Cov Kab Ke thiab tej Zaj Lus Tshaj Tawm
Kev Cai Pom Zoo

Kev Cai Pom Zoo thiab lub Txiaj Ntsim Vaj Ntsuj Plig Dawb Huv

Tom qab ib tug neeg ua kev cai raus dej, ces yuav muab tus neeg ntawd pom zoo ua ib tug mej zeej ntawm lub Koom Txoos thiab txais tus Vaj Ntsuj Plig Dawb Huv los ntawm kev tso tes saum taub hau (saib Lus Qhuab Qhia thiab Kev Khi Lus 20:41; Tes Hauj Lwm 19:1–6). Nws yuav los ua ib tug mej zeej ntawm lub Koom Txoos tom qab ua ob txoj kab ke no tiav thiab tau muab teev tseg lawm (saib Yauhas 3:5; Lus Qhuab Qhia thiab Kev Khi Lus 33:11; 3 Nifais 27:20).

Raws li pawg npisov qhia, ib tug uas tuav lub Pov Thawj Hwj Mekhixedes los sis coob tus koom tau ib txoj kev cai pom zoo. Lawv maj mam tso lawv tes saum tus neeg taub hau. Ces tus uas yog tus hais lus:

  1. Hais tus neeg ntawd lub npe thiab lub xeem kom tag nrho.

  2. Hais tias txoj kab ke no yog ua los ntawm txoj cai ntawm lub Pov Thawj Hwj Mekhixedes.

  3. Muab tus neeg pom zoo ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

  4. Hais tias “cia li txais tus Vaj Ntsuj Plig Dawb Huv” (tsis hais “cia li txais lub txiaj ntsim Vaj Ntsuj Plig Dawb Huv”).

  5. Hais tej lus foom koob hmoov raws li tus Ntsuj Plig qhia.

  6. Hais los ntawm Yexus Khetos lub npe thaum kawg.