16 Thiab lawv hais rau nws tias, Peb muaj txoj kev cai, thiab cov yaj saub tej lus; tiam sis rau tus txiv neej no peb yuav tsis cia nws ua tus kav peb; vim nws tsa nws tus kheej ua tus txiav txim rau peb.

17 Tom qab ntawd Yexus txawm hais rau lawv tias, Txoj kev cai thiab cov yaj saub tej lus ua tim khawv txog kuv; muaj tseeb tiag, thiab tag nrho cov yaj saub uas tau sau, los txog rau Yauhas, lawv tau xub qhia txog hnub nyoog no.

18 Txij lub sij hawm ntawd los, tau tshaj tawm txog Vajtswv lub nceeg vaj, thiab txhua tus neeg uas nrhiav kev tseeb tau sib zog mus rau haud.

19 Thiab yog ua kom ntuj thiab ntiaj teb ploj mus ntshe yooj yim dua li ua kom tsis muaj raws li ib qho me ntawm txoj kev cai.

20 Thiab vim li cas nej qhia txoj kev cai, tiam sis xyeej tej uas tau muab sau cia; thiab rau txim rau tus uas Leej Txiv tau xa los ua kom muaj raws li txoj kev cai tiav, kom nej sawv daws yuav txais kev txhiv dim?

21 Auj cov neeg ruam! vim nej tau hais nyob hauv nej lub siab tias, Twb tsis muaj Vajtswv. Thiab nej tau muab txoj kev yog hloov; thiab lub nceeg vaj ceeb tsheej raug nej tej kev ua lim hiam; thiab nej tsim txom cov neeg siab mos siab muag; thiab nyob hauv nej tej kev ua lim hiam nej nrhiav ua kom lub nceeg vaj puas tsuaj; thiab nej yuam cov neeg ntawm lub nceeg vaj. Kev txom nyem los rau nej, nej cov uas deev luag poj luag txiv!

22 Thiab lawv cem nws dua, vim lawv chim rau tej lus, uas hais tias lawv yog neeg deev luag poj luag txiv.

23 Tiam sis nws hais ntxiv mus tias, Tus uas muab nws tus poj niam nrauj lawm, thiab mus yuav dua ib tug poj niam, tus ntawd deev luag poj, thiab tus uas yuav tus poj niam uas nws tus txiv muab nrauj lawm, tus ntawd deev luag poj. Kuv hais tseeb rau nej tias, Kuv yuav muab nej piv rau tus neeg nplua nuj.