¶ 1 BEA nae lau hake e Tevita ae kakai nae iate ia, mo ne fakanofo ae gaahi eiki ke bule ki he gaahi toko afe, gaahi eiki ke bule ki he gaahi toko teau.

2 Bea nae fekau atu e Tevita a hono vahe tolu oe kakai ke bule‘i e Joabe, mo hono vahe e taha ke bule‘i e Abisai koe tama o Seluia, koe tokoua o Joabe, bea moe vahe e taha ke bule‘i e Itei koe tagata Kati. Bea nae behe e he tu‘i ki he kakai, Ko au foki teu alu atu mooni fakataha mo kimoutolu.

3 Ka nae beheage e he kakai, E ikai te ke alu atu: he kabau te mau hola, e ikai te nau tokaga kiate kimautolu; bea kabau e mate haa mau vahe ua malie, e ikai te nau tokaga kiate kimautolu: ka ko koe oku ke mahuiga i ha toko mano okimautolu: koia foki oku lelei hake ke ke tokoni mai koe kiate kimautolu mei he loto kolo.

4 Bea nae behe e he tu‘i kiate kinautolu, Koe mea oku lelei hake kiate kimoutolu teu fai be ia. Bea nae tuu ae tu‘i ki he vee mataba  oe kolo, bea nae alu atu ae kakai i he gaahi toko teau moe gaahi toko afe.

5 Bea nae fekau e he tu‘i kia Joabe mo Abisai mo Itei, o behe, Fai fai malie koeuhi ko au ki he talavou ko Abisalomi. Bea nae ogo‘i e he kakai kotoabe a ene tuku e he tu‘i ae fekau nae kau kia Abisalomi.

¶ 6 Bea behe, nae alu atu ae kakai ki tuaa ke tau‘i a Isileli: bea nae hoko ae tau i he vao akau i Ifalemi;

7 Aia nae tamate‘i i ai ae kakai o Isileli i he ao oe kau tamaioeiki a Tevita, bea nae fai i ai ae tamate‘i lahi i he aho koia, koe kau tagata e toko ua mano.

8 He nae fai ae tau o foliaki i he fuga fonua kotoabe: bea nae maumau‘i o toko lahi hake ae kakai i he vao akau i he aho koia, kae jii ae maumau e he heleta.

¶ 9 Bea nae fetaulaki a Abisalomi moe kau tamaioeiki a Tevita. Bea nae heka a Abisalomi ki ha miuli, bea nae alu ae miuli i he lalo vaa malohi oe oke lahi, bea nae efihia‘i hono ulu i he oke, bea nae tautau hake ia i he vahaa oe lagi moe  fuga kelekele; bea nae moleage ae miuli mei lalo iate ia.

10 Bea nae jio ki ai ae tagata e toko taha, o ne tala ia kia Joabe, o behe, Vakai, naaku mamata kia Abisalomi kuo tautau i ha oke.

11 Bea nae behe e Joabe ki he tagata nae fakaha mai ia kiate ia, Bea vakai, naa ke jio  ki ai, bea koeha nae ikai ai te ke ta‘i hifo ia i ai ki he kelekele? ka ne ke behe, kuou tuku kiate koe ha  sikeli siliva e hogofulu bea mo ha noovala.

12 Bea nae behe e he tagata kia Joabe, Ka neu ma‘u ha  sikeli siliva e afe ki hoku nima, ne ogo ia e ikai teu ala atu hoku nima ki he alo oe tu‘i: he naa mau fanogo ki he fekau‘i akoe mo Abisai, mo Itei, e he tu‘i, o behe, Mou vakai kotoabe telia naa alaji ae talavou ko Abisalomi.

13 Ke neu fai behe, behe kuou fai ae lohiaki‘i ki he eku moui aaku: he oku ikai fufu ha mea mei he tu‘i, bea naa mo koe te ke ita kiate au

14 Bea nae toki behe e Joabe, E ikai aoga a eku tatali mo koe. Bea naa ne too i hono nima ae foi tao e tolu, o ne velo aki ia ke aji i he mafu o Abisalomi lolotoga a ene kei moui i he lotolotoga oe  akau koe oke.

15 Bea nae kabu‘i mo ta‘i a Abisalomi e he kau talavou e toko hogofulu nae fua ae mahafu tau a Joabe, o nau tamate‘i ia.

16 Bea nae ifi e Joabe ae mealea, bea nae foki mai ae kakai mei he e nau tuli ki Isileli: he nae taofi ae kakai e Joabe.

17 Bea naa nau ave a Abisalomi o li ia ki ha fuu luo lahi nae i he vao akau, bea nae fokotuu ki oluga iate ia ha fuu eji maka lahi; bea nae feholaki a Isileli katoa taki taha ki hono fale fehikitaki.

¶ 18 Ka koeni, lolotoga a ene kei moui nae gaohi mo fokotuu e Abisalomi maana ha fuu bou, aia oku i he telea oe tu‘i: he naa ne behe, Oku ikai haku foha ke manatu‘i ai a hoku higoa: bea naa ne ui ae bou ki hono higoa oona: bea oku ui ia o a‘u ki he aho ui, Koe botu a Abisalomi.

¶ 19 Bea nae toki behe e Ahimasi koe foha o Satoki, Tuku eni keu lele, bea ave ae ogoogo ki he tu‘i, oe totogi kuo fai e Jihova ki hono gaahi fili.

20 Bea nae behe e Joabe kiate ia, E ikai te ke ave ha ogoogo he aho ni, ka te ke ave ae agoogo i ha ahoage: ka koe aho ni e ikai te ke ave ha ogoogo, he kuo bekia ae alo oe tu‘i.

21 Bea nae toki behe e Joabe kia Kusi, Alu o tala ki he tu‘i aia kuo ke mamata ki ai. Bea nae bunou hifo a Kusi kia Joabe, o ne lele.

22 Bea nae toe behe ai e Ahimasi koe foha o Satoki kia Joabe, Oku ou kole kiate koe, ha mea be e fai, kae tuku be au keu lele muimui ia Kusi. Bea nae behe e Joabe, Koeha ka ke ka lele ai koe, hoku foha, ka oku ikai iate koe ha ogoogo oku lelei?

23  Bea naa ne behe, Ne ogo ia tuku keu lele. Bea naa ne behe kiate ia, Lele. Bea nae toki lele ai a Ahimasi i he hala oe toafa, bea naa ne li‘a a Kusi.

24 Bea nae nofo a Tevita i he vahaa oe ogo mataba oe kolo: bea nae alu hake ae tagata leo ki he tuafale i he a o feouga hake moe mataba, bea naa ne haga hake hono mata, o ne jio, bea vakai nae lele mai ae tagata nae toko taha be.

25 Bea nae kalaga e he tagata leo, o ne fakaha  ia ki he tu‘i. Bea nae behe e he tu‘i, Kabau oku ne toko taha be oku ai ha ogoogo i hono gutu. Bea naa ne ha‘u fakatootoo be, o  ne fakaofiofi mai.

26 Bea nae mamata e he tagata leo ki he tagata kehe e toko taha oku lele: bea nae ui e he tagata leo ki he tagata nae tauhi mataba, o ne behe, Vakai oku lele mai toko taha be ae tagata kehe. Bea nae behe e he tu‘i, Oku omi ae ogoogo eia foki.

27 Bea nae behe e he tagata leo, Oku ou mahalo oku lele aia oku muomua o hage koe lele a Ahimasi, koe foha o Satoki. Bea nae behe e he tu‘i, Koe tagata lelei ia, bea oku omi eia ae ogoogo lelei.

28 Bea nae ui a Ahimasi, o ne behe ki he tu‘i, Ke ke fiemalie. Bea naa ne tomabee hifo i hono mata ki he kelekele i he ao oe tu‘i, o ne behe, Fakafetai kia Jihova ko ho Otua, aia kuo ne fakamoua ae kau tagata nae hiki hake ho nau nima ke agatuu ki hoku eiki koe tu‘i.

29 Bea nae behe e he tu‘i, Oku lelei koa ae talavou ko Abisalomi? Bea nae behe e Ahimasi, I he ene fekau e Joabe ae tamaioeiki ae tu‘i bea mo au ko hoo tamaioeiki, naaku mamata ki he fuu vākē lahi ka nae ikai teu ilo a hono uhiga.

30 Bea nae behe atu e he tu‘i, Tuu atu koe ki hena. Bea naa ne tuu atu, mo ne tatali ai.

31 Bea vakai, nae ha‘u Kusi; bea nae behe e Kusi, E hoku eiki koe tu‘i, oku ou omi ae ogoogo: he kuo fai totogi he aho ni e Jihova maau kiate kinautolu kotoabe nae tuu agatuu hake kiate koe.

32 Bea nae behe e he tu‘i kia Kusi, Oku lelei koa ae talavou ko Abisalomi? Bea nae beheage e Kusi, Ke tatau moe tagata talavou na, ae gaahi fili o hoku eiki koe tu‘i, bea mo kinautolu kotoabe oku tuu hake ke fai ha kovi kiate koe.

¶ 33 Bea nae mamahi lahi aubito ae tu‘i, bea naa ne alu hake ki he botu fale nae i oluga i he matani kolo mo ne tagi ai: bea lolotoga a ene alu nae behe a ene lea, E Abisalomi ko hoku foha, a hoku foha, a hoku foha ko Abisalomi, taumaiā kuou mate koeuhi ko koe, e Abisalomi, ko hoku foha, ko hoku foha.