Mokuna 118.
He Hoikeana i Haawi ia ma o Iosepa la, ka Mea Ike, ma Komohana Mamao, Misouri, Iulai, La 8, M. H. 1838, i Pane no ke Noi, “E Hoike mai ia Makou i Kou Makemake, e ka Haku, e Pili ana i ka Papa Umikumamalua.”
1. He oiaio, penei wahi a ka Haku, e malama koke ia kekahi huikuka, a e hoonohonoho ia ka poe Umikumamalua, a e koho ia kekahi mau kanaka i mau panihakahaka no ka poe i haule.
2. E ae aku i Kaʻu kauwa, ia Toma, e noho no kekahi manawa ma ka aina o Ziona, e hoolaha aku i Kaʻu olelo.
3. A e haiolelo aku ke koena mai ia hora aku, a ina e hana lakou i keia me ka naau pepe, me ke akahai a me ka haahaa, a me ke ahonui, ke haawi aku nei Au, ka Haku, ia lakou i olelo hoopomaikai, oia hoi, e hoolako no Au i ko lakou mau ohana, a e wehe ia ae kekahi puka e pomaikai ai no lakou, mai keia manawa aku;
4. A i keia kau kupulau ae e haalele lakou e holo maluna o na wai nui a i kela aoao, a malaila e hoolaha aku ai i Koʻu Euanelio, oia hoi, i kona piha, a e hooiaio aku no Koʻu inoa.
5. E haalele lakou i Koʻu Poe Hoano iloko o ke kulanakauhale o Komohana Mamao, ma ka la 26 o keia Aperila ae, ma kahi o ke kahua o Koʻu hale, wahi a ka Haku.
6. E koho ia Kaʻu kauwa, o Ioane Tela, a me Kaʻu kauwa, o Ioane E. Peki no hoi, a me Kaʻu kauwa, o Wilefoda Wuderufa no hoi, a me Kaʻu kauwa, o Wilada Rikeke no hoi, e hoopiha i na hakahaka o ka poe i haule, a e hoike ia ko lakou koho ia ana ia lakou e ka mea i loaa ke kuleana.