Kev Cai Raus Dej

Ib tug uas muaj txoj cai yuav tsum muab ib tug neeg ua kev cai raus dej tus ntawd thiaj yuav los ua ib tug mej zeej ntawm lub Koom Txoos thiab txais tus Vaj Ntsuj Plig Dawb Huv. Txhua tus uas nrhiav kev tsa nto yuav tsum ua raws li tus Cawm Seej tus yam ntxwv txais ob txoj kab ke no.

Ib tug pov thawj los sis ib tug uas tuav lub Pov Thawj Hwj Mekhixedes yog tus uas muab neeg ua txoj kab ke ua kev cai raus dej.

Ob tug tim khawv, uas tus thawj coj uas tswj hwm pom zoo, saib txhua txoj kev cai raus dej seb puas ua raws li qhov yog. Cov mej zeej ntawm lub Koom Txoos uas tau ua kev cai raus dej lawm, tsis hais cov me nyuam thiab cov tub hluas ntxhais hluas, muaj cai ua ob tug tim khawv no.

Yuav tsum rov qab muab neeg ua kev cai raus dej yog tias tsis tau hais raws nraim li nyob hauv phau Lus Qhuab Qhia thiab Kev Khi Lus 20:73. Kuj yuav tsum rov qab ua yog tias ib feem twg ntawm tus neeg lub cev, plaub hau, los sis khaub ncaws tsis tau raus rau hauv dej.

Kom ua txoj kab ke muab neeg ua kev cai raus dej, ib tug pov thawj los sis tus uas tuav lub Pov Thawj Hwj Mekhixedes:

1. Sawv hauv cov dej nrog tus neeg uas yuav ua kev cai raus dej.

2. Siv nws sab tes laug tuav tus neeg sab dab teg xis (kom ua tau yooj yim thiab nyab xeeb). Tus neeg uas yuav ua kev cai raus dej muab nws sab tes laug tuav tus uas muaj lub pov thawj hwj sab dab teg laug.

3. Tsa nws sab tes xis ua ib ceg kaum.

4. Hais tus neeg ntawd lub npe thiab lub xeem kom tag nrho thiab hais tias, “Vim kuv tau txais txoj cai los ntawm Yexus Khetos, kuv muab koj ua kev cai raus dej los ntawm Leej Txiv, thiab ntawm Leej Tub, thiab ntawm tus Vaj Ntsuj Plig Dawb Huv lub npe. Amees” (Lus Qhuab Qhia thiab Kev Khi Lus 20:73).

5. Cia tus neeg muab nws sab tes xis pos lub qhov ntswg (kom ua yooj yim); ces muab nws sab tes xis tso rau ntawm tus neeg lub nraub qaum thiab muab tus neeg raus rau hauv dej tag nrho, tsis hais cov khaub ncaws los yog.

6. Pab rub tus neeg sawv tawm hauv cov dej rov qab los.