1. Aia hoi, ke olelo aku nei Au ia oe, e Kaʻu keiki, oiai aole oe i unuhi e like me kau i makemake ai ma Oʻu nei, a hoomaka hou e kakau no Kaʻu kauwa, o Iosepa Kamika, opio, pela no Au i makemake ai ia oe e hoomau a hiki i ka pau pono ana ia oe o keia moolelo, ka mea Aʻu i waiho ai ia ia:

2. A alaila, aia hoi, he mau moolelo e ae no Kaʻu, a e haawi aku Au ia oe i ka mana i hiki ai ia oe ke kokua e unuhi mai.

3. E hoomanawanui, e Kuu keiki, no ka mea, he naauao ia iloko Oʻu, a aole ia he mea e pono ai e unuhi oe i keia manawa ano.

4. Aia hoi, o ka hana au i kahea ia ai e hana, oia ke kakau ana no Kuu kauwa o Iosepa;

5. A, aia hoi, mamuli o kou hoomau ole ana e like me kau i hoomaka ai, i ka wa ou i hoomaka ai e unuhi, i lawe ai Au i keia kuleana mai ou aku.

6. Mai ohumu, e Kuu keiki, no ka mea, he naauao ia iloko Oʻu i hana aku ai Au ia oe mamuli o keia ano.

7. Aia hoi, aole oe i hoomaopopo; ua manao oe e haawi aku ana Au ia mea ia oe, oiai oe i noonoo ole ai, koe wale no o ke noi mai Iaʻu;

8. Aka, aia hoi, ke olelo aku nei Au ia oe, he pono nou e noonoo a maopopo iloko o kou naau; alaila he pono nou e ninau mai Iaʻu ina paha he pololei ia mea, a ina he pololei ia e hoowela ana Au i kou houpo iloko ou; nolaila, e hoomaopopo oe he pololei ia;

9. Aka, ina aole ia he pololei, aole e loaa ia oe ia ano hoomaopopo ana, aka e loaa ana ia oe ka lolo o ka noonoo, a oia ka mea ou e poina ai i ka mea i hewa: nolaila aole e hiki ia oe ke kakau i na mea i laa, ke ole e haawi ia ia mea ia oe mai Oʻu aku.

10. Ano, ina i ike oe i keia, ina ua hiki ia oe ke unuhi; eia nae, aole ia he mea pono ke unuhi mai oe i keia manawa.

11. Aia hoi, he mea pono no ia i ka wa au i hoomaka ai, aka, ua hopohopo oe a ua hala ka manawa, a aole ia he mea pono i keia manawa;

12. No ka mea, aole anei oe i ike ua haawi aku Au i Kuu kauwa ia Iosepa i ka ikaika i lawa, a ma o ia mea la i hoolawa ia ai ia mea; a aole kekahi o olua Aʻu i hoahewa ai.

13. E hana i keia mea Aʻu i kauoha aku ai ia oe, a e holomua no oe. E kupaa, a aole e ae aku i kekahi hoowalewale ana.

14. E ku naueue ole iloko o ka hana Aʻu i kahea aku ai ia oe, a aole he oho o kou poo e nalowale, a e hookiekie ia ae auanei oe ma ka la hope. Amene.