1 Kātahi ka mea mai te Ariki: Tukua tātou kia haere ki raro. Ā, ka haere rātou ki raro i te tīmatanga, kātahi rātou, āe rā, ko ngā Atua, i whakaritea, ā, i hangaia ngā rangi me te whenua.

2 Ā, ko te whenua, whai muri iho i tana hanganga, kāore he mea o runga, ā, he tītōhea, i te mea kāore anō kia hangaia ake e rāua tētahi mea atu i te whenua; ā, he pōuri te mata o te rire, ā, kei runga i te mata o ngā wai te Wairua o ngā Atua e whakapāeko ana.

3 Ā, ka mea mai rātou (ngā Atua): Tukua he māramatanga; kātahi ka puta he māramatanga.

4 Ā, i kite rātou (ngā Atua) i te māramatanga, i te mea he nui tōna kānapanapa; ā, ka wehe rātou i te māramatanga, ka meatia rānei kia whakawehea, i te pōuritanga.

5 Ā, ka huaina e ngā Atua te māramatanga ko te Awatea, ā, ka huaina e rātou te pōuritanga ko te Pō. Ā, i pahawa ake, nā, mai i te ahiahi pō tae noa atu ki te ata ka huaina e rātou ko te pō; ā, mai i te ata tae noa atu ki te ahiahi ka huaina e rātou ko te awatea; ā, koinei te tuatahi, te tīmatanga rānei, o aua mea i kīa ai ko te awatea me te pō.

6 Ā, ka kī ake anō hoki ngā Atua: Tukua kia whai takiwā i waenganui i ngā wai, ā, hei wehe rua i ngā wai i ngā wai.

7 Ā, ka whakahaua e ngā Atua te takiwā, kia weheruatia ngā wai kei raro i te takiwā i ngā wai kei runga i te takiwā; ā, ka pērāhia; e rite ana ki tā rātou i whakahau ai.

8 Ā, ka huaina e ngā Atua te takiwā, ko te Rangi. Ā, i pahawa ake, nā, mai i te ahiahi tae noa atu ki te ata i huaina ai e rātou ko te awatea; ā, koinei te wā tuarua i huaina ake ko te pō me te awatea.

9 Ā, ka whakahaua e ngā Atua, e mea ana: Tukua ngā wai kei raro i te rangi kia tōpu tahi ki te wāhi kotahi, ā, tukua te whenua kia puta maroke ake; ā, ka pērā i tā rātou i whakahau ai;

10 Ā, ka karangatia te whenua e ngā Atua, ko te Whenua; ā, ko te whakatōpūtanga o ngā wai, i karangatia ai e rātou, ko ngā Wai Nunui; ā, ka kite ngā Atua, nā, i rangona rātou.

11 Ā, ka mea mai ngā Atua: Tukua tātou kia whakarite i te whenua kia puta mai he pātītī; te otaota whai kākano; te huarākau whai hua, nō tōna rite ake, ko tōna kākano ake anō e rite ana ki tōna momo i runga i te whenua; ā, ka pērāhia, e rite ana ki tā rātou i whakahau ai.

12 Ā, i whakaritea e ngā Atua kia whakatupu pātītī te whenua i tōna ake kākano, me te otaota kia hua ai he otaota i tōna ake kākano, e hua ai i ngā kākano e rite ana ki tōna ake momo; ā, kia whakatupute whenua i te rākau i tōna ake kākano, e whai hua ana, ka hua mai i a ia tōna ake momo anake, e rite ana ki tōna ake momo; ā, ka kite ngā Atua, nā, i rangona rātou.

13 Ā, i pahawa ake, nā, i tatauria e rātou ngā rā; mai i te ahiahi tae noa ki te ata, ka huaina e rātou ko te pō; ā, i pahawa ake, nā, mai i te ata ki te ahiahi i huaina e rātou ko te awatea; ā, koia te wā tuatoru.

14 Ā, ka whakaritea e ngā Atua ngā māramatanga i te takiwā o te rangi, ā, ka meatia ērā kia weheruatia te awatea i te pō; ā, ka whakaritea ērā hei tohu mō ngā kaupeka, ā, mō ngā rā me ngā tau;

15 Ā, i whakaritea ērā hei māramatanga i te takiwā o te rangi kia tīaho mai he māramatanga ki runga i te whenua; ā, ka pērāhia.

16 Ā, i whakaritea e ngā Atua ngā māramatanga nui e rua, te mārama nui ake mō te awatea, me te mārama iti iho mō te pō; i te taha o te mārama tuaiti i whakaritea e rātou ko ngā whetū hoki;

17 Ā, i whakairia ērā e ngā Atua i te takiwā o ngā rangi, kia tuku māramatanga ki runga i te whenua, ā, mō te awatea me te pō, ā, hei whakawehe te māramatanga i te pōuritanga.

18 Ā, i mātakitaki iho ngā Atua i aua mea i whakahaua ai e rātou tae noa ki te wā i rangona ai rātou.

19 Ā, i pahawa ake, nā, mai i te ahiahi tae noa atu ki te ata ko te pō; ā, i pahawa ake, nā, mai i te ata tae noa atu ki te ahiahi ko te awatea; ā, koia te wā tuawhā.

20 Ā, ka mea mai ngā Atua: Tukua tātou kia whakaritea ngā wai kia puta ai i reira ngā mea ngoki katoa e ora ana; me te manu, kia rere ai i runga i te whenuai te takiwā tūwhera o te rangi.

21 Ā, ka whakaritea e ngā Atua ngā wai kia whakaputaina mai i reira ngā tohorā nunui, me ngā mea ora katoa e ngoki ana, e whakaputaina nuitia ake ai i ngā wai e rite ana ki ōna momo; me ngā manu whai parirau katoa e rite ana ki tōna momo. Ā, i kite ngā Atua tērā ka rangona rātou, āpiti, he pai tā rātou mahere.

22 Ā, ka mea mai ngā Atua: Ka manaakitia rātou e tātou, ā, ka meatia kia whai hua, ā, kia tini, ā, kia whakakīngia ngā wai, ngā wai nunui rānei; ā, ka meatia te manu kia tini i te whenua.

23 Ā, i pahawa ake, nā, mai i te ahiahi tae noa atu ki te ata i huaina e rātou ko te pō; ā, i pahawa ake, nā, mai i te ata tae noa atu ki te ahiahi i huaina e rātou ko te awatea; ā, koia te wā tuarima.

24 Ā, i whakaritea te whenua e ngā Atua kia whakaputaina mai ngā mea ora katoa e rite ana ki tōna momo, te kau me ngā mea ngoki, me ngā kararehe e rite ana ki tō rātou momo; ā, ka pērāhia, e rite ana ki tā rātou i kī ai.

25 Ā, ka whakaritea te whenua e ngā Atua kia whakaputaina mai ngā kararehe e rite ana ki tōna momo, me te kau i tōna momo, me ngā mea katoa e ngoki ana i runga i te whenua kia rite ki tōna momo; ā, ka kite ngā Atua i rangona rātou.

26 Ā, ka rūnanga tahi ngā Atua i waenganui i a rātou anō, ā, ka mea: Tukua tātou kia haere iho ki raro, ā, ka hangaia te tangata i roto i tō tātou āhua, tō tātou ritenga; ā, ka tukuna ki a ia te rangatiratanga ki runga i ngā ika o te moana, me ngā manu o te rangi, me ngā kau o te whenua, ā, ki runga i ngā mea ngoki katoa e ngoki ana ki runga i te whenua.

27 Nō reira ka haere iho ngā Atua ki raro ki te hanga i te tangata i roto i tō rātou āhua, ā, i roto i te āhua o ngā Atua i hangaia ai ia e rātou, he tāne, he wahine hei hanga rātou i a rāua.

28 Ā, ka mea mai ngā Atua: Ka manaakitia rāua e tātou. Ā, ka mea mai ngā Atua: Ka meatia rāua e tātou kia hua, kia tini, ā, kia kapi katoa te whenua, ā, kia mate anō hoki ōna tara i a rāua, ā, kia whai mana i runga i ngā ika o te moana, me ngā manu o te rangi, ā, i runga i ngā mea ora katoa e hāereere ana i runga i te whenua.

29 Ā, ka mea ngā Atua: Nana, ka hoatu ki a rāua ngā mahuri katoa e hua ake i a ia ngā kākano ki runga i te mata katoa o te whenua, ā, ka whai hua ngā rākau katoa; āe rā, ngā hua o ngā rākau whai kākano, ka hoatu ki a rāua; ā, koia rā hei kai mā rāua.

30 Ā, ki ngā kararehe katoa o te whenua, me ngā manu katoa o te rangi, ā, ki ngā mea katoa e ngoki ana ki runga i te whenua, nana, ka hoatu he oranga ki ērā mea, waihoki, ka hoatu ki ērā mea ngā mahuri kākāriki katoa hei kai, ā, ka whakaritea pēneitia ēnei mea katoa.

31 Ā, ka mea ngā Atua: Ka meatia e tātou ngā mea katoa kua kōrerotia nei e tātou, ā, ka whakaritea ērā mea; ā nana, ka tino whakarongo mai ērā mea. Ā, i pahawa ake, nā, mai i te ahiahi tae noa atu ki te ata i huaina e rātou ko te pō; ā, i pahawa ake, nā, mai i te ata tae noa atu ki te ahiahi i huaina e rātou ko te pō; ā, ka tatauria e rātou ko te rā tuaono.