1 Futsi iNkhosi yabese itsi: Asehleni siye phansi. Behlela phansi ekucaleni, futsi bona lokuboNkulunkulu, badala baphindze benta emazulu nemhlaba.

2 Futsi mhlaba, emvakwekube sewentiwe, bewungenalutfo futsi ungenamuntfu, ngoba bebangakenti lutfo ngaphandle kwemhlaba; futsi bumnyama bebubusa etikwelwandle, naMoya waboNkulunkulu wawehla wenyuka ahambahamba etikwemanti.

3 Bona (boNKulunkulu) batsi: Akube khona kukhanya; kwaba khona kukhanya.

4 Bona (boNkulunkulu) bakucondza kukhanya, ngoba bekukhatimula; bakwehlukanisa kukhanya, noma benta kutsi kwehlukane, nebumnyama.

5 Futsi boNkulunkulu bakwetsa kukhanya kutsi Yimini, nebumnyama bakwetsa kutsi Busuku. Futsi kwenteka kutsi kusuka kusihlwa kute kube sekuseni bakwetsa kutsi busuku; kani kusuka ekuseni kute kube kusihlwa bakwetsa kutsi yimini; loku kwaba kwekucala, noma sicalo, saloko labakubita ngekutsi yimini nebusuku.

6 BoNkulunkulu baphindze batsi: Akube khona sibhakabhaka emkhatsini wemanti, sehlukanise emanti kulamanye emanti.

7 BoNkulunkulu basiyala sibhakabhaka, kangangoba sehlukanisa emanti labengephansi kwesibhakabhaka nemanti labengetulu kwesibhakabhaka; kwase kuba njalo, njengoba bebayala.

8 BoNkulunkulu basetsa lesibhakabhaka batsi Lizulu. Futsi kwenteka kutsi kusuka kusihlwa kute kube sekuseni bakwetsa kutsi busuku; futsi kwenteka kutsi kusuka ekuseni kute kube kusihlwa bakwetsa kutsi yimini; loku bekusikhatsi sesibili labasibita ngebusuku nemini.

9 BoNkulunkulu bayala, batsi: Emanti langephansi kwelizulu akabutsane ndzawonye endzaweni yinye, kubonakale umhlaba lowomile; kwase kuba njalo njengoba bebayala;

10 BoNkulunkulu batsi umhlaba lowomile, Ngumhlaba; nekubutsana ndzawonye kwemanti, batsi, Emanti Lamakhulu; futsi boNkulunkulu babona kutsi bebalalelwa.

11 BoNkulunkulu batsi: Asilungise umhlaba kute uvete tjani; emakhambi latsela tinhlavu; netihlahla tetitselo letitsela titselo, ngetinhlobo tato, tinhlanyelo tato letiyoveta lokufana nato emhlabatsini; kwase kuba njalo, ngisho njengoba bebayala.

12 BoNkulunkulu benta umhlaba kutsi uvete tjani etinhlanyelweni tawo lucobo, nemakhambi kutsi avete emakhambi etinhlanyelweni tawo, laveta tinhlanyelo ngetinhlobo tato; nemhlaba kutsi uvete tihlahla etinhlanyelweni tato lucobo, letitsela titselo, tinhlanyelo tato lebetingakwati kuveta letinye letifana nato kuto, ngetinhlobo tato, futsi boNkulunkulu babona kutsi bebalalelwa.

13 Futsi kwenteka kutsi babala emalanga; kusuka kusihlwa kute kube sekuseni bakwetsa batsi busuku; kwenteka kutsi, kusuka ekuseni kute kube kusihlwa bakwetsa batsi yimini; besekusikhatsi sesitsatfu.

14 BoNkulunkulu benta tibane emkhatsini wesibhakabhaka selizulu, benta kutsi tehlukanise imini nebusuku; batenta kutsi tibe tibonakaliso futsi netetikhatsi temnyaka, netemalanga neteminyaka;

15 Batenta kutsi tibe tibane esibhakabhakeni selizulu kute tinike kukhanya emhlabeni; kwase kuba njalo.

16 BoNkulunkulu benta tibane letinkhulu taba timbili, lesikhulu kutsi sibuse imini, lesincane kutsi sibuse busuku; baphindze babeka tinkhanyeti kutsi tibe nekukhanya lokuncane;

17 BoNkulunkulu babeka tibane esibhakabhakeni semazulu, kute tinike kukhanya emhlabeni, tiphindze tibuse imini nebusuku, tehlukanise kukhanya ebumnyameni.

18 BoNkulunkulu batibuka leto tintfo lebebatiyalile tate talalela.

19 Futsi kwenteka kutsi kusuka kusihlwa kute kube sekuseni kwaba busuku; kwenteka kutsi kusuka ekuseni kute kube kusihlwa kwaba yimini; kwaba sikhatsi sesine.

20 BoNkulunkulu batsi: Asilungise emanti kute avete tidalwa letinyakatako letinemphilo ngebuningi bato; netinyoni, kute tindize etikwemhlaba esibhakabhakeni lesivulekile selizulu.

21 BoNkulunkulu bawalungisa emanti kute avete imikhoma lemikhulu, nato tonkhe tidalwa letiphilako letinyakatako, lebetitawuvetwa ngemanti tibe tiningi ngetinhlobo tato; kanjalo netinyoni letinetimphiko ngetinhlobo tato. BoNkulunkulu babona kutsi bebatawulalelwa, nekutsi luhlelo lwabo beluluhle.

22 BoNkulunkulu batsi: Sitawutibusisa, sitente titalane tandze, tigcwalise emanti elwandle noma emanti lamakhulu; sente tinyoni tandze emhlabeni.

23 Futsi kwenteka kutsi kusuka kusihlwa kute kube sekuseni bakwetsa ngekutsi busuku; kwenteka kutsi kusuka ekuseni kute kube kusihlwa bakwetsa ngekutsi yimini; kwaba sikhatsi sesihlanu.

24 BoNkulunkulu bawulungisa umhlaba kute uvete tidalwa letiphilako ngetinhlobo tato, imfuyo netilwane letihamba ngesisu, netilwane temhlaba ngetinhlobo tato; kwase kuba njalo, njengoba bebashito.

25 BoNkulunkulu bawenta umhlaba kute uvete tilwane ngetinhlobo tato, nemfuyo ngetinhlobo tato, nato tonkhe tilwane letihamba ngesisu emhlabeni ngetinhlobo tato; futsi boNkulunkulu babona kutsi betitawulalela.

26 BoNkulunkulu bacebisana batsi: Asehle siye phansi sibumbe umuntfu ngemfanekiso wetfu, abe njengatsi; sitawubanika kutsi babuse etikwetinhlanti taselwandle, nasetikwetinyoni tasemoyeni, nasetikwemfuyo, nasetikwemhlaba wonkhe, nasetikwato tonkhe tilwane letihamba ngesisu etikwemhlaba.

27 Ngako-ke boNkulunkulu behlela phansi kuyawukwenta umuntfu abe ngumfanekiso wabo, ngemfanekiso waboNkulunkulu bamenta, wesilisa newesifazane babenta.

28 BoNkulunkulu batsi: Sitawubabusisa. Baphindze batsi: Sitawubenta batalane bandze, bagcwalise umhlaba, bawuncobe, babuse etikwetinhlati taselwandle, nasetikwetinyoni tasemoyeni, nasetikwako konkhe lokuphilako lokuhamba etikwemhlaba.

29 BoNkulunkulu batsi: Buka, sitawubanika onkhe emakhambi laveta inhlanyelo leyawuvela emhlabeni wonkhe, nato tonkhe tihlahla lekuyawuba netitselo kuto; yebo, sitselo sesihlahla lesiveta inhlanyelo siyawubanika sona; kuyawuba kudla kwabo.

30 Kuto tonkhe tilwane temhlaba, nakuto tonkhe tinyoni tasemoyeni, nakuto tonkhe tintfo letihamba ngesisu etikwemhlaba, buka, sitawutiniketa imphilo, siphindze sitinikete onkhe emakhambi laluhlata kute abe kudla, futsi tonkhe leti tintfo tiyawuhlelwa kanjalo.

31 BoNkulunkulu batsi: Sitawutenta tonkhe tintfo lesitishito, sitente tibe khona; buka, tiyawulalela kakhulu. Futsi kwenteka kutsi kusuka kusihlwa kute kube sekuseni bakwetsa ngekutsi busuku; futsi kwenteka kutsi kusuka ekuseni kute kube kusihlwa bakwetsa ngekutsi yimini; babala sikhatsi sesitfupha.