Muab cov Mej Zeej Tsa Ua Hauj Lwm rau tej Kev Hu

Cov neeg uas txais kev hu thiab kev txhawb nqa pom zoo ua tej hauj lwm hauv lub Koom Txoos los feem ntau yuav tsum muab lawv tsa ua txoj hauj lwm ntawd (saib Yauhas 15:16; Lus Qhuab Qhia thiab Kev Khi Lus 42:11). Thaum muab tus neeg ntawd tsa, yuav muab (1) txoj cai rau tus neeg ntawd ua txoj hauj lwm uas tau hu nws ua thiab (2) tej lus foom koob hmoov rau nws raws li tus Ntsuj Plig qhia.

Ceg txheem ntseeg cov thawj tswj hwm, cov npisov, thiab tej pawg cov thawj tswj hwm nyias txais nyias cov yawm sij ntawm nyias pawg thawj tswj hwm thaum tau muab lawv tsa. Tiam sis yuav tsum tsis txhob hais lo lus yawm sij thaum muab cov mej zeej tsa ua lwm yam txoj kev hu, tsis hais cov pab cuam hauv tej pawg thawj tswj hwm los yog.

Ib tug uas tuav lub Pov Thawj Hwj Mekhixedes uas tus thawj coj tau pom zoo los sis coob tus maj mam tso lawv tes saum tus neeg taub hau. Ces tus uas yog tus hais lus:

1. Hais tus neeg ntawd lub npe thiab lub xeem kom tag nrho.

2. Hais tias nws ua los ntawm txoj cai ntawm lub Pov Thawj Hwj Mekhixedes.

3. Muab tus neeg tsa ua txoj hauj lwm uas hu lawv ua hauv ceg txheem ntseeg, pawg ntseeg, pawg los sis chav kawm.

4. Muab cov yawm sij yog tias tus neeg yuav tau txais.

5. Hais lus foom koob hmoov raws li tus Ntsuj Plig qhia.

6. Hais los ntawm Yexus Khetos lub npe thaum kawg.