1. Aia iloko o ka Ekalesia elua Oihanakahuna, oia hoi, ka Melekisedeka a me ka Aarona e paa ana i ka Oihanakahuna Levi.

2. O ke kumu i kapa ia ai ka mua ka Oihanakahuna Melekisedeka, no ka mea, he Kahuna Kiekie nui o Melekisedeka.

3. Mamua aku o kona la, ua kapa ia ia ka Oihanakahuna Hemolele, mamuli o ke ano o ke Keiki a ke Akua;

4. Aka, mamuli o ka manao hoomaikai a aloha hoi i ka inoa o ka Mea Kiekie Loa, a i mea e hoopuka pinepine ole ia ai Kona inoa, kapa aku la lakou, ka Ekalesia ma na la kahiko, ia Oihanakahuna mamuli o Melekisedeka, a i ole, ka Oihanakahuna Melekisedeka.

5. He mau pakuina na mana, a i ole, na oihana e ae a pau iloko o ka Ekalesia no keia Oihanakahuna;

6. Aka, aia he elua mau mahele a mau poo nui; hookahi, oia ka Oihanakahuna Melekisedeka, a o kekahi ka Aarona, a i ole, ka Oihanakahuna Levi.

7. O ka oihana o ka Lunakahiko, aia ia malalo o ka Oihanakahuna o Melekisedeka.

8. Ke paa nei ka Oihanakahuna Melekisedeka i ke kuleana o ka oihana peresidena, a he mana a kuleana kona maluna o na oihana a pau iloko o ka Ekalesia, ma na kau a pau o ke ao nei, e lawelawe ma na mea pili uhane.

9. Ua loaa i ka Papa Peresidena o ka Oihanakahuna Kiekie, mamuli o ke ano o Melekisedeka, he kuleana e lawelawe ma na oihana a pau iloko o ka Ekalesia.

10. Ua loaa i na Kahuna Kiekie mamuli o ke ano o ka Oihanakahuna Melekisedeka, he kuleana e lawelawe ma ka lakou oihana iho, malalo o ke kuhikuhi ana o ka papa Peresidena, ma ka lawelawe ana i na mea pili uhane, a ma ka oihana o ka Lunakahiko, Kahuna (o ke ano o Levi,) Kumu, Diakona, a lala hoi.

11. Ua loaa i ka Lunakahiko he kuleana e lawelawe ma kahi o ke Kahuna Kiekie, ke ole oia malaila.

12. E lawelawe ke Kahuna Kiekie a me ka Lunakahiko ma na mea pili uhane, i ku i na berita a me na kauoha o ka Ekalesia; a he kuleana ko laua e lawelawe ma keia mau oihana a pau o ka Ekalesia, ke ole kekahi mau oihana i kiekie ae malaila.

13. Ua kapa ia ka lua o ka Oihanakahuna ka Oihanakahuna a Aarona, no ka mea, ua hooili ia ia maluna o Aarona a me kana hua, i ko lakou mau hanauna a pau.

14. O ke kumu i kapa ia ai ia ka Oihanakahuna uuku iho, no ka mea, he pakui ia i ka mea i nui ae, a i ole, ka Oihanakahuna Melekisedeka, a ia ia ka mana e lawelawe i na lawelawe-paa o ko ke kino.

15. O ka papa Bihopa, oia ka papa peresidena o keia Oihanakahuna, a ke paa nei ia i na ki, a i ole, ka mana o ia oihana.

16. Aole i loaa i kekahi kanaka ke kuleana io i keia oihana, e paa i na ki o keia Oihanakahuna, ke ole oia he mamo ponoi na Aarona.

17. Aka, oiai he kuleana ko kekahi Kahuna Kiekie o ka Oihanakahuna Melekisedeka e lawelawe ma na oihana haahaa iho a pau, ua hiki no ia ia ke lawelawe i ka oihana a ka Bihopa, ina aole hiki ke loaa kekahi mamo ponoi na Aarona, ina nae ua kahea ia a hookaawale ia, a hoolilo ia no keia mana e na lima la o ka Papa Peresidena o ka Oihanakahuna Melekisedeka.

18. O ka mana a me ke kuleana o ka mea kiekie ae, a i ole, ka Oihanakahuna Melekisedeka, oia ka paa ana i na ki o na hoopomaikai pili uhane a pau a ka Ekalesia,

19. E paa i ke kuleana e loaa na mea pohihihi o ke aupuni o ka lani, e wehe ia hoi na lani ia lakou, e lawelawe pu me ke anaina nui a me ka Ekalesia o ka Hanau-mua, a e hauoli i ke kamailio a lawelawe pu ana a me ka launa pu ana me ke Akua, ka Makua, a me Iesu, ka Mea Uwao o ka Berita Hou.

20. O ka mana a me ke kuleana o ka mea uuku iho, oia hoi ka Oihanakahuna Aarona, oia ka paa ana i na ki o ka lawelawe ana o na anela, a e lawelawe ma na hana lawelawe-paa o ko ke kino, ka huaolelo o ka Euanelio, ka bapetizo ana o ka mihi no ke kala ia ana o na hala, i ku i na berita a me na kauoha.

21. I mea e pono ai, aia he mau Peresidena, a i ole, he mau luna hoomalu, e ulu mai ana, a i ole, i koho ia maiwaena ae o ka poe i hoolilo ia i na oihana like ole iloko o keia mau Oihanakahuna a elua.

22. Ekolu Kahuna Kiekie e noho peresidena ana, mailoko mai o ka Oihanakahuna Melekisedeka, i wae ia e ka aha Oihanakahuna, i koho ia hoi a hoolilo ia i kela oihana, a kakoo ia ma ka hilinai, ka manaoio, a me ka pule o ka Ekalesia, oia ka Papa Peresidena o ka Ekalesia.

23. Ua kahea ia na hoakuka kaahele umikumamalua e lilo i mau Aposetolo Umikumamalua, oia hoi, he mau hoike ku kaokoa no ka inoa o Kristo ma ko ke ao nei a pau; pela i like ole ai me na luna e ae iloko o ka Ekalesia ma na hana o ka lakou oihana.

24. A he papa lakou i likealike ke kuleana a me ka mana me ko na Peresidena ekolu i hai mua ia ae nei.

25. Ua kahea ia no hoi na Kanahiku e hai i ka Euanelio, a e lilo i mau hoike ku kaokoa i na Genetile a ma ko ke ao nei a pau; pela i like ole ai me na luna e ae iloko o ka Ekalesia ma na hana o ka lakou oihana;

26. A he papa lakou i likealike ke kuleana me ko na hoike ku kaokoa Umikumamalua, oia hoi, na Aposetolo i hai mua ia ae nei.

27. A o kela a me keia olelo-hooholo i hana ia e kekahi o keia mau papa, e hana ia ia ma ka leo lokahi o ia papa e pono ai; oia hoi, e lokahi kela a me keia lala iloko o ia papa hookahi i kona mau olelo-hooholo, i hana ia ai ka lakou olelo-hooholo a likealike ka mana, a i ole, ku i ke kanawai kekahi me kekahi.

28. (Ua hiki ka hapanui ke lilo i papa, i ka wa e hiki ole ai, ke alo ae mamuli o kekahi pilikia.)

29. Ina aole pela iho la ke ano, aole e loaa ana i ka lakou mau olelo-hooholo na pomaikai e like me ko na olelo-hooholo o ka papa o na Peresidena ekolu ma ka wa kahiko, ka poe i hoolilo ia mamuli o ke ano o Melekisedeka, a he poe kanaka i pono a hemolele lakou.

30. O na olelo-hooholo a keia mau papa, a i ole, kekahi paha o lakou, e hana ia no ia ma ka pono a pau, ma ka hemolele, a me ka haahaa o ka naau, ke akahai a me ka hoomanawanui, me ka manaoio, a me ka maemae, a me ka ike, ke akahele, ke ahonui, ke ano ku i ko ke Akua, ka lokomaikai hoahanau a me ke aloha;

31. No ka mea, penei ka olelo hoopomaikai, ina e noho keia mau mea iloko o lakou, aole lakou e nele i na pomaikai o ka ike o ka Haku.

32. A ina e hana ia kekahi olelo-hooholo o keia mau papa me ka pono ole, ua hiki ke lawe ia aku no ia imua o ke anaina nui o na papa like ole, o lakou iho la na luna o na mea pili uhane o ka Ekalesia, i ole ia, aole hiki ke hoohalahala ia ka lakou olelo-hooholo.

33. He Ahakuka Kiekie hoomalu a kaahele ka Umikumamalua, e lawelawe ma ka inoa o ka Haku, malalo o ke kuhikuhi ana a ka Papa Peresidena o ka Ekalesia i ku like me ko ka lani; e kukulu i ka Ekalesia, a e hooponopono i kana mau hana a pau mawaena o na lahuikanaka a pau, i na Genetile mamua, ka lua i na Iudaio.

34. E hana na Kanahiku ma ka inoa o ka Haku, malalo o ke kuhikuhi ana o ka Umikumamalua, oia hoi, ka Ahakuka Kiekie kaahele, ma ke kukulu ana i ka Ekalesia a hooponopono ana i kana mau hana a pau mawaena o na lahuikanaka a pau; ka mua i na Genetile, alaila i na Iudaio;

35. E hoouna ia aku ka Umikumamalua, e paa ana i na ki e wehe i ka ipuka ma ka hai ana i ka Euanelio o Iesu Kristo, i na Genetile mamua, alaila i na Iudaio.

36. O na Ahakuka Kiekie kumau ma na Mahele-aina o Ziona, he papa ia i likealike ka mana ma na hana o ka Ekalesia, ma ka lakou mau olelo-hooholo a pau, me ko ka Papa Peresidena, a i ole, me ko ka Ahakuka Kiekie kaahele.

37. O ka Ahakuka Kiekie ma Ziona, he papa ia i likealike ka mana ma na hana o ka Ekalesia, ma ka lakou mau olelo-hooholo a pau, me ko na Ahakuka o ka Umikumamalua ma na Mahele-aina o Ziona.

38. O ka hana ia a ka Ahakuka Kiekie kaahele e kahea i na Kanahiku, mamua o kekahi poe e ae, i ka wa a lakou i nele ai i ke kokua, e hooko i na kahea like ole no ka hai ana a me ka lawelawe ana i ka Euanelio.

39. O ka hana ia a ka Umikumamalua, ma na apana nui a pau o ka Ekalesia, e hoolilo i mau Makualii, me lakou nei i kuhikuhi ia mai ia lakou la ma ka hoikeana.

40. Ua hoopaa ia ke ano o keia Oihanakahuna e hooili ia mai ka makua a i ke keiki, a he kuleana oiaio ko na mamo pololei o ka hua i wae ia, ia lakou na olelo hoopomaikai i haawi ia aku ai.

41. Ua hookumu ia keia ano i na la o Adamu, a ili mai la ma ka mamo pololei, ma ke ano penei:

42. Mai a Adamu a ia Seta, ka mea i hoolilo ia e Adamu i ke kanaono-kumamaiwa o kona mau makahiki, a ua hoopomaikai ia e ia ekolu makahiki mamua o kona (Adamu) make ana, a loaa na olelo-hoopomaikai a ke Akua, ma o kona makuakane la, e lilo kana poe mamo i poe i wae ia no ka Haku, a e malama ia lakou a hiki aku i ka hopena o ka honua.

43. No ka mea, he kanaka hemolele oia (Seta), a ua like loa kona ano me ke ano o kona makuakane, a no ka like loa, me he mea la ua like oia me kona makuakane ma na ano a pau, a ua hiki ke hoomaopopo ia aku ai mai a ia mai ma o kona ano kahiko la wale no.

44. Ua hoolilo ia o Enosa i ka 134 o kona mau makahiki a me na mahina eha, ma ka lima o Adamu.

45. Kahea aku la ke Akua ia Kainana ma ka waonahele, i ke kanaha o kona mau makahiki, a halawai iho la ia me Adamu ma ka hele ana i Sedolamaka. He 87 ona mau makahiki i ka wa i loaa ai ia ia kona hoolilo ia ana.

46. He 496 mau makahiki a me na la 7 o Mahalaleela i ka wa i hoolilo ia ai oia ma ka lima o Adamu, a nana hoi oia i hoopomaikai.

47. He 200 mau makahiki o Iareda i ka wa i hoolilo ia ai oia malalo iho o ka lima o Adamu, a nana no hoi oia i hoopomaikai.

48. He 25 mau makahiki o Enoka i ka wa i hoolilo ia ai oia malalo iho o ka lima o Adamu, a he 65 ona mau makahiki i ka wa a Adamu i hoopomaikai ai ia ia.

49. A ike aku la oia i ka Haku, a hele pu iho la me Ia, a imua mau oia o Kona alo; a hele pu iho la oia me ke Akua no na makahiki he 365, nolaila, he 430 ona mau makahiki i ka wa i lawe ola ia ai oia.

50. He 100 mau makahiki o Metusala i ka wa i hoolilo ia ai oia malalo o ka lima o Adamu.

51. He 32 mau makahiki o Lameka i ka wa i hoolilo ia ai oia malalo iho o ka lima o Seta.

52. He umi mau makahiki o Noa i ka wa i hoolilo ia ai oia malalo o ka lima o Metusala.

53. Ekolu mau makahiki mamua o ka make ana o Adamu, kahea aku la ia ia Seta, Enosa, Kainana, Mahalaleela, Iareda, Enoka a me Metusala, he poe Kahuna Kiekie lakou a pau, me ke koena o kana mau mamo, he poe pono no hoi, iloko o ke awawa o Adamu-onadai-Amana, a malaila oia i haawi iho ai i kana hoopomaikai hope loa maluna o lakou.

54. A hoea aku la ka Haku io lakou la, a ku ae la lakou a hoopomaikai mai la ia Adamu, a kapa aku la ia ia o Mikaela, ke Keikialii, ka Luna-anela.

55. A hooluolu aku la ka Haku ia Adamu, a olelo aku la ia ia, Ua hoonoho aku Au ia oe e ku ma ke poo; e puka mai ana na lahuikanaka he lehulehu mai ou la mai, a he keiki-alii oe maluna o lakou no ka wa mau loa.

56. A ku ae la o Adamu iwaena o ke anaina, a me ka nana ole i kona kolopupu ana, ua piha i ka Uhane Hemolele, a wanana mai la i kela me keia mea e hiki mai ana maluna o kana mau mamo a hiki i ka hanauna hope loa.

57. Ua palapala ia keia mau mea a pau iloko o ka buke a Enoka, a e hooiaio ia auanei ma ka wa kupono.

58. O ka hana ia no hoi a ka Umikumamalua, e hoolilo a e hoonohonoho i na luna e ae a pau o ka Ekalesia, i ku like me ka hoikeana e olelo ana penei:

59. I ka Ekalesia o Kristo ma ka aina o Ziona, he pakui keia i na kanawai Ekalesia e pili ana i ka hana Ekalesia.

60. He oiaio Kaʻu e olelo aku nei ia oukou, wahi a ka Haku o na lehulehu, he mea pono e loaa he mau Lunakahiko hoomalu, e hoomalu maluna o ka poe e paa ana i ka oihana a ka Lunakahiko:

61. A he mau Kahuna no hoi e hoomalu maluna o ka poe e paa ana i ka oihana a ke Kahuna;

62. A he mau Kumu no hoi e hoomalu maluna o ka poe e paa ana i ka oihana a ke Kumu, ma ia ano like; a pela no hoi me na Diakona;

63. No ia mea, mai ke Diakona a i ke Kumu, a mai ke Kumu a i ke Kahuna, a mai ke Kahuna a i ka Lunakahiko, e like me ko lakou koho pakahi ia ana, i ku i na berita a me na kauoha o ka Ekalesia;

64. Alaila, o ka Oihanakahuna Kiekie mahope aku, ka mea i oi loa ae mamua o ia mau mea a pau.

65. No ia mea, he mea e pono ai e koho ia i hookahi mai ka Oihanakahuna Kiekie e hoomalu maluna o ka Oihanakahuna, a e kapa ia oia ka Peresidena o ka Oihanakahuna Kiekie o ka Ekalesia;

66. A i ole, ma kekahi olelo ana, ke Kahuna Kiekie Hoomalu maluna o ka Oihanakahuna Kiekie o ka Ekalesia.

67. Mailaila mai ka lawelawe ana i na hana lawelawe-paa a me na hoopomaikai ana maluna o ka Ekalesia, ma ke kau ana o na lima.

68. No ia mea, aole i likealike ka oihana a ka Bihopa me ia; no ka mea, o ka oihana a ka Bihopa oia no ka lawelawe ana i na mea pili i ko ke kino a pau;

69. Aka nae, e koho ia ka Bihopa mai ka Oihanakahuna Kiekie mai e pono ai, ke ole oia he mamo ponoi na Aarona;

70. No ka mea, ke ole oia he mamo ponoi na Aarona, aole hiki ia ia ke paa i na ki o ia Oihanakahuna.

71. Aka nae, ua hiki ke hookaawale ia kekahi Kahuna Kiekie mamuli o ke ano o Melekisedeka no ka lawelawe ana i na mea pili i ko ke kino, i loaa hoi ka ike no ia mau mea ma ka Uhane o ka oiaio,

72. A e lilo i lunakanawai no hoi iloko o Iseraela, e hana i ka hana o ka Ekalesia, e noho e hookolokolo i ka poe hana hewa mamuli o na olelo-ike i waiho ia imua ona, i ku i na kanawai, ma o ke kokua ana la o kona mau hoakuka ana i wae ai, a i ole, e wae aku ai iwaena o na Lunakahiko o ka Ekalesia;

73. O keia ka hana a ka Bihopa, ka mea aole he mamo ponoi na Aarona, aka, i hoolilo ia i ka Oihanakahuna Kiekie mamuli o ke ano o Melekisedeka.

74. Pela iho la e lilo ai oia i lunakanawai, oia hoi, i lunakanawai no ka lehulehu iwaena o na kanaka o Ziona, a i ole, iloko o kekahi Mahele-aina o Ziona, a i ole, iloko o kekahi apana o ka Ekalesia ma kahi ana e hookaawale ia ai no keia hana o ka Oihanakahuna, a hiki i ka hoakea ia ana o na palena o Ziona, a lilo ia he mea e pono ai e loaa o na Bihopa e ae, a i ole, na lunakanawai ma Ziona, a ma na wahi e ae paha;

75. A ina e koho ia i mau Bihopa e ae e lawelawe lakou ma ia oihana hookahi.

76. Aka, he kuleana i ku i ke kanawai ko ka mamo ponoi a Aarona i ka oihana peresidena o keia Oihanakahuna, i na ki hoi o keia hana o ka Oihanakahuna, e lawelawe kuokoa ma ka oihana a ka Bihopa, me na hoakuka ole, koe wale no ka noho ana i lunakanawai iloko o Iseraela, i ka wa e hookolokolo ia ai kekahi Peresidena o ka Oihanakahuna Kiekie mamuli o ke ano o Melekisedeka:

77. A o ka olelo-hooholo a kekahi o keia mau ahakuka i kulike me ke kauoha e olelo ana:

78. Eia hou, he oiaio Kaʻu e olelo aku nei ia oukou, o ka hana koikoi loa o ka Ekalesia, a me na hihia paakiki loa o ka Ekalesia, ina aole ku i ka makemake o ka olelo-hooholo a ka Bihopa, a i ole, na lunakanawai, alaila, e waiho ia aku no ia a e lawe ia imua o ka Ahakuka o ka Ekalesia, imua o ka Papa Peresidena o ka Oihanakahuna Kiekie;

79. A ua loaa ka mana i ka Papa Peresidena o ka Ahakuka o ka Oihanakahuna Kiekie e kahea i mau Kahuna Kiekie e ae, oia hoi, i umikumamalua, e kokua ma ke ano he mau hoakuka; a pela e loaa ai ka mana i ka Papa Peresidena o ka Oihanakahuna Kiekie a me kona mau hoakuka, e hooholo maluna o na olelo-ike e ku i na kanawai o ka Ekalesia;

80. A mahope o keia olelo-hooholo, aole e hoomanao hou ia imua o ka Haku; no ka mea, o keia ka Ahakuka Kiekie loa o ka Ekalesia o ke Akua, a me ka olelo-hooholo hope loa maluna o na hoopaapaa pili ma na mea uhane.

81. Aole kekahi lala o ka Ekalesia mawaho ae o ka mana o keia Ahakuka o ka Ekalesia.

82. A ina e hana hewa ka Peresidena o ka Oihanakahuna Kiekie, alaila e lawe ia aku no ia imua o ka Ahakuka o ka lehulehu o ka Ekalesia, i kokua ia hoi e umikumamalua mau hoakuka o ka Oihanakahuna Kiekie;

83. A o ka lakou olelo-hooholo maluna o kona poo, oia iho la ka hopena o ka hihia e pili ana nona.

84. Pela, aole e kaa kekahi mawaho ae o ka hoopai a me na kanawai o ke Akua; i hana ia ai na mea a pau me ka pololei a ma ke ano hoano imua Ona, e like me ka oiaio a me ka pono.

85. A eia hou, he oiaio, ke olelo aku nei Au ia oukou, o ka hana a ka peresidena maluna o ka oihana a ke Diakona oia no ka noho hoomalu ana maluna o na Diakona he umikumamalua, a e noho kuka pu me lakou, a e ao aku ia lakou i ka lakou hana, me ka hoonaauao ana kekahi i kekahi, e like me ia i haawi ia mai e ku i na berita.

86. A o ka hana no hoi a ka peresidena maluna o ka oihana o na Kumu, oia no e noho hoomalu maluna o na Kumu he iwakalua-kumamaha, a e noho kuka pu me lakou, e ao ana ia lakou i na hana a ka lakou oihana, e like me ia i haawi ia mai ma na berita.

87. A o ka hana no hoi a ka peresidena maluna o ka Oihanakahuna Aarona e noho hoomalu maluna o na Kahuna he kanaha-kumamawalu, a e noho kuka pu me lakou, e aʻo ia lakou i na hana a ka lakou oihana, e like me ia i haawi ia ma na berita;

88. O keia peresidena, he Bihopa no ia; no ka mea, kekahi ia o na hana a keia Oihanakahuna.

89. A eia hou, o ka hana a ka peresidena maluna o ka oihana a na Lunakahiko, oia ka noho hoomalu ana maluna o na Lunakahiko he kanaiwa-kumamaono, a e noho kuka pu me lakou, a e aʻo aku ia lakou e like me na berita.

90. O keia oihana peresidena he kaokoa ia mai ko ke Kanahiku aku, a ua kukulu ia no ka poe e kaahele ole ana i ko ke ao nei a pau.

91. A eia hou, o ka hana a ka peresidena o ka Oihanakahuna Kiekie, oia ka noho hoomalu ana maluna o ka Ekalesia holookoa, a e lilo i likealike me Mose.

92. Aia hoi, eia ka naauao; he oiaio, e lilo i mea ike, i mea hoike, i mea unuhi, a i Kaula e paa ana i na haawina a pau o ke Akua, ana i hooili ai maluna o ke poo o ka Ekalesia.

93. A ua ku like ia i ka hihio, e hoike ana i ke ano o ka papa Kanahiku, oia hoi, e loaa ia lakou i ehiku peresidena e hoomalu maluna o lakou e pono ai, i koho ia maiwaena ae o ka heluna o ka papa Kanahiku;

94. A o ka hiku o ka peresidena o keia mau peresidena oia ke hoomalu maluna o ka eono;

95. A na keia mau peresidena ehiku e wae aku i mau papa Kanahiku hou ae mawaho aku o ka papa Kanahiku mua o lakou e noho lala ana, a e noho hoomalu maluna o lakou;

96. A he mau papa Kanahiku e ae no hoi, a hiki i ka ehiku kanahiku, ina he mea ia e pono ai ka hana ma ka malawaina.

97. A e lilo keia mau Kanahiku i poe Kahuna haiolelo kaahele i na Genetile mamua, a i na Iudaio no hoi;

98. Oiai, o na luna e ae o ka Ekalesia, ka poe aole no ka Papa Umikumamalua, aole no hoi no ka Papa Kanahiku, aole i kaa aku ke koikoi maluna o lakou e kaahele iwaena o na lahuikanaka a pau, aka, e kaahele lakou e like me ka hiki ia lakou, eia no nae, e hiki ia lakou ke paa i na oihana i likealike ke kiekie a me ke koikoi iloko o ka Ekalesia.

99. No ia mea, ano, e ao kela a me keia kanaka i kana hana iho, a e hana ma ka oihana ona i koho ia aku ai, me ka hooikaika a pau.

100. O ka mea molowa aole oia i kupono e helu ia e ku, a o ka mea i ao ole i kana hana, a hoike mai ia ia iho, i apono ole ia, aole no ia i kupono e helu ia e ku. Pela io no. Amene.