Cov Kab Ke thiab tej Zaj Lus Tshaj Tawm
Lub Cim Nco Txog

Lub Cim Nco Txog

Lub Koom Txoos cov mej zeej sib ntsib nyob rau Hnub Caiv kom hawm Vajtswv thiab txais lub cim nco txog. Nyob hauv txoj kab ke no, lawv noj cov mov mog thiab haus cov dej kom nco ntsoov txog tus Cawm Seej txoj kev muab Nws cov nqaij thiab cov ntshav txi rau lawv thiab rov qab khi lawv tej kev khi lus dawb ceev.

  • Cov pov thawj thiab cov uas tuav lub Pov Thawj Hwj Mekhixedes foom koob hmoov rau lub cim nco txog los tau.

  • Cov dikas, cov xib hwb, cov pov thawj, thiab cov uas tuav lub Pov Thawj Hwj Mekhixedes muab tau lub cim nco txog rau lwm tus los tau.

  1. Tus neeg uas thov foom koob hmoov rau cov mov mog txhos caug thiab hais zaj lus thov Vajtswv foom koob hmoov rau cov mov mog (saib Lus Qhuab Qhia thiab Kev Khi Lus 20:77).

    Auj Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab ua kom cov mov mog no dawb huv rau txhua leej txhua tus uas noj, kom lawv yuav noj nco txog koj Leej Tub lub cev, thiab ua tim khawv rau koj, auj Vajtswv, Leej Txiv tus uas Nyob Mus Ib Txhis, hais tias lawv txaus siab ris koj Leej Tub lub npe, thiab nco ntsoov txog nws thiab ua raws li nws tej lus txib uas nws tau muab rau lawv; kom lawv yuav muaj nws tus Ntsuj Plig nrog lawv nyob tas mus li. Amees.

  2. Tus neeg uas thov foom koob hmoov rau cov dej txhos caug thiab hais zaj lus thov Vajtswv foom koob hmoov rau cov dej (saib Lus Qhuab Qhia thiab Kev Khi Lus 20:79).

    Auj Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab ua kom cov dej no dawb huv rau txhua leej txhua tus uas haus, kom lawv yuav haus nco txog koj Leej Tub cov ntshav, uas tau nrog theej lawv; kom lawv yuav ua tim khawv rau koj, auj Vajtswv, Leej Txiv tus uas Nyob Mus Ib Txhis, hais tias lawv nco ntsoov txog nws, kom lawv yuav muaj nws tus Ntsuj Plig nrog lawv nyob. Amees.