1 Futsi sitawuwacedza kanjalo-ke emazulu nemhlaba, nayo yonkhe indalo yawo.

2 BoNkulunkulu batsi lomunye kulomunye: Ngesikhatsi sesikhombisa sitawucedza umsebenti wetfu, leselulekane ngawo; futsi sitawuphumula ngesikhatsi sesikhombisa emisebentini yetfu yonkhe leselulekane ngayo.

3 BoNkulunkulu bacedza ngesikhatsi sesikhombisa, ngoba ngesikhatsi sesikhombisa bebatawuphumula emisebentini yabo yonkhe (boNkulunkulu) labebalulekene ngayo kuyenta; basingcwelisa. Taba kanjalo-ke tincumo tabo ngesikhatsi balulekana ngekwenta emazulu nemhlaba.

4 BoNkulunkulu base behlela phansi bantenta leti titukulwane temazulu netemhlaba, ngesikhatsi tentiwa ngelilanga lapho boNkulunkulu benta umhlaba nemazulu,

5 Ngalokuphatselene nako konkhe lebebakushito mayelana nato tonkhe titjalo tesiganga ngaphambi kwekube tibe semhlabeni, nawo onkhe emakhambi esiganga ngaphambi kwekube akhule; ngoba boNkulunkulu bebangakayinisi imvula emhlabeni ngesikhatsi balulekana ngekutenta leti tintfo, futsi bebangakambumbi umuntfu lobekatawulima umhlabatsi.

6 Kodvwa kwenyuka inkhungu iphuma emhlabatsini, yanisela wonkhe umhlabatsi.

7 BoNkulunkulu babumba wesilisa ngelutfuli lwemhlabatsi, batsatsa umoya wakhe (lokusho kutsi, umoya walona wesilisa) bawufaka kuye; baphefumulela emakhaleni akhe umphefumulo wekuphila, umuntfu wesilisa wase uba ngumuntfu lophilako.

8 BoNkulunkulu bahlanyela insimi, ngasemphumalanga ye-Edeni, bambeka khona-ke lowesilisa, lona umoya wakhe lebebawufake emtimbeni wakhe lebebawubumbile.

9 Emhlabatsini boNkulunkulu benta kutsi kumile sonkhe sihlahla lesibukekako nalesilungele kudliwa; sihlahla sekuphila, naso, emkhatsini wensimi, nesihlahla sekwati lokuhle nalokubi.

10 Bekunemfula lowawugeleta usuka e-Edeni, kunisela insimi, kusuka ngaleso sikhatsi wehlukana waba yimifula lemine.

11 BoNkulunkulu bamtsatsa lowesilisa bambeka eNsimini yase-Edeni, kute ayilime aphindze ayigcine.

12 BoNkulunkulu bamyaleta lowesilisa, batsi: Kuto tonkhe tihlahla tensimi ungadla ngekukhululeka,

13 Kodvwa esihlahleni sekwati lokuhle nalokubi, awuyukudla kuso; ngoba mhlazana uyawukudla kuso, uyawukufa nekufa. Manje mine, Abrahama, ngabona kutsi bekungesikhatsi seNkhosi, lokwakungesikhatsi senkhanyeti iKolobe; ngoba ngaleso sikhatsi boNkulunkulu bebangakamniki Adamu kubala kwakhe sikhatsi.

14 BoNkulunkulu batsi: Asentele lowesilisa umsiti wakhe lomlungele, ngoba akukuhle kutsi wesilisa abe yedvwa, ngako-ke sitawumbumbela umsiti wakhe lomlungele.

15 BoNkulunkulu benta butfongo lobukhulu kutsi behlele Adamu; walala, batsatsa lubhambo lunye etimbanjeni takhe, bavala ngenyama esikhundleni salo;

16 Futsi ngalolubhambo boNkulunkulu labebalutsetse kuwesilisa, babumba ngalo wesifazane, bamletsa kulowesilisa.

17 Adamu watsi: Lona sewulitsambo lematsambo ami, nenyama yenyama yami; manje uyawubitwa ngekutsi weSifazane, ngoba watsatfwa kuwesilisa;

18 Ngako-ke wesilisa uyawushiya uyise nenina, anamatsele kumfati wakhe, bese baba nyamanye.

19 Futsi bobabili bebahamba ngcunu, wesilisa nemfati wakhe, bate emahloni

20 Ngemhlabatsi boNkulunkulu baphindze babumba tonkhe tilwane tesiganga, nato tonkhe tinyoni tasemoyeni, batiletsa ku-Adamu kutsi abone kutsi bekatawutetsa njani; futsi noma nguliphi ligama Adamu letsa ngalo konkhe lokuphilako, bekuyawufanele kubitwe ngalelo gama.

21 Adamu wayetsa yonkhe imfuyo, tinyoni tasemoyeni, nato tonkhe tilwane tesiganga; futsi Adamu, besekatfolelwe umsiti wakhe lomlungele.