JST, Malakaus 9:3. Piv rau Malakaus 9:4
Yauhas tus uas Muab Neeg Ua Kev Cai Raus Dej nyob saum Roob Hloov Hlo.
3 Thiab Eli-as nrog rau Mauxes, los yog hais tias, Yauhas tus uas Muab Neeg Ua Kev Cai Raus Dej thiab Mauxes tshwm sim los rau lawv; thiab nkawd nrog Yexus tham.
JST, Malakaus 9:40–48. Piv rau Malakaus 9:43–48
Yexus muab kev txiav ib txhais tes los yog ib txhais taw uas pheej ua txhaum piv rau kev txhob koom nrog cov uas coj yus mus yuam kev.
40 Yog li ntawd, yog koj txhais tes ua rau koj ua txhaum, cia li muab txiav pov tseg; los sis yog koj tus kwv tij ua txhaum koj thiab tsis lees thiab tsis tsum, nws yuav raug muab txiav tawm. Qhov koj muaj ib sab tes es koj tau txoj sia zoo dua li koj muaj ob sab tes es poob mus rau hauv ntuj txiag teb tsaus.
41 Vim qhov koj tau txoj sia es tsis muaj koj tus kwv tij zoo dua li qhov koj thiab koj tus kwv tij neb poob mus rau hauv ntuj txiag teb tsaus; rau hauv qhov hluav taws uas cig tsis paub tuag li, qhov uas lawv tej kas tsis txawj tuag, thiab hluav taws cig tsis tuag.
42 Thiab ntxiv, yog koj txhais ko taw ua rau koj ua txhaum, cia li muab txiav pov tseg; vim tus uas yog koj tus yam ntxwv, tus uas koj taug kev raws, yog nws hloov los ua ib tug neeg ua txhaum, nws yuav raug muab txiav tawm.
43 Qhov koj muaj ib sab ko taw es tau txoj sia zoo dua li muaj ob sab ko taw es poob mus rau hauv ntuj txiag teb tsaus; rau hauv qhov hluav taws uas cig tsis paub tuag li.
44 Yog li ntawd, cia txhua tus neeg sawv los yog vau, los ntawm nws tus kheej, thiab txhob ua rau lwm tus; los yog txhob tso siab rau lwm tus.
45 Cia li thov kuv Txiv, thiab lub sij hawm ntawd kiag yuav tau raws li qhov nej thov, yog hais tias nej thov nrog txoj kev ntseeg, ntseeg hais tias nej yeej yuav tau txais.
46 Thiab yog hais tias nej lub qhov muag uas pom kev rau nej, tus uas tus Tswv tsa los saib xyuas nej los qhia txoj kev kaj rau nej, yog nws hloov los ua ib tug neeg ua txhaum thiab ua kom nej ua txhaum, cia li muab nws rho tawm mus.
47 Qhov koj nkag mus rau hauv Vajtswv lub nceeg vaj es muaj ib sab qhov muag zoo dua li koj muaj ob sab qhov muag es poob mus rau hauv hluav taws ntuj txiag teb tsaus.
48 Vim yog koj txais tau kev cawm dim ces yuav zoo dua li uas koj poob mus rau hauv ntuj txiag teb tsaus nrog koj tus kwv tij, qhov chaw uas lawv tej kas tsis txawj tuag, thiab qhov chaw uas hluav taws cig tsis tuag.