Mokuna 119.
He Hoikeana i Haawi ia ma o Iosepa la, ke Kaula, ma Komohana Mamao, Misouri, ma ka La 8 o Iulai, M. H. 1838, no ka Pane ana i ka Ninau, “E ka Haku, e Hoike mai i Kau Poe Kauwa i ka Nui Au e Makemake nei no ka Waiwai Hapaumi Mailoko mai o na Waiwai o na Kanaka.”
1. He oiaio, penei ka Haku e olelo mai nei, ke makemake nei Au i na waiwai keu a pau e waiho ia iloko o ka lima o ka Bihopa o Kuu Ekalesia ma Ziona,
2. No ke kukulu ia ana o Kuu hale, a no ka hookumu ana i ke kahua o Ziona, a no ka Oihanakahuna, a no na aie o ka Papa Peresidena o Kuu Ekalesia;
3. A o keia ka hoomaka ana o ka auhau hapaumi ana i Koʻu poe kanaka;
4. A mahope aku o ia mea, o ka poe i auhau hapaumi ia pela, e uku no lakou ma kela a me keia makahiki i ka hapaumi o ko lakou mau loaa a pau; a e lilo keia i kanawai ku mau no lakou no ka wa mau loa, no Kuu Oihanakahuna hemolele, wahi a ka Haku.
5. He oiaio, ke olelo aku nei Au ia oukou e hiki mai ana keia, o ka poe a pau e houluulu ana ma ka aina o Ziona e auhau hapaumi ia lakou ma ko lakou mau waiwai keu, a e malama i keia kanawai, i ole ia aole lakou i kupono e ku mawaena o oukou.
6. A ke olelo aku nei Au ia oukou, ina e malama ole Koʻu poe kanaka i keia kanawai a hoano ia mea, a ma o keia kanawai la e hoolaa i ka aina o Ziona Noʻu, i malama ia ai Koʻu mau kanawai a me Kaʻu mau olelo hooholo malaila, i lilo ai ia i hemolele loa, aia hoi, he oiaio, ke olelo aku nei Au ia oukou, aole e lilo ia i aina o Ziona no oukou;
7. A e lilo keia i kumuhoohalike no na Mahele-aina a pau o Ziona. Pela io no. Amene.