Vahe 9
1 Oku alu a Siba i he fekau a Tevita ke omi a Mifiboseti. 7 Koe mea i he ene manatu ofa kia Jonatane oku ne tali lelei ia mo ne toe age ki ai ae koloa kotoabe a Saula. 9 Oku ne tuku a Siba ke bule‘i ae tauhi o ene gaahi goue.
¶ 1 BEA nae behe e Tevita, Oku kei toe ni ha toko taha i he fale o Saula, koeuhi keu fakaha ha ofa ki ai koeuhi ko Jonatane?
2 Bea nae i he fale o Saula ae tamaioeiki aia nae higoa ko Siba. Bea i he e nau ui mai ia ke ha‘u kia Tevita, nae behe e he tu‘i kiate ia, Ko Siba koe? bea nae behe mai eia, Ko hoo tamaioeiki au.
3 Bea nae behe e he tu‘i, Oku ikai toe koa ha toko taha oe fale o Saula, koeuhi keu fakaha kiate ia ae gaue lelei fakaotua kiate ia? Bea nae behe e Siba ki he tu‘i, Oku kei moui ha foha o Jonatane oku ketu.
4 Bea nae behe e he tu‘i kiate ia, Oku nofo ia kife? Bea nae behe e Siba ki he tu‘i, Vakai, oku nofo ia i he fale o Mākili, koe foha o Amieli i Lo‐tibale.
5 Bea nae toki fekau e Tevita ke omi ia mei he fale o Mākili, koe foha o Amieli, mei Lo‐tibale.
¶ 6 Bea koeni, i he ene ha‘u kia Tevita, a Mifiboseti koe foha o Jonatane, koe foha o Saula, naa ne to hifo ki hono mata, o ne fai fakaabaaba. Bea nae behe e Tevita, Mifiboseti. Bea nae tali eia, o behe Vakai ko hoo tamaioeiki au!
7 Bea nae behe e Tevita kiate ia, Oua naa ke manavahe: he teu fakaha mooni kiate koe ae ofa, koeuhi ko Jonatane ko hoo tamai, bea teu toe age kiate koe ae fonua kotoabe o Saula ko hoo tamai; bea te ke ma‘u hoo mea kai mei hoku keinagaaga mau ai be.
8 Bea naa ne bunou hifo ia, o ne behe, Koeha hoo tamaioeiki ke ke jio ai ki ha kuli mate o hage ko au?
¶ 9 Bea nae toki ui e he tu‘i kia Siba koe tamaioeiki a Saula, o ne behe kiate ia, Kuou foaki ki he foha o hoo eiki, ae mea kotoabe nae o Saula bea mo hono fale kotoabe.
10 Bea koia te ke goue‘i ae fonua maana, ekoe mo hoo gaahi foha, bea mo hoo kau tamaioeiki, bea te ke utu mai, koeuhi ke ai ha meakai ki he foha o hoo eiki: ka e kai e Mifiboseti koe foha o hoo eiki, i hoku keinagaaga mau ai be. Bea koeni nae ia Siba ae fānau tagata e toko hogofulu ma nima, moe kau tamaioeiki e toko uofulu.
11 Bea nae toki behe ai e Siba ki he tu‘i, O hage koia kotoabe kuo fekau e hoku eiki koe tu‘i ki he ene tamaioeiki, e behe hono fai e hoo tamaioeiki. Ka nae behe e he tu‘i, E kai a Mifiboseti i hoku keinagaaga ooku o hage ko ha toko taha i he gaahi foha oe tu‘i.
12 Bea nae ma‘u e Mifiboseti ae foha jii aia nae ui ko Mika. Bea ko kinautolu kotoabe nae nofo i he fale o Siba naa nau tauhi kia Mifiboseti.
13 Koia nae nofo ai a Mifiboseti ki Jelusalema; he naa ne kai mau ai be i he keinagaaga oe tu‘i; bea nae ketu hono va‘e fakatouoji.