INcwadzi ya-Abrahama
Ihunyushwe kusuka kuPhaphirasi, nguJoseph Smith
Kuhunyushwa kwemiBhalo yasendvulo lewele etandleni tetfu isuka emihumeni yaseGibhithe lokwakungcwatjwa kuyo. Imibhalo ya-Abrahama ngesikhatsi aseGibhithe, lebitwa ngeNcwadzi ya-Abrahama, lebhalwe ngesandla sakhe lucobo, kuphaphirasi.
Sehluko 1
Abrahama ufuna kutfola tibusiso teluhlelo lwebuphatriyakhi—Uhlushwa baphristi bemanga eKhaledi—Jehova uyamsindzisa—Indzabuko nekubuswa kweGibhithe kuyachazwa.
1 Eveni lemaKhaledi, ekhaya labokhokho, mine, Abrahama, ngabona kutsi bekudzingekile kutsi ngitfole lenye indzawo yekuhlala;
2 Futsi, ngekutfola kutsi bekunekutfokota lokukhulu nekuthula kanye nekuphumula kimi, ngafuna tibusiso tabokhokho, nelilungelo lekutsi ngibekwe kute ngiphatse leto tibusiso; ekubeni nami lucobo ngingumlandzeli wekulunga, ngifisa futsi kuba ngulomunye lonelwati lolukhulu, nekuba ngumlandzeli lomkhulu wekulunga, nekutsi ngibe nelwati loluningi, nekuba nguyise wetive letiningi, inkhosi yekuthula, ngifisa nekutfola imiyalo, nekugcina imiyaleto yaNkulunkulu, ngaba yindlalifa ngalokusemtsetfweni, uMphristi lomKhulu, ngiphetse lilungelo lelingelabokhokho.
3 Laniketwa kimi lisuka kubokhokho; lehla lisuka kubokhokho, kusukela ekucaleni kwesikhatsi, yebo, ngisho kusukela ekucaleni, noma ngaphambi kwekusekelwa kwemhlaba, kwehla njalo kute kube sikhatsi samanje, ngisho lilungelo lebutubulo, noma indvodza yekucala, lengu-Adamu, noma khokho wekucala, ngabokhokho kwehla njalo kute kube kimi.
4 Ngafuna kubekwa kwami kubo buPhristi ngendlela Nkulunkulu labeka ngayo bokhokho ngalokuphatselene nentalelwane.
5 Bokhokho bami, sebakushiyile kulunga kwabo, nemiyaleto lengcwele iNkhosi Nkulunkulu wabo lebeyibanikete yona, bakhonta bonkulunkulu bemahedeni, bala ngalokuphelele kulalela livi lami.
6 Ngoba tinhlitiyo tabo betigcile ekwenteni lokubi, futsi besebagcile ngalokuphelele kunkulunkulu wa-Elkhena, nakunkulunkulu waLibna, nakunkulunkulu waMamakra, nakunkulunkulu waKorashi, nakunkulunkulu waFaro, inkhosi yaseGibhithe;
7 Ngako-ke tinhlitiyo tabo taphendvukela kumihlatjelo yemahedeni ekunikeleni bantfwana babo kuleti tithico letingakhulumi, bangalilaleli livi lami, kodvwa betama kutsatsa imphilo yami ngesandla semphristi wa-Elkhena. Umphristi wa-Elkhena bekaphindze abe ngumphristi waFaro.
8 Manje, ngalesi sikhatsi bekulisiko lemphristi waFaro, inkhosi yaseGibhithe, kunikela elatini lebelakhiwe eveni laseKhaledi, kute kunikelwe kulabonkulunkulu labangatiwa, emadvodza, besifazane nebantfwana.
9 Futsi kwenteka kutsi lomphristi wenta umnikelo kunkulunkulu waFaro, nakunkulunkulu waShagrili, ngisho ngendlela yebaseGibhithe. Manje nkulunkulu waShagrili bekulilanga.
10 Ngisho umnikelo wekubonga wemntfwana umphristi waFaro wawunikela elatini lebelime ngasegcumeni lebelibitwa ngekutsi Ligcuma laPhotifari, lapho kucala khona litsafa lase-Olishemi.
11 Manje, lomphristi besekanikele kulelilati tintfombi letimsulwa letintsatfu ngesikhatsi sinye, lebetingemadvodzakati a-Onitha, lomunye wasebukhosini lophuma esitukulwaneni saHhamu. Leti tintfombi letimsulwa tanikelwa ngenca yebucotfo bato; betingavumi kuguca tikhonte bonkulunkulu belukhuni noma belitje, ngako-ke tabulawa etikwelatini, futsi kwentiwa ngendlela yemaGibhithe.
12 Futsi kwenteka kutsi baphristi bangibamba ngendluzula, kute nami bangibulale, njengoba benta kuleto tintfombi letimsulwa elatini; futsi kute ube nelwati lwalelilati, ngitakuyaleta kutsi uye emfanekisweni losekucaleni walombhalo.
13 Belakhiwe ngesimo seluhlaka lwembhedze, njengalolo lobelukhona emkhatsini wemaKhaledi, futsi belime embikwabonkulunkulu ba-Elkhena, Libna, Mamakra, Korashi, kanye nankulunkulu lofana newaFaro, inkhosi yaseGibhithe.
14 Kute ube nekucondza ngalaba bonkulunkulu, ngikunikete umfanekiso wabo kulemidvwebo lesekucaleni, loluhlobo lwemidvwebo lubitwa ngemaKhaledi ngekutsi yiRalenosi, lokusho kubhala ngemifanekiso.
15 Ngesikhatsi bangibamba ngetandla tabo, kute banginikele baphindze batsatse imphilo yami, buka, ngaphakamisela livi lami eNkhosini Nkulunkulu wami, iNkhosi yalalela yaphindze yeva, yangigcwalisa ngembono waSomandla, nengilosi lesuka ebukhoneni bakhe yema edvute nami, ngekushesha yatikhumula tinketane tami;
16 Livi lakhe latsi kimi: Abrahama, Abrahama, buka, libito lami nginguJehova, futsi ngikuvile, ngehlele kutawukukhulula, nekutawukususa emtini weyihlo, nakuto tonkhe tihlobo takho, ngikuyise kulelinye live longalati;
17 Loku kungenca yekutsi sebatiguculile tinhlitiyo tabo kimi, kute bakhonte nkulunkulu wa-Elkhena, nankulunkulu waLibna, nankulunkulu waMamakra, nankulunkulu waKorashi, nankulunkulu waFaro, inkhosi yaseGibhithe; ngako-ke ngehlele kubo kute ngitawubajezisa, nekutawubhubhisa loyo lokuphakamisela sandla, Abrahama, ndvodzana yami, kute akubulale.
18 Buka, ngitawukuhola ngesandla sami, ngitawukutsatsa, kute ngibeke kuwe libito lami, ngisho nebuPhristi beyihlo, nemandla ami ayawuba setikwakho.
19 Njengoba bekunjalo kuNowa kuyawuba njalo nakuwe; kodvwa ngebufundisi bakho libito lami liyawukwatiwa emhlabeni ingunaphakadze, ngoba nginguNkulunkulu wakho.
20 Buka Ligcuma laPhotifari beliseveni lase-Uri, yaseKhaledi. INkhosi yalidzilita lilati la-Elkhena, nelabonkulunkulu balelive, yababhubhisa nya, yamshaya umphristi kangangoba wafa; kwaba nesililo lesikhulu eKhaledi, nasemtini waFaro; Faro losho kutsi yinkhosi ngekutalwa ebukhosini.
21 Manje lenkhosi yaseGibhithe beyiyesitukulwane lesisuka esiswini saHhamu, futsi beyinengati yemaKhenani ngekutalwa.
22 Kusuka kulesitukulwane kwadzabuka onkhe emaGibhithe, ngaleyo ndlela ingati yemaKhenani yagcinwa kulelive.
23 Live laseGibhithe latfolwa kucala nguwesifazane, lobekayindvodzakati yaHhamu, futsi ayindvodzakati yaGibhithusi, ngesiKhaledi lokusho kutsi iGibhithe, lokusho kutsi loko lokungakavunyelwa;
24 Ngesikhatsi lona wesifazane atfola lelive belingephansi kwemanti, lokwatsi emuva kwesikhatsi wahlalisa emadvodzana akhe kulo; ngaleyo ndlela, kusuka kuHhamu, kwadzabuka sive lesagcina sicalekiso kulelive.
25 Manje umbuso wekucala waseGibhithe wasungulwa nguFaro, indvodzana lendzala yaGibhithusi, indvodzakati yaHhamu, futsi bewungendlela yembuso waHhamu, lowawubuphatriyakhi.
26 Faro, ayindvodza lelungile, wasungula umbuso waphindze wehlulela bantfu bakhe ngekuhlakanipha nangekulunga emalanga akhe onkhe, afuna ngenhlitiyo yakhe kulingisa lolohlelo lolwamiswa bokhokho etitukulwaneni tekucala, emalangeni ekubusa kwebuphatriyakhi bekucala, ngisho ekubuseni kwa-Adamu, nekwaNowa, uyise, lowambusisa ngetibusiso temhlaba, nangetibusiso tekuhlakanipha, kodvwa wamcalekisa ngalokuphatselene nalobuPhristi.
27 Manje, Faro anguwaleyo ntalelwane ngayo lebekangakwati kuba nelilungelo lebuPhristi, nanoma boFaro bebangafisa kulifuna kusuka kuNowa, ngaHhamu, ngako-ke babe waholelwa ekukhonteni kwabo tithico.
28 Kodvwa ngitawetama, emvakwaloku, kuniketa inchazelo yekwenteka kwetintfo kuya emuva kusuka kimi kuya ekucaleni kwendalo, ngoba imibhalo seyifikile etandleni tami, lengiyigcinile kute kube ngulesikhatsi samanje.
29 Manje, emvakwekutsi lomphristi wa-Elkhena asashayiwe wate wafa, kwabakhona kugcwaliseka kwaleto tintfo letashiwo kimi ngalokuphatselene nelive laseKhaledi, kutsi kufanele kubekhona indlala kulelive.
30 Kanjalo-ke indlala yabusa kulo lonkhe live laseKhaledi, nababe wahlukubeteka kakhulu ngenca yendlala, waphendvuka ebubini labebuhlosile ngalokumelene nami, kutsatsa imphilo yami.
31 Kodvwa imibhalo yabokhokho, ngisho baphatriyakhi, ngalokuphatselene nelilungelo lebuPhristi, iNkhosi Nkulunkulu wami yayigcina etandleni tami; ngako-ke lwati lwekucala lwendalo, nelwemaplanethi, nelwetinkhanyeti, njengoba kwatiswa kubokhokho, ngiselugcinile kute kube ngumanje, futsi ngisatowetama kubhala letinye taleti tintfo kulombhalo, kute kuzuze titukulwane tami letiyawukuta emuva kwami.