JST, Malakaus 14:20–26. Piv rau Malakaus 14:22–25
Yexus txhim tsa lub cim nco txog kom nco txog Nws lub cev thiab cov ntshav.
20 Thiab thaum lawv noj mov, Yexus muab cov mov mog los thiab ua Vajtswv tsaug, thiab muab ntais, thiab muab rau lawv, thiab hais tias, Cia li txais mus, thiab muab noj.
21 Saib seb, qhov no yog muab rau nej ua kom nco txog kuv lub cev; vim npaum li uas nej ua qhov no nej yuav nco txog lub sij hawm uas kuv nrog nej nyob no.
22 Thiab nws muab lub khob los, thiab thaum nws ua Vajtswv tsaug tag lawm, nws muab cev rau lawv; thiab lawv sawv daws tau haus.
23 Thiab nws hais rau lawv tias, Qhov no yog kom nco txog kuv cov ntshav uas tau nrog theej coob tus, thiab kev ua tim khawv tshiab uas kuv muab rau nej; vim nej yuav ua tim khawv txog kuv mus rau tag nrho neeg ntiaj teb.
24 Thiab npaum li uas nej ua txoj kab ke no, nej yuav nco txog kuv thaum lub sij hawm uas kuv nrog nej nyob no thiab nrog nej haus lub khob no, twb yog zaum kawg nyob hauv kuv txoj kev ua hauj lwm qhuab qhia.
25 Kuv hais tseeb rau nej, Auj nej yuav tsum ua tim khawv txog qhov no; vim kuv yuav tsis haus cov cawv txiv hmab no nrog nej ntxiv, mus txog hnub uas kuv haus cov cawv txiv hmab tshiab hauv Vajtswv lub nceeg vaj.
26 Thiab nim no lawv nyuaj siab, thiab quaj txog nws.
JST, Malakaus 14:36–38. Piv rau Malakaus 14:32–34
Nyob ntawm Khexemanes, Kaum Ob tug Thwj Tim tsis to taub tag nrho txog Yexus txoj hauj lwm uas nws yog tus Mexiyas.
36 Thiab lawv tuaj txog ib qho chaw uas hu ua Khexemanes, uas yog ib lub vaj; thiab cov thwj tim pib ntxhov siab heev, thiab nyuaj siab heev, thiab yws nyob hauv lawv lub siab, xav hais tias xyov tus no puas yog tus Mexiyas.
37 Thiab vim Yexus twb paub lawv lub siab, nws hais rau nws cov thwj tim tias, Nej zaum ntawm no, kuv yuav mus thov Vajtswv.
38 Thiab nws coj Petus, thiab Yakaunpaus, thiab Yauhas nrog nws mus, thiab cem lawv, thiab hais rau lawv tias, Kuv nyuaj siab kawg nkaus, twb yuav tuag; nej cia li nrog kuv nyob ntawm no zov tos.