1 Nā, ka mea te Ariki te Atua kia kino rawa te matekai i te whenua o Uru, nā konā mate ai a Harana, taku teina; engari ka noho tonu a Teraha, tōku matua, i te whenua o Uru, o ngā Karari.

2 Ā, i pahawa ake, nāku, nā Aperahama, i moe i a Harai hei hoa wahine māku, ā, nā Nahoro, taku teina, i moe i a Mireka hei hoa wahine māna, ko ia te tamāhine o Harana.

3 Nā, kua mea mai te Ariki ki ahau: E Aperahama, me puta atu koe i tō whenua, ā, i ō huānga, ā, i te whare o tō matua, ki tētahi whenua e whakaaturia atu ki a koe e ahau.

4 Nō reira, ka wehe atu au i te whenua o Uru, o ngā Karari, kia haere atu ai ki te whenua o Kainana; ā, i haria e au a Rota, te tama a taku teina, me tana hoa wahine, me Harai taku hoa wahine; waihoki, i whai mai tōku matua i muri i ahau, ki te whenua i karangatia ai e mātou ko Harana.

5 Ā, ka mutu te matekai; ā, ka noho mai tōku matua i Harana, ā, ka noho pūmau ki reira, i te mea he maha ngā kāhui i Harana; ā, ka hoki anō tōku matua ki āna karakia whakapakoko, nō reira noho tonu ai ia i Harana.

6 Engari nāku, nā Aperahama, māua ko Rota, te tama a taku teina, i inoi ake ki te Ariki, ā, ka puta mai te Ariki ki ahau, kātahi ka mea mai ki ahau: E tū, ā, haere tahi kōrua ko Rota; i te mea kua whakaaro au kia kawea atu koe i Harana, me te whakarite i a koe hei minita, kia whakapuaki i tōku ingoa i tētahi whenua tauhou e hoatu ki ō uri whai muri iho i a koe hei nohoanga mau tonu, ina whakarongo rātou ki tōku reo.

7 Nā te mea ko au te Ariki tō Atua; E noho ana au i te rangi; ko te whenua tōku tūrangawaewae; e torona atu ana e ahau tōku ringa ki runga i te moana, ā, e whakarongo ana ki tōku reo; ka mea au i te hau me te ahi hei hāriata mōku; ka mea atu au ki ngā maunga—Neke atu—ā nana, ka kahakina atu ērā e tētahi hau āwhiowhio, i taua wā tonu, he wawe.

8 Ko Ihowa tōku ingoa, ā, e mōhio ana au te mutunga i te tīmatanga; nō reira kei runga tōku ringa i a koe.

9 Ā, ka meatia e au he iwi nunui i a koe, ā, māku koe e manaaki mehua kore, ā, ka meatia tō ingoa hei ingoa nui i roto i ngā iwi katoa, ā, ka meinga koe hei manaakitanga nui ki ō uri whai muri i a koe, nā konā, kei ō rātou ringaringa e mau nei tēnei minitatanga me tēnei Tohungatanga ki ngā iwi katoa;

10 Ā, māku rātou e manaaki mā roto i tōku ingoa; nā te mea ko te hunga katoa e whiwhi ai i taku Rongopai te hunga e karangatia ki tōku ingoa, ā, ka meinga hei uri mōu, ā, ka ara ake, ā, ka manaaki i a koe, anō ko tō rātou matua;

11 Ā, ka manaakitia e au te hunga e manaaki i a koe, ā, ka kangaia te hunga e kanga nei i a koe; ā, kei roto i a koe (koia ko te Tohungatanga) ā, kei roto i ō uri (koia, ko tō Tohungatanga), nā te mea kei te hoatu ki a koe tētahi whakaari e haere tonu ai tēnei i roto i ō uri whai muri i a koe (koia kē, ko ngā uri tūturu, ngā uri rānei o tō tinana) e manaakitia ngā whānau katoa o te whenua, me ngā manaakitanga pū anō o te Rongopai, koirā ngā manaakitanga o te whakaoranga, ko te oranga tonutanga pū anō.

12 Nā, whai muri iho i tā te Ariki kōrerotanga ki ahau, me te ngaronga atu o tōna mata ki ahau, i mea au i roto i tōku ngākau: Kua whai pono atu tō pononga i a koe; ināianei kua rapua koe e ahau;

13 Nāu i tono mai tō anahera hei whakaoranga i ahau i ngā atua o Erekana, ā, he pai mōku kia whakarongo atu ki tō reo, nō reira tukua tō pononga kia tū ake, ā, kia wehe atu i te rangimārie.

14 Nō reira ahau, a Aperahama, i wehe atu ai pērā i tā te Ariki i mea mai ki ahau, mātou ko Rota; ā ko au, ko Aperahama, kua neke atu i te ono tekau mā rua tau te pakeke i taku wehenga atu i Harana.

15 Ā, i mauria atu e au a Harai, te wahine nāku i whakamoe hei hoa wahine māku i ahau e noho ana i Uru, i Karari, me Rota, te tama a taku teina, me ō mātou rawa katoa i kohia mai ai, me ngā wairua i rapua ai e mātou i Harana, ā, ka haere mai i runga i te huarahi ki Kainana, ā, i noho tēneti mātou i a mātou e haere mai ana;

16 Nō reira, ko te mau tonu tō mātou uhi me tō mātou kāmaka me tō mātou whakaoranga, i a mātou e haere ana i Harana mā Herehona, kia tae atu ai ki te whenua o Kainana.

17 Ināianei au, a Aperahama, i hanga ake i tētahi ahurewa io te whenua o Herehona, ā, ka tāpaea tētahi tāpaenga ki te Ariki, ā, i inoi ake kia whakatahuritia atu te matekai i te whare o tōku matua, kia kaua rātou e mate.

18 Kāthi mātou ka hipa atu i Herehona ki roto i te whenua tae atu ana ki te wāhi o Hekeme; he wāhi kei ngā mānia o More, ā, kua tae kē atu mātou ki ngā rohe o te whenua o ngā Kainana, ā, i tāpae au i tētahi whakahere i reira i ngā mānia o More, ā, i kaha karangatia atu ki te Ariki, nā te mea kua tae kē mātou ki roto i ngā whenua o tēnei iwi karakia ki ngā whakapakoko.

19 Ā, ka puta mai te Ariki ki ahau hei whakautu i aku inoi, ā, ka mea mai ki ahau: Ka hoatu e au tēnei whenua ki ō uri.

20 Ā, nāku, nā Aperahama, i ara ake i te wāhi i tū ai te ahurewa i hangaia nei e au ki te Ariki, ā, ka wehe atu i reira ki tētahi maunga kei te rāwhiti o Petere, ā, ka whakatū i taku tēneti ki reira, kei te uru a Petere, ā, ko Hai kei te rāwhiti; ā, i reira hangaia e au tētahi ahurewa ki te Ariki, ā, ka karangatia ake anō te ingoa o te Ariki.

21 Ā, nāku, nā Aperahama, i haere tonu atu whakatetonga; ā, e hono tonu ana te matekai i te whenua; ā, nāku, nā Aperahama, i haere tonu iho ki Ihipa, kia noho ai ki reira, nā te mea i kino te ngau o te matekai.

22 Ā, i pahawa ake, i ahau e tata tomo atu ana ki Ihipa, ka mea mai te Ariki ki ahau: Nana, he wahine tino ātaahua tō hoa wahine a Harai;

23 Nō reira ka pahawa ake, ina kite atu ngā Ihipiana i a ia, ka mea atu rātou ki a ia—Ko tāna hoa wahine ia; ā, ka whakamate rātou i a koe, engari ka whakaora tonu i a ia; nō reira me tika tāu mahi i tēnei:

24 Tukua ia kia kī ake ki ngā Ihipiana, he tuahine ia nōu, ā, ka ora ai koe.

25 Ā, i pahawa ake, nāku, nā Aperahama, i kī atu ki a Harai, taku hoa wahine, e pā ana ki ngā mea katoa i kōrero mai ai te Ariki ki ahau—Nō reira kī atu ki a rātou, tāku e inoi nei, he tuahine koe nōku, e pai ai ahau mōu te take, ā, ka ora tōku wairua, mōu te take.