¶ 1 NAE fai fuoloa foki ae tau ae fale o Saula bea moe fale o Tevita: ka nae fakaaau be ke malohi lahi a Tevita, bea nae fakaaau ke vaivai hifo ae fale o Saula.

¶ 2 Bea nae fanau ae fānau tagata kia Tevita i Hebeloni: ko hono uluaki ko Amanoni, ia Ahinoami koe  fefine Jesilili;

3 Bea ko hono toko ua ko Kiliabi, ia Abikale nae unoho mo Nabale koe  tagata Kameli; bea ko hono toko tolu ko Abisalomi, koe tama a Meaka, koe ofefine o Talimai koe tu‘i o Kesuli:

4 Bea ko hono toko fa, ko Atonija, koe tama o Hakiti; bea ko hono toko nima, ko Sifatia koe tama o Abitali;

5 Bea ko hono toko ono, ko Itiliami, ia Ekila koe unoho o Tevita. Nae fanau‘i akinautolu ni kia Tevita i Hebeloni.

¶ 6 Bea nae hoko o behe, i he lolotoga ae fetauaki ae fale o Saula bea moe fale o Tevita, nae kau malohi a Abina ki he fale o Saula.

7 Bea nae ai ae fefine jinifu o Saula, aia nae higoa ko Lisiba, koe taahine, o Aia: bea nae behe e  Isiboseti kia Abina, Koeha kuo ke hu atu ai ki he jinifu o eku tamai?

8 Bea nae toki ita aubito a Abina koeuhi koe lea a Isiboseti, bea ne behe, He koe ulu au o ha kuli? kuou fai lelei ki Juta he aho ni ki he fale o Saula ko hoo tamai, ki hono gaahi tokoua, bea ki hono kaiga, bea kuo ikai teu tukuage koe ki he nima o Tevita, ka kuo ke lau kiate au he aho ni ha mea hala ki he fefine ni?

9 Ke fai e he Otua kia Abina, o lahi hake foki, o kabau e ikai teu fai o hage koe fuakava a Jihova kia Tevita;

10 Ke hiki ae buleaga mei he fale o Saula, bea ke fokotuu ae nofoa fakatu‘i o Tevita ki Isileli mo Juta, o fai atu mei Tani o a‘u ki Beasiba.

11 Bea nae ikai te ne toe faa lea mai kia Abina, he naa ne manavahe kiate ia.

¶ 12 Bea nae fekau atu e Abina ae kau talafekau kia Tevita maana, o ne behe, Oku ohai ae fonua? mo ne behe, Ke ta kau taha mo au, bea vakai, e iate koe a hoku nima, ke fakatoka a Isileli kotoabe kiate koe.

¶ 13 Bea naa ne behe, Oku lelei, teu fai ha fuakava mo koe: ka koe mea e taha kuo bau hoku loto ke ke fai, aeni, E ikai te ke jio ki hoku mata, o kabau e ikai te ke tomua omi a Mikale koe ofefine o Saula, oka ke ka ha‘u ke jio ki hoku mata.

14 Bea nae ave e Tevita ae kau talafekau kia Isiboseti koe foha o Saula, o ne behe, Tuku mai hoku unoho ko Mikale, aia naaku boloi kiate au aki ae mua kili e teau oe kau Filisitia.

15 Bea nae fekau e Isiboseti, o ne omi ia mei hono unoho ko Faliteli koe foha o Leisi.

16 Bea nae muimui tagi be a hono unoho iate ia o a‘u ki Bahulimi. Bea nae behe ai e Abina kiate ia, Alu, o foki atu. Bea naa ne foki age.

¶ 17 Bea nae fealeleaaki a Abina bea moe kau mātua o Isileli, o ne behe, I he kuoga kuo hili naa mou kumi kia Tevita ke ne tu‘i kiate kimoutolu:

18 Bea koeni fai ia: he kuo folofola a Jihova ia Tevita, o behe, I he nima o hoku tamaioeiki ko Tevita teu fakamoui a hoku kakai Isileli mei he nima oe kau Filisitia, bea mei he nima o ho nau gaahi fili kotoabe.

19 Bea nae lea foki a Abina ke ogoatu ki Benijimani: bea nae alu foki a Abina ke lea i he teliga o Tevita i Hebeloni, i he mea kotoabe nae lotolelei ki Isileli, moia nae lelei ai ae fale kotoabe o Benijimani.

20 Koia nae ha‘u ai a Abina ki Hebeloni kia Tevita, bea nae iate ia ae kau tagata e toko uofulu. Bea nae fai ha katoaga e Tevita kia Abina bea moe kau tagata nae iate ia.

21 Bea nae behe e Abina kia Tevita, Teu tuu hake o alu, bea teu tanaki a Isileli katoa ki hoku eiki koe tu‘i koeuhi ke nau fai ha fuakava mo koe, bea koeuhi ke ke bule‘i aia kotoabe oku holi ho loto ki ai. Bea nae tukuage e Tevita a Abina; bea naa ne alu i he melino be.

¶ 22 Bea vakai, nae liu mai ae kakai o Tevita mo Joabe mei he vahega tau, bea  naa nau omi mo kinautolu ae fuu koloa lahi: ka nae ikai ia Tevita a Abina i Hebeloni; he kuo oji a ene tukuage ia, bea kuo alu ia i he melino.

23 Bea i he ene hoko mai a Joabe moe kakai kotoabe nae iate ia, naa nau fakaha kia Joabe, o behe, Nae ha‘u a Abina koe foha o Nea ki he tu‘i, bea kuo ne tuku ia ke alu, bea kuo alu melino be ia.

24 Koia nae toki ha‘u ai a Joabe ki he tu‘i o ne behe, Koeha eni kuo ke fai? Vakai kuo ha‘u a Abina kiate koe; koeha kuo ke tuku ai ia ke ne alu, bea kuo ne mole atu aubito?

25 Oku ke ilo a Abina koe foha o Nea naa ne ha‘u ke kākā‘i koe, bea ke ne mataki‘i a hoo fealuaki, bea ke ilo aia kotoabe oku ke fai.

26 Bea hili a ene ha‘u a Joabe mei a Tevita, naa ne kouna atu ae kau talafekau kia Abina, bea naa nau omi ia mei he vaikeli ko Sila: ka nae ikai ilo ia e Tevita.

27 Bea i he ene liliu mai a Abina ki Hebeloni, nae ave ia e Joabe ki he kau hala i he mataba ke lea fakafufu kiate ia, bea naa ne hoka‘i ia i ai i hono kete ke ne mate, koeuhi koe toto o hono tokoua ko Asaeli.

¶ 28 Bea i he ene toki fanogo ki ai a Tevita, naa ne behe, Oku ou ataatā au mo hoku buleaga i he ao o Jihova, o taegata, i he toto o Abina koe foha o Nea:

29 Tuku ke to ia ki he ulu o Joabe, bea ki he fale kotoa o ene tamai; bea oua naa hala ae fale o Joabe i ha kuoga, i ha taha oku mahaki kovi be ha kilia, be ha taha oku faaki ki ha tokotoko, be ha taha oku to ki he heleta, be ha taha oku majiva meakai.

30 Koia nae tamate‘i a Abina e Joabe mo Abisai ko hono tokoua, koeuhi ko ene tamate‘i a ho na tokoua ko Asaeli i he tau i Kibea.

¶ 31 Bea nae behe e Tevita kia Joabe, bea ki he kakai kotoabe nae iate ia, Haehae a ho mou gaahi kofu, bea nonoo akimoutolu aki ae tauagaa, bea tegihia a Abina. Bea nae muimui e Tevita koe tu‘i ki he fata  oe bekia.

32 Bea naa nau tanu a Abina i Hebeloni: bea nae hiki hake e he tu‘i hono le‘o o ne tagi i he faitoka o Abina; bea nae tagi ae kakai kotoabe.

33 Bea nae tegihia e he tu‘i a Abina, o ne behe, Koeha kuo mate ai a Abina, o hage ko ha tagata kovi?

34 Nae ikai ha‘i ho nima, bea nae ikai fakamau ho va‘e i he mea ha‘i: o hage koe to ha tagata i he ao oe kakai agakovi, nae behe a hoo higa. Bea nae toe tegihia ia e he kakai kotoabe.

35 Bea i he ha‘u ae kakai kotoabe kia Tevita ke kole ia ke ne kai ha mea i he ene kei aho, nae fuakava e Tevita, o behe, Ke behe hono fai kiate au e he Otua, o lahi hake, o kabau teu kamata ha  koga ma, be ha mea kehe, kae oua ke to hifo ae laa.

36 Bea nae tokaga ae kakai kotoabe, bea naa nau leleiia ai: o hage foki koe fiemalie ae kakai kotoabe i he mea kotoabe nae fai e he tu‘i.

37 He nae ilo i he aho koia e he kakai kotoabe mo Isileli kotoabe, nae ikai koe loto oe tu‘i ke tamate‘i a Abina koe foha o Nea.

38 Bea nae behe e he tu‘i ki he ene kau tamaioeiki, Ikai oku mou ilo koe eiki moe tagata ogoogo kuo to hifo he aho ni i Isileli?

39 Bea kuou vaivai he aho ni, ne ogo kuo bani au koe tu‘i: bea oku faigataa fau kiate au ae kau tagata na koe gaahi tama o Seluia: e totogi e Jihova ki he fai kovi o fakatatau mo ene gaue kovi.