1 Manje iNkhosi Nkulunkulu yenta indlala lenkhulu kutsi idlange kakhulu eveni lase-Uri, kangangoba Harani, umnaketfu, wafa; kodvwa Thera, babe, wachubeka nekuhlala eveni lase-Uri, lemaKhaledi.

2 Futsi kwenteka kutsi mine, Abrahama, ngatsatsa Sarayi kutsi abe ngumkami, kwase kutsi Nahori, umnaketfu, watsatsa Milkha kutsi abe ngumkakhe, lobekayindvodzakati yaHarani.

3 Manje iNkhosi beyitsite kimi: Abrahama, phuma eveni lakini, nasetihlotjeni takho, nasendlini yeyihlo, uye eveni lengitawukukhombisa lona.

4 Ngako-ke ngalishiya live lase-Uri, lemaKhaledi, kute ngiye eveni laseKhenani, ngatsatsa Loti, indvodzana yemnaketfu, nemkakhe, naSarayi umkami; nababe wangilandzela, saya eveni lesaletsa ngekutsi yiHarani.

5 Indlala yancipha; babe wasala eHarani wahlala lapho, njengoba bekunemihlambi leminingi eHarani; futsi babe wabuyela ekukhonteni kwakhe tithico, ngako-ke wachubeka nekuhlala eHarani.

6 Kodvwa mine, Abrahama, naLoti, indvodzana yemnaketfu, sathandaza eNkhosini, iNkhosi yavela kimi, yatsi: Vuka, utsatse Loti ahambe nawe; ngoba ngihlose kukukhipha uphume eHarani, nekutsi ngikwente sisebenti kute ufakaze ngelibito lami eveni longalati lengitawuliniketa intalelwane yakho emvakwakho libe lifa laphakadze, uma balilalela livi lami.

7 Ngoba ngiyiNkhosi Nkulunkulu wakho; ngihlala ezulwini, umhlaba usenabelo setinyawo tami; ngelulela sandla sami etikwelwandle, futsi lulalele livi lami; ngenta umoya nemlilo kube yincola yami; ngitsi etintsabeni—Sukani lapha—futsi buka, tisuswa sivunguvungu, ngekuphatima kweliso, ngekushesha.

8 Libito lami nginguJehova, futsi ngiyasati siphetfo kusukela ekucaleni; ngako-ke sandla sami siyawuba setikwakho.

9 Futsi ngitawukwenta ube sive lesikhulu, ngitawukubusisa kakhulu, ngente libito lakho libe likhulu emkhatsini wetive tonkhe, uyawuba sibusiso entalelwaneni yakho emvakwakho, kute etandleni tabo baletse lobu bufundisi nebuPhristi etiveni tonkhe;

10 Ngitawubabusisa ngelibito lakho; ngoba bonkhe labo labayawemukela leli liVangeli bayawubitwa ngelibito lakho, futsi bayawubalwa njengentalelwane yakho, bayawuphakama baphindze bakubusise, njengeyise;

11 Ngitawubabusisa labakubusisako, ngibacalekise labakucalekisako; futsi kuwe (lokusho kutsi ebuPhristini bakho) nakuntalelwane yakho (lokusho kutsi, buPhristi bakho), ngoba ngikuniketa setsembiso sekutsi leli lilungelo liyawuhlala likuwe, nasentalelwaneni yakho emvakwakho (lokusho kutsi, intalelwane yakho lucobo, noma intalelwane yemtimba) imindeni yonkhe yemhlaba iyawubusiswa, ngisho nangetibusiso teliVangeli, lokutibusiso tensindziso, ngisho tekuphila lokuphakadze.

12 Manje, emvakwekutsi iNkhosi seyiyekelile kukhuluma nami, yabususa buso bayo kimi, ngatsi enhlitiyweni yami: Inceku yakho ikufunile ngebucotfo; manje sengikutfolile;

13 Utfumele ingilosi yakho kutsi itawungikhulula kubonkulunkulu ba-Elkhena, futsi kutawuba kuhle kutsi ngililalele livi lakho, ngako-ke inceku yakho ayisukume ihambe ngekuthula.

14 Ngako-ke mine, Abrahama, ngahamba njengekusho kweNkhosi, naLoti wahamba nami; mine, Abrahama, besengineminyaka lengemashumi lasitfupha nakubili budzala ngesikhatsi ngihamba eHarani.

15 Ngatsatsa Sarayi, lebengimente umkami ngisese-Uri, eKhaledi, naLoti, indvodzana yemnaketfu, nemphahla yetfu yonkhe lebesesiyigcogcile, nebantfu lebesesibatfolile eHarani; saphuma sahamba endleleni leya eveni laseKhenani, sahlala emathendeni ngesikhatsi sisahamba endleleni yetfu;

16 Ngako-ke, liphakadze bekusivikelo setfu nelidvwala letfu nensindziso yetfu, ngesikhatsi sihamba sisuka eHarani sendlula ngendlela yaseJeshoni, kuta eveni laseKhenani.

17 Manje mine, Abrahama, ngakha lilati eveni laseJeshoni, ngenta umnikelo eNkhosini, ngathandazela kutsi indlala isuswe endlini yababe, kute bangafi.

18 Sase sendlula eJeshoni ekhatsi nelive saya endzaweni yaseSekhemu; beyingasematsafeni aseMore, futsi besesifikile eminceleni yelive lemaKhenani, lapho ngenta umnikelo ematsafeni aseMore, ngathandaza eNkhosini ngenshisekelo, ngoba besesifikile eveni lesive lesikhonta tithico.

19 INkhosi yavela kimi kuphendvula imithandzao yami, yatsi kimi: Lelive ngitawulinika intalelwane yakho.

20 Mine, Abrahama, ngasukuma endzaweni yelilati lebengilakhele iNkhosi, ngasuka ngaleso sikhatsi ngaya entsabeni lebeyisemphumalanga yeBetheli, ngamisa lithende lami lapho, iBetheli ingasenshonalanga, i-Ayi ingasemphumalanga; lapho ngakhela inkhosi lelinye lilati, ngaphindze ngabita libito leNkhosi.

21 Mine, Abrahama, ngahamba, ngachubeka ngaya ngaseningizimu, futsi lapho bekusachubeka indlala eveni, mine, Abrahama, ngatsatsa sincumo sekuya entasi eGibhithe, kuyawuhlala sikhashana lapho, ngoba indlala yadlanga kakhulu.

22 Futsi kwenteka kutsi ngesikhatsi sengisondzela kute ngingene eGibhithe, iNkhosi yatsi kimi: Buka, Sariya, umkakho, unguwesifazane lomuhle kakhulu lobukekako;

23 Ngako-ke kuyawukwenteka, uma emaGibhithe ambona, atawutsi—Ngumkakhe; futsi batawukubulala, kodvwa batawuyisindzisa yakhe imphilo; ngako-ke, cinisekisani kutsi nenta naku:

24 Akatsi kumaGibhithe, ungudzadzewenu, futsi imphilo yakho iyawuphepha.

25 Futsi kwenteka kutsi mine, Abrahama, ngatjela Sarayi, umkami, konkhe loko iNkhosi beyikushito kimi—Ngako-ke tsani kubo, ngiyakucela, ungudzadzewetfu, kute kube kuhle kimi ngenca yakho, futsi imphilo yami iyawuphepha ngenca yakho.