ປຈສ, ມັດທາຍ 17:10–14. ປຽບທຽບໃສ່ກັບ ມັດທາຍ 17:11–13
ພຣະເຢຊູສອນກ່ຽວກັບອີລາຍສອງຄົນ—ຜູ້ໜຶ່ງເພື່ອຕຽມ ແລະ ອີກຜູ້ໜຶ່ງເພື່ອຟື້ນຟູ.
10 ແລະ ພຣະເຢຊູໄດ້ຕອບ ແລະ ໄດ້ກ່າວກັບພວກເຂົາວ່າ ອີລາຍຈະມາກ່ອນຢ່າງແນ່ນອນ, ແລະ ຟື້ນຟູທຸກສິ່ງ, ຕາມທີ່ສາດສະດາໄດ້ຂຽນໄວ້.
11 ແລະ ອີກເທື່ອໜຶ່ງເຮົາກ່າວກັບພວກເຈົ້າວ່າ ອີລາຍໄດ້ມາແລ້ວ, ຕາມທີ່ມີຂຽນໄວ້, ຈົ່ງເບິ່ງ, ເຮົາຈະສົ່ງຜູ້ສົ່ງຂ່າວຂອງເຮົາໄປ, ແລະ ລາວຈະຕຽມທາງໄວ້ໃຫ້ເຮົາ; ແລະ ພວກເຂົາຈະບໍ່ຮູ້ຈັກລາວ, ແລະ ຈະເຮັດກັບລາວຕາມໃຈຊອບ.
12 ບຸດມະນຸດກໍຈະໄດ້ຮັບທຸກທໍລະມານຈາກພວກເຂົາເຊັ່ນດຽວກັນນັ້ນ.
13 ແຕ່ເຮົາກ່າວກັບພວກເຈົ້າວ່າ, ອີລາຍຄືໃຜ? ຈົ່ງເບິ່ງ, ນີ້ຄືອີລາຍ, ຜູ້ທີ່ເຮົາໄດ້ສົ່ງໄປຈັດຕຽມທາງໄວ້ໃຫ້ເຮົາ.
14 ຈາກນັ້ນ ສານຸສິດໄດ້ເຂົ້າໃຈວ່າ ພຣະອົງກ່າວກັບພວກເຂົາກ່ຽວກັບໂຢຮັນບັບຕິສະໂຕ, ແລະ ກ່ຽວກັບຜູ້ໜຶ່ງອີກ ທີ່ຈະມາ ແລະ ຟື້ນຟູທຸກສິ່ງ, ຕາມທີ່ສາດສະດາໄດ້ຂຽນໄວ້.