Kev Xam Phaj Tau Daim Ntawv Tso Cai Nkag Tuam Tsev

1. Koj puas muaj kev ntseeg thiab ib zaj lus tim khawv txog Vajtswv, Leej Txiv Nyob Mus Ib Txhis; Nws Leej Tub, Yexus Khetos; thiab tus Vaj Ntsuj Plig Dawb Huv?

2. Koj puas muaj ib zaj lus tim khawv txog Yexus Khetos txoj Kev Theej Txhoj thiab txog Nws lub luag hauj lwm ua tus Cawm Seej thiab tus Txhiv Dim?

3. Koj puas muaj ib zaj lus tim khawv tias tau muab Yexus Khetos txoj moo zoo Txum Tim Rov Qab Los?

4. Koj puas txhawb nqa tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua tus yaj saub, tus pom tau, thiab tus qhia kev tshwm sim thiab yog tib tug neeg nyob hauv lub ntiaj teb no uas muaj cai siv tag nrho tej yawm sij ntawm lub pov thawj hwj?

   Koj puas txhawb nqa cov mej zeej ntawm Thawj Pawg Thawj Tswj Hwm thiab Pawg Kaum Ob tug Thwj Tim ua cov yaj saub, cov pom tau, thiab cov qhia kev tshwm sim?

   Koj puas txhawb nqa lub Koom Txoos lwm cov Tuam Thawj Coj thiab cov thawj coj uas nyob ib cheeb tsam no?

5. Tus Tswv tau hais tias yuav tsum ua txhua yam “raws li kev huv si” rau Nws pom (saib Lus Qhuab Qhia thiab Kev Khi Lus 42:41).

   Koj puas rau siab coj huv si ntawm koj tej kev xav thiab tej yam koj ua?

   Koj puas ua raws li txoj kev cai coj dawb huv?

6. Koj puas ua raws li Yexus Khetos lub Koom Txoos tej lus qhia thaum koj ua tej yam rau koj tsev neeg thiab lwm tus rau lawv saib xwb thiab tab meeg sawv daws?

7. Koj puas txhawb nqa los sis tshaj tawm tej lus qhia, tej kev, los sis tej lus qhuab qhia uas fab ntxeev tej lus qhia los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg?

8. Koj puas rau siab hwm Hnub Caiv kom dawb huv, nyob hauv tsev thiab hauv lub koom txoos; mus koom koj tej kev sib ntsib; npaj siab thiab ua neeg tsim nyog txais lub cim nco txog; thiab coj koj lub neej kom haum txoj moo zoo tej kev cai thiab tej lus txib?

9. Koj puas rau siab ua siab ncaj thaum koj ua txhua yam?

10. Koj puas yog ib tug uas them nyiaj ib feem kaum tag nrho?

    Nug cov mej zeej tshiab uas xav tau ib daim ntawv tso cai sawv cev tam cov tuag ua kev cai raus dej thiab kev cai pom zoo: Koj puas kam ua raws li kev txib kom them nyiaj ib feem kaum?

11. Koj puas to taub thiab ua raws li Txoj Lus Txawj Ntse?

12. (Tsis txhob nug lo lus nug no thaum xam phaj ib tug me nyuam los sis ib tug tub hluas los sis ntxhais hluas.) Koj puas tshuav nuj nqi los yog lwm yam uas koj yuav tsum ua rau ib tug qub poj niam los sis qub txiv, los yog rau ib tug me nyuam?

    Yog tias tshuav no, tam sim no koj puas tseem ua raws li tej yam uas koj yuav tsum ua ntawd?

13. (Tsis txhob nug lo lus nug no thaum xam phaj ib tug mej zeej uas tsis tau txais nws qhov vaj txiaj ntsim.) Koj puas ua raws li tej kev khi lus uas koj twb tau khi tseg hauv lub tuam tsev lawm?

14. (Tsis txhob nug lo lus nug no thaum xam phaj ib tug mej zeej uas tsis tau txais nws qhov vaj txiaj ntsim.) Koj puas hwm koj lub txiaj ntsim dawb ceev hnav cev tsoos tsho raws li qhia hauv cov kab ke chiv thawj? (Nyeem txoj kab lus uas qhia txog “Kev Hnav lub Tuam Tsev Cev Tsoos Tsho,” uas nyob nram qab no, rau txhua tus mej zeej.)

15. Puas muaj tej kev txhaum loj hauv koj lub neej uas tsim nyog koj daws kho nrog cov thawj coj ntawm lub pov thawj hwj kom pab koj hloov siab lees txim?

16. Koj puas xav hais tias koj tsim nyog nkag mus hauv tus Tswv lub tsev thiab koom ua lub tuam tsev tej kab ke?

Thawj Pawg Thawj Tswj Hwm tau muab tej lus qhia no txog kev hnav cev tsoos tsho:

“Cev tsoos tsho ntawm lub pov thawj hwj dawb huv ua rau peb nco txog daim ntaub thaiv nyob hauv lub tuam tsev, thiab daim ntaub thaiv yog ib lub cim txog Yexus Khetos. Thaum koj hnav koj cev tsoos tsho, koj hnav ib lub cim dawb ceev txog Yexus Khetos. Kev hnav cev tsoos tsho yeej yog ib yam qhia tawm tias hauv yus nruab siab yus twb cog lus tias yus yuav coj raws li tus Cawm Seej Yexus Khetos. Cev tsoos tsho kuj ua rau yus nco txog yus tej kev khi lus hauv lub tuam tsev. Koj yuav tsum hnav cev tsoos tsho txhua hnub txhua hmo mus tas koj lub neej. Thaum koj yuav tsum hle vim koj ua tej yam tsis tsim nyog hnav cev tsoos tsho, tom qab ntawd cia li rov qab hnav sai li sai tau. Thaum koj ua raws li koj tej kev khi lus, xws li hnav cev tsoos tsho raws li qhia hauv cov kab ke chiv thawj, ces koj yuav muaj tus Cawm Seej txoj kev hlub tshua, kev pov hwm, lub dag zog, thiab lub hwj chim ntxiv.”

Tus thawj coj pov thawj hwj qhia tus mej zeej kom nws ua tib zoo ceev nws daim ntawv tso cai kom zoo. Tus mej zeej yuav tsum tsis txhob muab daim ntawv tso cai qiv rau lwm tus neeg thiab yuav tsum qhia tus neeg uas muab daim ntawv tso cai rau tus mej zeej yam sai li sai tau yog tias nws ua xiam los sis leej twg nyiag.