i te kōti o Parao; nā konā tohia a Parao hei kīngi i runga i tōna toto ariki.

21 Nā, he uri tēnei kīngi o Ihipa nō ngā hope o Hama, ā, he toto anō ōna nō ngā Kainana, he uri tupu.

22 Nō tēnei kāwai heke iho mai ngā Ihipiana, ā pēnei tiakina ai te toto o ngā Kainana i te whenua.

23 I te mea i kite tuatahitia te whenua o Ihipa e tētahi wahine, koia te tamāhine a Hama, me te tamāhine a Ihipata, i te reo Karari ko Ihipa, tōna tikanga, ko ngā mea kua rāhuitia;

24 I te wā i kite tēnei wahine i te whenua, kei raro taua whenua i te wai, nō muri iho ka whakanohoia ana tama ki reira; ā pēnei, nō Hama, pihi ake taua iwi nāna nei i pupuri te kanga i te whenua.

25 Nā, i whakapūmautia te kāwanatanga tuatahi o Ihipa e Parao, te tama mātāmua o Ihipata, te tamāhine a Hama, ā, he mea whakarite i runga i te ritenga o te kāwanatanga o Hama, he mea peteriaka.

26 Ko Parao, he tangata tika, nāna i whakapūmautana kīngitanga, ā, i whai mātauranga, ā, i tika tana whakawā i tana iwi i ōna rā katoa, e whai pono ana ia kia ōrite taua ritenga i whakapūmauhia e ngā tūpuna i ngā whakatipuranga tuatahi, i ngā rā o te whakaheretanga peteriaka tuatahi, i te whakahaeretanga pū anō o Arama, me Noa anō hoki, tōna matua, nāna nei ia i tohi ki ngā manaakitanga o te whenua, me ngā manaakitanga o te mātauranga, engari kua kangaia te tangata ki te taha ki te Tohungatanga.

27 Nā, nō taua whakapapa anō a Parao nā konā kāore ōna tikanga ki taua Tohungatanga, hei aha koa ka mea mai ngā Parao kei a rātou te Tohungatanga o Noa, mā roto i a Hama, nō reira ārahina atu ai tōku matua e ā rātou mkarakia whakapakoko;

28 Engari ka ngana ahau, ā muri ake nei, ki te whakatakoto iho te whakaraupaparanga atu i ahau ki te tīmatanga o te orokohanganga, nā te mea kua tau mai ngā tuhinga ki roto ki ōku ringaringa, e puritia ana e au i tēnei wā tonu.

29 Nā, whai muri iho i te patunga o te tohunga o Erekana nā konā mate ia, ka puta mai tētahi whakatutukitanga o aua mea i kōrerotia mai ki ahau e pā ana ki te whenua o Kakari, e mea ana, ka tau tētahi matekai ki runga i te whenua.

30 Nō konā tau ai tētahi matekai puta noa i te whenua katoa o Karari, ā, i kino te whakatoi ki tōku matua he mea nā te matekai, ā, ka rīpenetā ia o te kino nāna nei i mea ki ahau, kia murua tōku oranga.

31 Engari ko ngā tuhinga a ngā tūpuna, āe rā, ko ngā peteriaka pū anō, e pā ana ki te hekenga o te Tohungatanga, i tiakina e te Ariki tōku Atua i ōku ake ringaringa; nō reira tētahi mātauranga o te tīmatanga o te orokohanganga, ō ngā aorangi anō hoki, o ngā whetū anō hoki, e rite ana ki te mea i homai ai ki ngā tūpuna, kua puritia e au tae noa mai ki tēnei rā, ā, ka ngana ahau ki te tuhituhi i ētahi o ēnei mea ki runga i tēnei pukapuka, hei painga mō ōku uri e puta mai ai i muri i ahau.