¶ 1 BEA hili ae gaahi mea ni, nae fehui e Tevita kia Jihova, o behe, E lelei a eku alu hake ki ha taha oe gaahi kolo o Juta? Bea nae behe kiate ia e Jihova, Alu hake. Bea nae behe e Tevita, Teu alu kife? Bea naa ne behe, Ki Hebeloni.

2 Koia nae alu a Tevita ki ai, koia mo hono ogo unoho foki, ko Ahinoami koe  fefine Jesilili, mo Abikale nae unoho mo Nabale koe  tagata Kameli.

3 Bea koe kau tagata nae iate ia, nae o hake akinautolu e Tevita, koe tagata taki taha mo hono kauga nofoaga: bea naa nau nofo i he gaahi kolo o Hebeloni.

4 Bea nae ha‘u ae kau tagata mei Juta, bea naa nau fakanofo i ai a Tevita koe tu‘i ki he faahiga o Juta. Bea naa nau tala kia Tevita, o behe, Koe kau tagata o Jebesi‐kiliati, ko kinautolu ia nae tanu a Saula.

¶ 5 Bea nae kouna e Tevita ae kau talafekau ki he kakai o Jebesi‐kiliati, o ne behe kiate kinautolu, Ke fakamonuia akimoutolu mei a Jihova, koeuhi kuo mou fakaha ae ofa ni ki ho mou eiki, io kia Saula, bea kuo mou fai hono butu.

6 Bea ofa eni ke fakaha e Jihova ae agalelei moe mooni kiate kimoutolu: bea ko au foki, teu totogi ae gaue lelei ni, koeuhi kuo mou fai ae mea ni.

7 Koia, tuku eni ke fakamalohi ho mou nima, bea mou loto to‘a: he kuo bekia a ho mou eiki ko Saula, bea kuo fakanofo au foki e he faahiga o Juta koe tu‘i kiate kinautolu.

¶ 8 Ka nae ave a Isiboseti koe foha o Saula, e Abina koe foha o Nea, koe eiki oe kau tau a Saula, o ne omi ia ki Mehanemi;

9 O ne fakanofo ia ke tu‘i i Kiliati, bea ki he kakai Asilia, mo Jesilili, mo Ifalemi bea mo Benijimani, bea ki Isileli katoa.

10 Nae fagofulu ta‘u ae motua a Isiboseti koe foha o Saula i he ene kamata bule ki Isileli, bea naa ne bule i he ta‘u e ua. Ka nae muimui ae faahiga o Juta kia Tevita.

11 Bea koe kuoga nae tu‘i ai a Tevita i Hebeloni ki he fale o Juta, koe ta‘u ia e fitu moe mahina e ono.

¶ 12 Bea nae alu mei Mehanemi ki Kibione a Abina koe foha o Nea, bea moe kau tamaioeiki a Isiboseti koe foha o Saula.

13 Bea nae alu atu a Joabe koe tama o Seluia, bea moe kau tamaioeiki a Tevita, bea naa nau fakataha ki he anovai o Kibione: bea naa nau nofo hifo, koe taha ki he botu anovai e taha, bea koe taha ki he botu anovai e taha.

14 Bea nae behe e Abina kia Joabe, Tuku ke tuu hake ni ae kau talavou, o fakavā i ho ta ao. Bea nae behe e Joabe, Tuku ke nau tuu hake.

15 Bea nae toki tuu hake mo alu atu ae toko hogofulu ma ua mei Benijimani nae lau, aia nae kau kia Isiboseti koe foha o Saula, moe toko hogofulu ma ua mei he kau tamaioeiki a Tevita.

16 Bea naa nau febukeaki taki taha e he tagata ae ulu o hono hoa, o nau taki taha fetuiaki ae heleta akinautolu i he vakavaka; bea koia, naa nau to hifo fakataha ai; bea koia nae ui ai ae botu koia, Koe botu ae kau tagata malohi, aia oku i Kibione.

17 Bea nae fakamanavahe ae tau i he aho koia: bea nae fakavaivai a Abina, bea moe kau tagata o Isileli, i he ao oe kakai o Tevita.

¶ 18 Bea nae i ai ae tama e toko tolu o Seluia, ko Joabe, Mo Abisai, mo Asaeli: bea nae veevave a Asaeli o tatau moe anitelobe hehegi oe vao.

19 Bea nae tuli e Asaeli kia Abina; bea i he ene alu nae ikai ke feafeaki ia ki he toomatau be ki he toohema, i he ene tulia a Abina.

20 Bea nae toki jio ki mui a Abina, o ne behe, Ko Asaeli koe? Bea naa ne behe atu, Ko au.

21 Bea nae behe e Abina kiate ia, Ke ke foki atu ki he toomatau be ki hoo toohema, bea ke buke ha taha oe kau talavou, bea ke ma‘u a hono mahafu. Ka nae ikai afe atu a Asaeli mei he  ene tuli kiate ia.

22 Bea nae toe behe e Abina kia Asaeli, Tafoki atu koe mei hoo tuli kiate au: koe umaa a eku ta hifo koe ki he kelekele? bea ka behe e fefe eku hiki a hoku mata kia Joabe ko ho tokoua?

23 Ka ne ogo eni nae ikai te ne afe atu: koia nae hoka‘i ia i hono kete e Abina aki ae mui oe tao, bea nae aji atu ae tao i hono tua: bea naa ne to hifo i ai, o ne mate i he botu koia: bea nae hoko o behe, iloga akinautolu nae hoko mai ki he botu nae to hifo ai a Asaeli o ne mate, naa nau tuu mau ai.

24 Nae tuli foki a Abina e Joabe bea mo Abisai: bea nae to ae laa feouga moe na hoko ki he mouga ko Ama, aia oku haga ki Kia i he hala oe toafa o Kibione.

¶ 25 Bea nae fakataha akinautolu e he fānau o Benijimani ke kau taha kia Abina, bea naa nau hoko koe vahega tau be taha, o nau tutuu i he tumutumu o ha botu maoluga.

26 Bea nae toki ui e Abina kia Joabe, o behe, E tamate‘i mau ai be e he heleta? ikai oku ke ilo e ai ha fakamamahi i hono ikuaga? Bea ka kuo behe, bea e fefe‘i a hono fuoloa, kae oua ke ke tala ki he kakai ke foki atu mei he tulia a ho nau kaiga?

27 Bea nae behe e Joabe, Hage oku moui ae Otua, ka ne ikai te ke lea, behe, kuo alu ae kakai taki taha mei he muimui ki hono kaiga i he anebogibogi.

28 Koia nae ifi ai e Joabe ha mealea, bea nae tuu mau ae kakai kotoabe, bea nae ikai te nau kei tuli ki Isileli, bea nae ikai toe fai ha tau.

29 Bea nae fonoga a Abina bea mo ene kakai kotoabe i he bo katoa koia, i he toafa, o nau aa i Joatani, bea nau ojiki ae  fonua kotoabe ko Bitiloni, bea naa nau hoko atu ki Mehanemi.

30 Bea nae liliu mai a Joabe mei he ene tuli a Abina; bea i he ene tanaki fakataha ae kakai kotoabe, koe toko hogofulu ma toko hiva oe kau tagata a Tevita nae ikai iloa, bea mo Asaeli.

31 Ka kuo oji ae teia ke mate e he kakai o Tevita ae kau tagata mei Benijimani, moe kau tagata o Abina, ae toko tolugeau ma toko onogofulu.

¶ 32 Bea naa nau too hake a Asaeli, o nau tanu ia he fonualoto o ene tamai, aia nae i Betelihema. Bea nae fonoga a Joabe mo ene kakai i he bo katoa, bea naa nau hoko ki Hebeloni o feouga mo ene mafoa ae ata.