1 Ā, i ahau, i a Aperahama te Urama Tāmama, i homai ai e te Ariki tōku Atua ki ahau, i Uru o ngā Karari;

2 Ā, i kite au i ngā whetū, nā, he mea tino nui rawa, ā, ko tētahi o ērā mea e tata ake ki te torona o te Atua; ā, he maha rawa ngā mea nui e tata atu ana ki reira;

3 Ā, ka mea mai te Ariki ki ahau: Koinei ngā kaiwhakahaere; ā, ko te ingoa o te mea nui rawa, ko Koropa, nā te mea he tata rawa ia ki ahau, nā te mea ko te Ariki tō Atua: Nāku tēnei i whakatū hei whakahaere i te hunga katoa nō taua ritenga pērā me tēnā e tū nā koe ki runga.

4 Ā, ka mea mai te Ariki ki ahau, he mea mā roto i te Urama Tāmama, nā, nō te ritenga o te Ariki a Koropa, e rite ana ki ōna wā me ōna kaupeka i ō reira huringa; nā, ko tētahi huringa tētahi rā ki te Ariki, nō tēnei ritenga tatau, koia he kotahi mano tau te rite ki te tatauranga taima kua whakataua iho ki te whenua e tū nā koe. Koinei te ritenga tatau o te taima o te Ariki, e rite ana ki ngā tatauranga taima o Koropa.

5 Ā, ka mea mai te Ariki ki ahau: Ko te aorangi e iti iho ana tōna māramatanga, he iti iho i tō te awatea, me te pō pū anō, kei runga ake, he nui ake rānei i tō te wāhi e tū nā koe e ai ki ngā ritenga tatau, nā te mea he pūhoi ake tana haere; he ritenga tēnei i te mea e tū ana tēnā i runga i te whenua e tū nā koe, nō reira ehara tōna tatau taima e rite ana ki te maha o ōna rā, me ōna marama, me ōna tau.

6 Ā, ka mea mai te Ariki ki ahau: Nā, e Aperahama, e pono ana ēnei mea e rua, nana kei te kitea e ō karu; kua hoatu kia koe kia mōhio ki ngā tatauranga taima, me te taima kua whakataua, āe rā, te taima kua whakataua nei ki te whenua e tū nā koe, me te tatauranga taima o te mārama nui ake kua whakataua hei awatea, me te tatauranga taima kua whakataua hei pō.

7 Nā, he roa ake te tatauranga taima o te mārama iti iho i tō te whenua tatauranga taima e tū nā koe.

8 Ā, kei te wāhi o ēnei mea e rua, kei reira anō tētahi mea i runga ake i ērā, kei reira tētahi aorangi ko tōna tatauranga taima, he mea roa tonu ake anō;

9 Ā pēnei kei runga ake tō tētahi aorangi tatauranga taima i tō tētahi atu aorangi, tae noa ki tō taenga atu ki Koropa, nō te ritenga taua Koropa o tō te Ariki taima; ko taua Koropa kua whakanohoia kia tata atu ki te torona o te Atua, kia whakahaerehia aua aorangi katoa nō taua ritenga anō pērā i te mea e tū nā koe.

10 Ā, kua hoatu ki a koe kia mōhio ki te taima kua whakataua ki ngā whetū katoa kua whakataua hei tuku māramatanga, tae noa atu ki tō whakatatahanga atu ki te torona o te Atua.

11 Pēnei tāku, tā Aperahama, i kōrero atu ai ki te Ariki, kanohi ki te kanohi, e rite ana ki tā tētahi e kōrero ana ki tētahi atu; ā, i kōrero mai ia ki ahau e pā ana ki ngā mahinga i hangaia nei e ōna ringaringa;

12 Ā, ka mea mai ia ki ahau: E taku tama, taku tama (ā, i te torona mai tōna ringa), nana māku ēnei mea katoa e whakaatu ki a koe. Ā, ka pā ōna ringaringa ki ōku karu, kātahi au ka kite i aua mea i hangaia ai e ōna ringaringa, he maha ērā mea; ā, i tini haere i mua i ōku karu, ā, kāore i taea e au te kite atu i tōna mutunga.

13 Ā, ka mea mai ia ki ahau: Ko Hineha tēnei, koia te rā. Ā, ka mea mai ki ahau: Ko kokopa tētahi whetū. Ā, ka mea mai ia ki ahau: Ko Orea, koia te marama. Ā, ka mea mai ia ki ahau: Ko Kokaupima, ko tōna tikanga ko ngā whetū, ko ngā rama nunui katoa rānei, kei runga i te kikoranga o te rangi.

14 Ā, kei te pō te wā i kōrero mai ai te Ariki i ēnei kupu ki ahau: Kameinga koe e au kia tini, me ō uri whai muri iho i a koe, pērā me ēnei; ā, mehemea e taea ana e koe te tatau i te maha o ngā onepū, ka pērā anō te maha o ōu uri.

15 Ā, ka mea mai te Ariki ki ahau: E Aperahama, kei te whakaatu atu au i ēnei mea ki a koe i mua i tō haerenga atu ki Ihipa, kia taea e koe te whakapuaki i ēnei kupu katoa.

16 Mehemea e rua ngā mea, ā, mehemea kei runga ake tētahi i tētahi atu, kei runga ake ngā mea nui rawa i ērā; nō reira ko Koropa te mea nui rawa o ngā Kokaupima katoa kua kitea nei e koe, nā te mea he tata ake tēnā ki ahau.

17 Nā, mehemea e rua ngā mea, tētahi i runga i tētahi atu, ā, kei runga te marama i te whenua, nā konā tērā pea kei runga ake tētahi aorangi, tētahi whetū rānei i runga ake i tērā; ā, kāore he mea kē atu e mau ai i te Atua ki roto ki tōna ngākau hei mahi māna engari ka meatia e ia.

18 Hei ahakoa i hangaia e ia te whetū nui ake; pērā anō hoki, mehemea e rua ngā wairua, ā, ka matatau ake tētahi i tētahi atu, heoi ēnei wairua e rua, ahakoa he matatau ake tētahi i tētahi atu, kāore ōna tīmatanga; i ora rāua i mua, kāore ō rāua mutunga, ka ora tonu a muri, nā te mea ko norauma rāua, he mau tonu rānei.

19 Ā, ka mea mai te Ariki ki ahau: E tika ana ēnei mea e rua, nā, e rua ngā wairua, he matatau ake tētahi i tētahi atu; ka puta mai tētahi mea matatau ake i a rāua; ko au te Ariki tō Atua, he matatau ake ahau i a rātou katoa.

20 Nā te Ariki tō Atua tana anahera i tono kia whakaputaina ai koe i ngā ringaringa o te tohunga o Erekana.

21 E noho ana ahau i waenganui i a rātou katoa; nō reira, ināianei ahau, kua heke iho ki a koe kia whakapuakina ki a koe ngā mahinga kua hangaia nei e ōku ringaringa, mā konā he nui ake tōku mātauranga i ō ērā katoa, nā te mea e whakahaere ana ahau i ngā rangi i runga, ā, i te whenua i raro, i runga i te mātauranga me te whai whakaaro katoa, i runga i ngā mea ora katoa kua kitea nei e ō karu mai i te tīmatanga; i heke iho au i te tīmatanga i waenganui i ngā mea ora katoa kua kite nā e koe.

22 Nā, kua whakaaturia mai e te Ariki ki ahau, ki a Aperahama, ngā mea ora i hangaia ai i mua i te orokohanganga o te ao; ā, kei waenganui i ēnei mea katoa ngā mea ariki me ngā mea nunui maha;

23 Ā, i kite te Atua i ēnei wairua katoa he mea pai rātou, ā, i tū ia ki waenganui i a rātou katoa, ā, ka mea mai ia: Ka meinga ēnei e au hei kaiwhakahaere māku; nā te mea i tū ia ki waenganui i te hunga wairua, ā, ka kite ia he pai rātou; ā, ka mea atu ia ki ahau: E Aperahama, ko koe tētahi o rātou; i kōwhiria koe i mua i tō whānautanga mai.

24 Ā, i reira tū ai tētahi ki waenganui i a rātou e rite ana ki te Atua, ā, ka mea atu ia ki te hunga kei tōna taha: Ka haere tātou ki raro, nā te mea he takiwā wātea ki reira, ā, ka tango tātou i ēnei rauemi, ā, ka hangaia e tātou tētahi ao e noho ai ēnei ki reira;

25 Ā, ka whakamātauria rātou i reira, kia kitea ai mehemea ka meatia e rātou tā te Ariki tō rātou Atua e whakahau ai ki a rātou;

26 Ā, ka tāpirihia ki tō te hunga e mau tonu ki tō rātou hawaiiki tuatahi; ā, e kore e whai korōria te hunga kāore e mau i a rātou tō rātou hawaiiki tuatahi i roto i te kīngitanga i te taha o aua hunga e mau tonu ki tō rātou hawaiiki tuatahi; ā, ka tāpirihia atu ki runga i ngā māhunga o te hunga e mau tonu ai ki tō rātou hawaiiki tuarua mō āke tonu atu.

27 Ā, ka mea mai te Ariki: Ka tono atu au i a wai? Ā, ka mea mai tētahi e rite ana ki te Tama a te Tangata: Anei ahau, tonoa ahau. Ā, ka whakautua e tētahi atu, ā, ka mea: Anei ahau, tonoa ahau. Ā, ka mea mai te Ariki: Ka tono au i te tuatahi.

28 Ā, ka riri te tuarua, ā, kīhai i mau tonu ki tōna hawaiiki tuatahi; ā, i taua rā, i arumia ia e ngā mea tokomaha.