Sehluko 3
Abrahama ufundza ngelilanga, inyanga, netinkhanyeti ngekusebentisa i-Urimu neThumimu—INkhosi imembulela ngebungunaphakadze bemimoya—Ufundza ngemphilo leyendvulela yasemhlabeni, ngekugcotjwa ngaphambi kwekutalwa, ngeNdalo, ngekukhetfwa kweMhlengi, nesimo sekuphila sesibili semuntfu.
1 Futsi mine Abrahama, bengine-Urimu neThumimu, lebenginiketwe yona yiNkhosi Nkulunkulu wami, ngise-Uri lemaKhaledi;
2 Ngabona tinkhanyeti, kutsi betitinkhulu kakhulu, nekutsi yinye yato beyisondzele kakhulu esihlalweni sebukhosi saNkulunkulu; bekukhona letiningi letinkhulu lebetisedvutane naleyo;
3 INkhosi yatsi kimi: Leti nguletibusako; libito lalena lenkhulu yiKolobe, ngoba idvute nami, ngoba ngiyiNkhosi Nkulunkulu wakho: Ngimise lena kutsi ibuse tonkhe leto letingeteluhlelo lolufanako naleyo lome kuyo.
4 INkhosi yatsi kimi, nge-Urimu neThumimu, iKolobe beyingekweluhlobo lweNkhosi, ngekwetikhatsi netikhatsi tayo temnyaka ekujikeleteni kwayo; kutsi umjikeleto munye bekulilanga eNkhosini, ngekwendlela yayo yekubala, lowo mjikeleto uyinkhulungwane yeminyaka ngekwesikhatsi lesibekelwe leyo lome kuyo. Lena yindlela lebala ngayo sikhatsi iNkhosi, ngekwekubala sikhatsi enkhanyetini iKolobe.
5 INkhosi yatsi kimi: Iplanethi lenekukhanya lokuncane, lokuncane kunaloko lokufanele kubuse imini, ngisho loko kukhanya lokufanele kubuse busuku, ingetulu noma yinkhulu kunaleyo lome kuyo ngekubala sikhatsi, ngoba ihamba ngeluhlelo kancane kakhulu; loku kuseluhlelweni ngoba ime ngetulu kwemhlaba wena lome kuwo, ngako-ke kubala kwayo sikhatsi akukuningi ngalokuphatselene nesibalo semalanga, nesetinyanga, neseminyaka.
6 INkhosi yatsi kimi: Manje, Abrahama, lawa maciniso lamabili akhona, buka emehlo akho ayawabona; kuniketiwe kuwe kutsi wati tikhatsi tekubala, netikhatsi letibekiwe, yebo, sikhatsi lesibekiwe semhlaba lome etikwawo, nesikhatsi lesibekiwe sekukhanya lokukhulu lokubekelwe kubusa imini, nesikhatsi lesibekiwe sekukhanya lokuncane lokubekelwe kubusa busuku.
7 Manje sikhatsi lesibekiwe sekukhanya lokuncane sikhatsi lesidze ngalokuphatselene nekubala kwaleyo nkhanyeti kunekubala kwesikhatsi semhlaba lome kuwo wena.
8 Futsi uma kukhona lamaciniso lamabili, kuyawuba nalelinye liciniso ngetulu kwawo, lokusho kutsi, kuyawuba nalenye iplanethi kubala kwayo sikhatsi lokuyawuba kudze;
9 Ngaleyo ndlela kuyawuba nekubalwa kwesikhatsi seplanethi yinye ngetulu kwalenye, ute ufike dvutane nenkhanyeti iKolobe, iKolobe lehambisana nekubala kwesikhatsi seNkhosi; iKolobe lebekwe edvute nesihlalo sebukhosi saNkulunkulu, kubusa onkhe lawo maplanethi langekweluhlelo lolufanako naleyo lome kuyo.
10 Futsi kuniketiwe kuwe kutsi wati sikhatsi lesibekiwe sato tonkhe tinkhanyeti letibekelwe kutsi tinike kukhanya, ute ufike edvute nesihlalo sebukhosi saNkulunkulu.
11 Ngaleyo ndlela mine, Abrahama, ngakhuluma neNkhosi, buso nebuso, njengemuntfu akhuluma nalomunye; futsi yangitjela ngemisebenti lebeyentiwe tandla tayo;
12 Yatsi kimi: Ndvodzana yami, ndvodzana yami (futsi sandla sayo beselulekile), buka ngitawukukhombisa konkhe loku. Yabeka sandla sayo emehlweni ami, ngabona leto tintfo lebetentiwe tandla tayo, lebetitiningi, taphindzaphindzeka phambi kwemehlo ami, futsi angikwatanga kubona siphetfo sato.
13 Yatsi kimi: Lena yiShineha, lokulilanga. Yatsi kimi: IKokobe, lokuyinkhanyeti. Yatsi kimi: I-Oleya, lokuyinyanga. Yatsi kimi: IKokawubhimu, lokusho tinkhanyeti, noma konkhe kukhanya lokukhulu, lobekusesibhakabhakeni selizulu.
14 Futsi bekusebusuku ngesikhatsi iNkhosi ikhuluma lamagama kimi itsi: Ngitawukwandzisa, nentalelwane yakho emvakwakho, njengaleti tinkhanyeti; futsi uma ungakhona kubala linani lesihlabatsi, liyawuba ngako nelinani lentalelwane yakho.
15 INkhosi yatsi kimi: Abrahama, ngikukhombisa leti tintfo ngaphambi kwekutsi ungene eGibhithe, kute uwakhulume onkhe lamavi.
16 Uma kunetintfo letimbili letikhona, futsi kukhona lenye ngetulu kwalenye, kuyawuba khona letinye tintfo letinkhulu letingetulu kwato; ngako-ke iKolobe ingulenkhulu kakhulu kunayo yonkhe iKokawubhimu loyibonile, ngoba idvute nami.
17 Manje, uma kukhona tintfo letimbili, yinye ingetulu kwalenye, inyanga ingetulu kwemhlaba, uma kunjalo kungenteka kutsi kungaba khona lenye iplanethi noma inkhanyeti lengetulu kwayo; futsi kute intfo iNkhosi Nkulunkulu wakho layawukuhlela enhlitiyweni yakhe kutsi akwente ngaphandle kwaloko latawukwenta.
18 Noko yenta inkhanyeti lenkhulu; njengoba, futsi, uma kukhona imimoya lemibili, lomunye uhlakaniphile kunalomunye, noko lemimoya lemibili, nanoma lomunye uhlakaniphile kunalomunye, ayinasicalo; beyikhona phambilini, angeke ibe nesiphetfo, iyawuba khona emvakwaloko, ngoba inolamu, noma ngeyaphakadze.
19 Futsi iNkhosi yatsi kimi: Lamaciniso lamabili akhona, kutsi kunemimoya lemibili, lomunye uhlakaniphile kunalomunye; kuyawuba khona lomunye lohlakaniphe kakhulu kunayo; NgiyiNkhosi Nkulunkulu wakho, ngihlakaniphe kakhulu kunayo yonkhe.
20 INkhosi Nkulunkulu wakho itfumele ingilosi yayo kutsi ikukhulule etandleni temphristi wa-Elkhena.
21 Ngihlala emkhatsini wayo yonkhe imimoya; ngako-ke, manje ngehlile, ngeta kuwe kutawukwatisa imisebenti leyentiwe tandla tami, kuloko inhlakanipho yami yendlula kuhlakanipha kwemimoya yonkhe, ngoba ngibusa emazulwini ngetulu, nasemhlabeni ngaphansi, ngako konkhe kuhlakanipha nebuhlakani, ngetulu kwayo yonkhe imimoya emehlo akho lake ayibona kusukela ekucaleni; ngehlela phansi ekucaleni emkhatsini wayo yonkhe imimoya losewuyibonile.
22 Manje iNkhosi yayingikhombisile mine, Abrahama, imimoya leyayihleliwe umhlaba ungakabi khona; futsi emkhatsini wayo yonkhe lena bekukhona leminingi lenebuntfu nalemikhulu;
23 Futsi Nkulunkulu wabona kutsi labantfu bebalungile, wema emkhatsini wabo, watsi: Laba ngitawubenta babusi bami; ngoba bekeme emkhatsini walabo labebayimimoya, wabona kutsi bebalungile, wase utsi kimi: Abrahama, ungulomunye wabo, wakhetfwa ngaphambi kwekube utalwe.
24 Futsi bekume lomunye emkhatsini wabo lobekafana naNkulunkulu, watsi kulabo bekanabo: Sitawukwehlela phansi, ngoba kunemkhatsi lapha, futsi sitawutsatsa letinye taleti tintfo, sitawukwenta umhlaba lokutawuhlala kuwo laba;
25 Futsi sitawubavivinya ngalendlela, kute sibone kutsi batawutenta yini tonkhe tintfo iNkhosi Nkulunkulu wabo leyiyawubayaleta ngato;
26 Futsi labo labagcina simo sabo sekucala sekuphila bayawukwengetelwa; bese labo labangasigcini simo sabo sekucala sekuphila angeke batfole inkhatimulo embusweni lofanako nalabo labagcina simo sabo sekucala sekuphila; futsi labo labagcina simo sabo sesibili sekuphila bayawukwengetelwa inkhatimulo etinhloko tabo phakadze naphakadze.
27 INKhosi yatsi: Ngiyawutfuma bani na? Lomunye lobekafana neNdvodzana yeMuntfu waphendvula watsi: Ngilapha, tfuma mine. Lomunye waphendvula watsi: Ngilapha, tfuma mine. INkhosi yatsi: Ngitawutfuma lowekucala.
28 Lowesibili watfukutsela, wangasigcini simo sakhe sekucala sekuphila; futsi ngalelo langa baningi labamlandzela.