JST, Lukas 3:4–11. Piv rau Lukas 3:4–6
Raws li tau qhia tej uas tau hais yuav muaj los yav tom ntej, Khetos yuav los cawm Ixayees thiab Lwm Haiv Neeg. Nyob hauv lub caij nyoog uas muaj txhij txhua, Nws yuav rov qab los txiav txim rau neeg ntiaj teb.
4 Muaj raws li tau sau tseg nyob hauv tus yaj saub Exayas phau ntawv; thiab nov yog cov lus ntawd, hais tias, Muaj ib tug tsa suab hais nrov nrov tom roob moj sab qhua tuaj hais tias, Nej cia li npaj kev tos tus Tswv, thiab kho kom nws tej kev ncaj.
5 Vim saib seb, thiab xyuas seb, nws yuav los, raws li tau sau tseg cia hauv cov yaj saub phau ntawv lawm, los tshem tawm neeg ntiaj teb tej kev txhaum, thiab coj kev cawm seej mus rau tej haiv neeg tsis hwm Vajtswv, mus sau cov uas poob zoo lawm los ua ke, cov uas yog Ixayees pab yaj.
6 Muaj tseeb tiag, xws li cov uas tawg khiav ri niab thiab raug txom nyem; thiab kuj los npaj txoj kev, thiab ua kom muaj peev xwm tshaj tau txoj moo zoo mus rau Lwm Haiv Neeg;
7 Thiab los ua ib lub teeb mus rau tag nrho cov uas zaum hauv kev tsaus ntuj, mus rau tej chaw deb tshaj plaws hauv lub ntiaj teb; ua kom muaj txoj kev sawv rov los ntawm kev tuag lawm, thiab kom tau nce mus puag saum ntuj, mus nyob ntawm Leej Txiv sab tes xis,
8 Kom txog lub caij nyoog uas muaj txhij txhua, thiab yuav muab txoj kev cai thiab lo lus pov thawj khi cia, thiab yuav muab tej yawm sij ntawm lub nceeg vaj rov qab rau Leej Txiv;
9 Los muab kev txim lij rau sawv daws; los muab kev txiav txim rau sawv daws, thiab los qhia txhua tus uas tsis coj li Vajtswv txog lawv tej hauj lwm uas tsis coj li Vajtswv, uas lawv tau ua lawm; thiab tag nrho tej no nyob rau hnub uas nws los;
10 Vim yog ib hnub muaj hwj chim; muaj tseeb tiag, txhua lub vos hav yuav puv tuaj, thiab txhua lub roob thiab lub toj yuav raug ua kom qis; tej kev com kawb yuav raug ua kom ncaj, thiab tej kev phem yuav raug ua kom du;
11 Thiab txhua tus neeg yuav pom Vajtswv txoj kev cawm seej.
JST, Lukas 3:19–20. Piv rau Lukas 3:10–13
Cov neeg pluag tau noj tau haus los ntawm lub txhab nyiaj txoj kev muaj nplua mias. Cov neeg sau se yuav tsum tsis txhob sau tshaj kev cai pub lawv sau.
19 Vim koj yeej paub zoo, The-aufilaus, hais tias raws li cov Neeg Yudais ua, thiab raws li lawv txoj kab lis kev cai sau nyiaj los rau hauv lub txhab nyiaj, kom muab pub rau cov neeg pluag, txhua txhua tus neeg raws li nws feem, los ntawm txoj kev muaj nplua mias uas tau sau los;
20 Thiab cov neeg sau se kuj ua raws li txoj kev no, yog li ntawd Yauhas hais rau lawv tias, Tsis txhob sau tshaj qhov uas nej muaj cai sau.